काठमाडौं- भारतका विभिन्न स्थानबाट सुनौली नाकामा तीन सातासम्म अलपत्र परेका ५ सय १० नेपालीलाई स्वदेश भित्र्याइएको छ। रुपेन्देहीस्थित सिद्धार्थनगर र तिलोत्तमा नगरपालिकाले उनीहरुलाई नेपाल प्रवेश गराएका हुन्।
कोरोना संक्रमण रोकथामका लागि भारतमा जारी लकडाउनकै अवधिमा उनीहरु सुनौली नाका आइपुगेका थिए। नाकामा अलपत्र पर्नेहरुमा बालबच्चा, सुत्केरी तथा बिरामी समेत रहेका छन्।
बुधबार साँझ नेपाल प्रवेश गरेकामध्ये २ सय ३३ जनालाई तिलोत्तमा नगरपालिकाको व्यवस्थापनमा राखिएको छ। अन्यलाई सिद्धार्थ नगरपालिकाले स्थानीय विद्यालयमा राखेको छ। तिलोत्तमा नगरपालिकाले शंकरनगरस्थित शारदा उच्च मावि र मधवलियास्थित मधवलिया माध्यमिक विद्यालयमा राखिएको छ। सिद्धार्थनगर नगरपालिकाले २ सय ७७ जनालाई लिलाराम र भैरहवा माध्यमिक विद्यालयमा राख्ने व्यवस्था गरेको छ।
बुधबार ल्याइएकामध्ये ५ जना सुत्केरी भएको तिलोत्तमा नगरपालिकाका मेयर वासुदेव घिमिरेले जानकारी गराए। बच्चा, सुत्केरी, वृद्ध र अपांङलाई प्राथमिकता दिएर प्रवेश गराइएको उनले बताए। सीमा क्षेत्रमा विपतमा परेकाहरुले स्वदेश फर्कन पाउँदा ‘नेपाल आमाको जय’ नारा लगाएका थिए। त्यो सुन्दा आँसु खसेको तितो अनुभव घिमिरेले सुनाए।
भारतका विभिन्न क्षेत्रबाट साइकल र पैदल यात्रामार्फत सुनौली पुगेर अलपत्र परेकालाई नाकाबाट छिराइएको हो। चढेर समेत सुनौली नाकाबाट बुधबार साँझ ट्रकमा राखेर नेपाल उनीहरुलाई नेपाल ल्याइएको थियो। सुनौली नाका भएर नेपाल प्रवेश गर्नेहरुमा गुल्मी, अर्घाखाँची, पाल्पा, दाङ नवलपरासी, कपिलवस्तु, रुपन्देही लगायत जिल्लाका छन्।
नेपाल आएका केही श्रमिकको साइकल समेत साथमै थियो। विद्यालयमा राखिएका उनीहरुको पिसिआर परीक्षणमा नेगेटिभ नतिजा आएपछि मात्रै घर फर्काउने घिमिरेले जानकारी गराए। नगरपालिकाले क्वारेन्टाइनका बनाएका विद्यालयहरुमा उनीहरुलाई राखिएको छ।
पिसिआर परीक्षणका लागि केन्द्रबाट किट प्राप्त नभएकाले स्वास्थ्य परीक्षण सुरु गर्न नसकिएको घिमिरेले जानकारी गराए।
नेपाल प्रवेश गरेकालाई पिसिआर परीक्षण गरी नतिजा नेगेटिभ आएकालाई घरमा पठाउने दुई नगरपालिकाले जनाएका छन्। उनले भने, ‘किट आएपछि परीक्षण हुनेछ। परीक्षण नआएसम्म नगरपालिकाको खर्चमै उहाँहरु (नेपाल आएका) लाई राखिनेछ।’ नेगेटिभ नतिजा आएकालाई उनीहरुको सम्बन्धित गाउँ/नगरपालिकासँग समन्वय गरी घर फर्काउने तयारी गरिएको छ। स्वास्थ्य परीक्षण पोजेटिभ देखिए प्रदेश सरकारले व्यवस्था गरेको आइसोलेसनमा राखिने बताइएको छ।
सीमापारि रहेर लुकिछिपी नेपाल प्रवेश गर्दा जोखिम झनै बढ्ने डरले स्थानीय सरकारकै पहलमा उनीहरुलाई ल्याइएको घिमिरेले बताए। घिमिरेले भने, ‘लुकिछिपी गरेर दर्जनौं नेपाल प्रवेश गरिरहेका थिए। सहज रुपमा प्रवेश पाउँदा संक्रमण बढ्ने अवस्था कम हुने थियो।’
सुनौली नाकामा तीन साता बसेका अरु थप ५ बढी नेपाली रहेको बताइएको छ। सीमा नजिकका नगरपालिकाले उनीहरुको व्यवस्थापन गर्न नसक्ने भएपछि प्रवेश निषेध गरिएको छ। भारतमा रेल सञ्चालनमा आएकाले सुनौली नाकामा थपिने संख्यामा वृद्धि हुने आकलन गरिएको छ। प्रवेश पाएकाहरुको परीक्षण सकिएसँगै थप अन्यलाई ल्याउने तयारी गरिएको छ।
स्वाब परीक्षण गरी घर फर्काउन ५ दिनभन्दा बढी लाग्ने भएकाले अर्को समूहलाई त्यसपछि प्रवेश गराउने घिमिरेले बताए। जिल्ला सुरक्षा समिति रुपन्देहीको समन्वयमा स्वदेश फर्काउने गरिएको छ। दुई देशको विषय भएकाले प्रमुख जिल्ला अधिकारीले अग्रसरता लिएका छन्।
४० जना अट्ने गरी बुटवलमा बनाइएको आइसोलेसनको क्षमता पूरा भएको छ। थप संक्रमित देखिएमा भैरहवास्थित भीम अस्पतालमा आइसोलेसन वार्ड बनाइने भएको छ। प्रदेश सरकारले कोरोना अस्पतालको क्षमता बढाएर १०० बेडको बनाउने भएको छ। अस्पतालहरुले थेग्न नसके स्थानीय तहले समेत आइसोलेसन बनाउने गरी अघि बढेको घिमिरेले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1765782108.png)
-1764146706.png)
-1763721444.png)
-1765273665.jpg)
