अर्थ समाचार

पहिलो त्रैमाशमा एनसेलको नाफा एक अर्ब ७६ करोड रुपैयाँ

माउ कम्पनी एक्जिएटाको नाफामा ४० प्रतिशतको गिरावट

काठमाडौं- एनसेलले सन् २०२० को पहिलो तीन महिनामा एक अर्ब ६१ करोड रुपैयाँ नाफा आर्जन गरेको छ। गत वर्षको सन् २०१९ को पहिलो त्रैमासिक अवधिमा चार अर्ब ४६ करोड रुपैयाँ नाफा आर्जन गरेको एनसेलले जनाएको छ।

मार्चको अन्तिमसम्ममा एनसेलले १२ अर्ब तीन करोड रुपैयाँ आम्दानी गरेको छ। यस आम्दानीमा डेटातर्फको हिस्सा २२ प्रतिशत रहेको छ। एक वर्ष अगाडिको यही अवधिमा एनसेलको जम्मा आम्दानी १३ अर्ब ५२ करोड रुपैयाँ थियो।

एनसेलको सञ्चालन खर्च आम्दानीको ४१.७ प्रतिशत रहेको छ। सन् २०१९ को चौथो त्रैमासमा खर्च ५३.७ प्रतिशत थियो। कम्पनीको कुल सम्पत्ति तीन महिनाको अवधिमा १६ अर्ब ७९ करोड रुपैयाँले घटेको छ। पहिलो त्रैमासिक वित्तीय विवरणअनुसार एनसेलको खुद सम्पत्ति ७१ अर्ब १८ करोड रुपैयाँ छ। सन् २०१९ को चौथो त्रैमासिक अवधिमा ८५ अर्ब ८४ करोड रुपैयाँ थियो। यस अवधिमा कम्पनीले पुँजीगत लाभकर भुक्तानी गरेको छ।

२०७२ पुसमा युरोपको टेलियासोनेराले मलेसियाको एक्जियटालाई ऐनसेल १ खर्ब ४० अर्ब रुपैयाँमा बिक्री गरेको थियो। सम्पूर्ण कारोबारमध्ये एक्जियटाले ८० प्रतिशत सेयर किनेको थियो भने बाँकी २० प्रतिशत भावना सिंह श्रेष्ठले आफ्नो नाममा खरिद गरेकी थिइन्। उक्त कारोबारमा पुँजीगत लाभकर छल्न खोज्दा धेरै लामो समय लफडा भएको थियो। उक्त लफडा टुङ्गिसकेको छ।

एनसेलले सार्वजनिक गरेको वित्तीय विवरणअनुसार हाल एनसेलका एक करोड ७१ लाख ग्राहक छन्। जसमा तीन लाख १५ हजार पोस्टपेड र एक करोड ६८ लाख जना प्रिपेडका ग्राहक रहेका छन्। जम्मा ग्राहकमध्ये ४५.२ प्रतिशतले डेटाको प्रयोग गर्छन्।

फोर जीको विस्तारसँगै थ्रिजी प्रयोग गर्ने ग्राहकभन्दा फोर जी प्रयोग गर्ने ग्राहकको संख्या धेरै छ। पहिलो त्रैमासिक अवधिमा थ्रिजी प्रयोग गर्ने ग्राहकको संख्या ३२ लाख ८ हजार रहेका छन् भने फोर जी प्रयोगकर्ता ३२ लाख ९० हजार छन्। गत वर्षको पहिलो त्रैमासिक अवधिमा थ्रिजीका ग्राहक २९ लाख ८५ हजार थिए। तर फोर जी प्रयोगकर्ता ९ लाख ४४ हजारमात्रै थिए।

माउ कम्पनी एक्जिएटाको वित्तीय अवस्था
मलेसियन कम्पनी एक्जिएटा समूहको आम्दानी १.५ प्रतिशतले बढे पनि खुद नाफामा भने ४१.५ प्रतिशतले गिरावट आएको छ। कोभिड- १९ को सुरुवाती प्रभाव कम्पनीहरुको आम्दानी तथा मुनाफामा देखिन थालेको एक्जिएटाले जनाएको छ।

यस अवधिमा सबैभन्दा धेरै प्रभाव कम्बोडिया र इन्डनेसियाको लकडाउनले पारेको छ। यसले कम्पनीको बिक्री तथा सेवा वापतको आम्दानीमा गिरावट हुन सुरु भएको एक्जिएटाको विश्लेषण छ। एक्जिएटाले नेपालको एनसेलको आम्दानीमा पनि प्रभाव पार्न थालिसकेको जनाएको छ।

मलेसियाको सेलकमले आफ्नो उत्पादनको लन्चमा ढिलाइ गर्दा आम्दानीमा गिरावट आएको प्रतिवेदनमा उल्लेख छ। एनसेलको कोर मोबाइल सेवा बापतको आम्दानीमा ९.७ प्रतिशतले गिरावट आएको देखिएको छ।

कोभिड-१९ को प्रभावलाई न्यूनीकरण गर्न कम्पनीहरूले सामाजिक उत्तरदायित्वअन्तर्गत रहेर खर्च गरिरहेको हुँदा पनि कम्पनीको नाफामा असर गरेको हो। कोभिड-१९ को सहयोगका लागि एक्जिएटाले १५ करोड मलेसियन रिङ्गेटको कोष बनाएको छ। लकडाउनले गर्दा सिम कार्डको नयाँ प्रयोगलाई रोकेको छ। सँगसँगै कम्पनीहरुको मार्केटिङ खर्च कम भएको देखिन्छ।

सहायक कम्पनीमध्ये कसको कस्तो प्रस्तुति?
एक्जिएटाको सात सहायक कम्पनीमध्ये दुईवटा कम्पनीको गत वर्षको भन्दा नाफा घटेको छ। जसमा नेपालको एनसेल र श्रीलङ्काको डइलगको नाफामा गिरावट आएको हो। आम्दानीतर्फ सबैको सुधार हुँदा एनसेल एउटाको मात्रै गिरावट देखिएको छ।
आम्दानीको अवस्था

कर पछिको नाफा
समुहको नाफा ४०.३ प्रतिशतले घटेको छ। एक्जिएटाअन्तर्गतको इन्डोनेसियाको एक्सेल र अन्य कम्पनीको नाफा ऋणात्मक हुँदा समग्र नाफा १२ करोड १० लाख मलेसियन रिङ्गेटमा झरेको हो। गत वर्षको पहिलो त्रैमासिक अवधिमा कम्पनीको मुनाफा २० करोड ९० लाख मलेसियन रिङ्गेट थियो।

कोरोना महामारीमा एक्जिएटाका सहायक कम्पनीले दिएका छुट तथा सुविधा
मलेसियाको सेलकमले हरेक दिन बिहान ८ बजेदेखि साझ ६ बजेसम्म एक जिबीको डेटा निःशुल्क प्रदान गर्दै आएको छ। सोही अवधिका लागि ह्वाट्स एप फ्रिमा चल्ने व्यवस्था मिलाइएको छ। यस्तैगरी सम्पुर्ण सहायक कम्पनीहरु मार्फत विभिन्न निःशुल्क प्याकेट प्रदान गर्दै आएको छ।