काठमाडौं- नवगठित जनता समाजवादीका नेता राजेन्द्र महतोले सरकारले ल्याएको नीति तथा कार्यक्रमलाई नेकपाको चुनावी घोषणापत्रको संज्ञा दिँदै अहिले रामायण पढ्ने बेला नभएको बताएका छन्।
नीति तथा कार्यक्रममा वर्तमान संकटबारे उल्लेख नै नगरि महाभारत भन्दा बढी एपिसोड बनाइएको उनले संसदमा बताए। उनले सत्तापक्षको नीति तथा कार्यक्रममा धारणा राखे, ‘के बोल्ने, के नबोल्ने बडा अप्ठ्यारो छ। यो बेला जनताको रक्षा, अर्थतन्त्रको रक्षा, संकटबाट पार लाउनुपर्नेमा ध्यान केन्द्रित हुनुपर्ने हो।’
नीति तथा कार्यक्रमले विगतकै विषय उठाएर कर्मकाण्डी पारामा ल्याइएको टिप्पणी गरे। सरकारको ध्यान कुर्ची जोगाउनमै केन्द्रित भएको उनले आरोप लगाए। हलुका ढंगले नीति तथा कार्यक्रम आएको भन्दै महतोले आपत्ति जनाए।
संविधान संसोधन प्रति आवाज उठाउँदै आएको मधेशी दलको माग सुनुवाई नगरेकोमा आपत्ति जनाए। संविधानलाई मास्ने कार्य सरकारले नै गरेको आरोप लगाए। स्थायीत्वको कुरा गर्ने नेकपाले अध्यादेश ल्याएर सांसद अपहरण किन गरेको भन्दै जवाफ मागे।
आवश्यक बजेट र कर्मचारी नदिएर संघीयता कमजोर बनाउन सरकार लागेको आरोप महतोले लगाए।
कोरोना संक्रमण नियन्त्रणका नाममा सरकारले आफ्नो कर्तव्य पुरा भएको ठान्नु गलत भएको उनले बताए। उनले प्रश्न गरे, ‘जनतालाई निरोगी बनाउने कि रोगी बनाउने? जनताको लागि के गर्यो सरकारले? बकम्फुसे नारा दिएर जनताको रक्षा हुँदैन।’
सरकारले भ्रष्टचार गर्न नदिने कुरा सुगाँ रटाइ मात्रै भएको बताए। सिंचाइ पाएको छैन नपाएको जनताले वैज्ञानिक खेति गर्न नसक्ने प्रति ध्यानाकर्षण गराए। स्वदेशी वस्तुको उपभोग गर्ने नीति उत्पादन नभई कसरी हुन्छ भन्दै प्रश्न तेर्साए।
भारतले बनाएको बाटोको जानकारी भएको सरकारले नै भूमिको रक्षा नगरेको भन्दै आपत्ति जनाए। उनले भने, ‘सीमा रक्षा कसले गरिदिने हो? राजेन्द्र महतोले हो कि सरकारले?’
आफ्नो भूमिमा सडक बनाएको थाहा नपाउने सरकार राष्ट्रघाती भएको आरोपसमेत लगाए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
