अर्थ समाचार

प्रदेश-५ नीति तथा कार्यक्रम : जिल्ला अस्पताल ५० शय्याको बनाइने, प्राथमिकतामा पूर्वाधार विकास

सविन मिश्र शनिबार, जेठ १०, २०७७ २३:५३

काठमाडौं- प्रदेशस्तरीय पूर्वाधार आयोजना अघि बढाउने, कृषि क्षेत्रको विकास गर्ने, रोजगारी सिर्जना एवं औद्योगिक विकास गर्ने र कोरोना भाइरसका कारण भएको क्षति न्यूनीकरण गर्ने उद्देश्यसहित प्रदेश ५ ले आगामी आर्थि वर्षको नीति तथा कार्यक्रम ल्याएको छ।

प्रदेश प्रमुख धर्मनाथ यादवले प्रदेशसभाको बैठकमा प्रस्तुत गरेको नीति तथा कार्यक्रममा सडक गुरुयोजनाअन्तर्गत प्रदेशस्तरका राजमार्ग, कृषि, पर्यटन प्रवर्द्धन, आन्तरिक आयमा टेवा पुर्‍याउने खालका क्षेत्रीय सडक, उद्योगस्थल पहुँचमार्गलगायतका प्रदेशस्तरीय सडक संजालको दीगो व्यवस्थापनमा जोड दिइने उल्लेख छ।

साविकका सहायक राजमार्गलाई प्रदेशको सडक ऐनबमोजिम वर्गीकरण गरी मर्मतसंभार र स्तरोन्नति गर्ने घोषणा गरिएको छ। स्थानीय तह पहुँचमार्ग कार्यक्रमलाई चालु आर्थिक वर्षदेखि बहुवर्षीय आयोजनाको रूपमा सञ्चाल गर्ने कार्य थालनी गरिएको र यस कार्यक्रमअन्तर्गत सञ्चालित सकडमध्ये कम्तीमा एक तिहाइलाई कालोपत्रे र बाँकीलाई ग्राभेल गर्ने घोषणा गरिएको छ।

प्रदेशका सडक पुलहरूको समग्र सूची तयार गरी प्राथमिकताको आधारमा अध्ययन एवं निर्माण गर्ने घोषणा पनि गरिएको छ। हाल निर्माणाधीन ५५ वटा सडक पुलमध्ये आगामी वर्ष १४ वटा र त्यसपछिको वर्षमा ४० वटा पूरा गर्ने घोषणा पनि गरिएको छ।

वैकल्पिक ऊर्जाका विविध स्रोतको विकास गरी आगामी तीन वर्षभित्र प्रदेश भरका सबै नागरिकहरुलाई आवश्यक पर्ने ऊर्जाको न्यूनतम पहुँच सुनिश्चित गरी उज्यालो प्रदेशका रूपमा स्थापित गर्ने घोषणा पनि नीति तथा कार्यक्रममा गरिएको छ। तराईका बुटवल-भैरहवा, नेपालगञ्ज-कोहलपुर तथा घोराही-तुलसीपुर र पहाडका स्वर्गद्वारी, रुरुक्षेत्र र रामपुरलाई प्रदेशका ६ शीर्षबिन्दु घोषणा गर्ने र विकास तथा सञ्जालका आयामहरूलाई केन्द्रित गर्ने नीति लिने घोषणा पनि गरिएको छ।

प्रदेशमा ४ वटा महानगर विकास गर्ने नीतिअनुरुप महानगर पूर्वाधार विकास कार्यक्रम सञ्चालन गर्ने घोषणा पनि गरिएको छ। यसको विस्तृत संभाव्यता अध्ययन प्रतिवेदन आगामी वर्षभित्र तयार गरी कार्यान्वयन गर्ने घोषणा गरिएको छ।

प्रदेश मातहतका जिल्लास्तरका अस्पतालहरुलाई कम्तिमा ५० शय्याको अस्पतालको रूपमा स्तरोन्नति गर्दै लगिने घोषणा पनि गरिएको छ। ती अस्पतालमा दन्त सेवा, फिजियोथेरापी जस्ता सेवा पनि विस्तार गर्ने घोषणा गरिएको छ।

यस्ता छन् मुख्य नारा
प्रदेश सरकारले ल्याएको नीति तथा कार्यक्रममा केही नारा पनि समावेश गरिएको छ। समृद्ध प्रदेश खुशी जनता मुख्य नारासहित अन्य केही नारा पनि नीति तथा कार्यक्रममा समावेश गरिएको छ।

नीति तथा कार्यक्रममा स्वदेशी श्रम स्वदेशमै पसिना, स्मार्ट कृषि गाउँ कार्यक्रम, गरौँ व्यावसायिक कृषि, यसैबाट सुरु हुन्छ प्रदेशको समृद्ध र एक स्थानीय तह एक उत्पादन जस्ता नारा समावेश गरिएको छ। यसैगरी एक निर्वाचन क्षेत्र एक औद्योगिक ग्राम, एक घर एक धारा, उज्यालो प्रदेश र जोखिमपूर्ण यात्रा बहिष्कार, हाम्रो सुरक्षाको आधार जस्ता नारा राखिएको छ।