काठमाडौं– अखिल नेपाल फुटबल संघ (एन्फा) को चरम लापरबाहीका कारण रुस्लान थ्रीस्टारले २०७३ कात्तिकमा एएफसी कप च्याम्पियनसिपको दोस्रो चरण खेल्ने मौका गुमाउनुपर्यो। त्यसपछि एन्फासँग चिढिएको थ्रीस्टारले फुटबल नखेल्ने घोषणा गर्यो।
एन्फाले प्रतियोगिता खेल्ने टिमको नाम एसियाली फुटबल महासंघ (एएफसी) समयसीमाभित्र नपठाइदिँदा थ्रीस्टारले सो च्याम्पियनसिप खेल्न पाएन।
एन्फाका कारण क्लबलाई अपुरणीय क्षति पुगेको बताउँदै थ्रीस्टारले उचित क्षतिपूर्ति नपाएसम्म फुटबल नखेल्ने निर्णय गरेको थियो। उसको माग थियो ६ करोड। घरेलु लिग च्याम्पियनको हैसियतले थ्रीस्टारले एएफसी क्लब च्याम्पियनसिपको मौका पाएको थियो। त्यसपछि थ्रीस्टार घरेलु फुटबलका कुनै प्रतियोगितामा सहभागी भएन।
एन्फा र क्लब पदाधिकारीबीचको लामो छलफलपछि विवाद अन्त्य भयो र सहमति अनुसार एन्फाले डेढ करोड रुपैयाँ थ्रीस्टारले दिने भयो। मंसिर १० गतेभित्र क्षतिपूर्ति बापतको रकम पाउने सम्झौता भए पनि क्लबले पूरै रकम पाइसकेको छैन।
सम्झौतापछि पुसमा धनगढीमा आयोजना भएको सुदूरपश्चिम खप्तड गोल्डकपमार्फत १४ महिनापछि थ्रीस्टार फुटबलमा फर्कियो। सो प्रतियोगितामा थ्रीस्टारको उपस्थिति राम्रो हुन नसके पनि त्यसपछि लय पक्रियो। पुसयता थ्रीस्टारले ११ प्रतियोगितामा भाग लियो जसमा उसले ८ प्रतियोगिताको फाइनलमा स्थान बनायो। ८ मध्ये ५ प्रतियोगितामा च्याम्पियन बन्दै आफ्नो छवि अनुसारको प्रदर्शन गर्यो।
थ्रीस्टारले सिजनको पहिलो उपाधिको रुपमा इटहरीमा आयोजना भएको मदन भण्डारी स्मृति इटहरी गोल्डकप जित्यो। लगत्तै बुढासुब्बा गोल्डकपको फाइनलमा पुलिसलाई हराउँदै च्याम्पियन बनेको थ्रीस्टारले निकै रफ्तार लिइसकेको छ।
थ्रीस्टारले बुटवल तिलोत्तमा गोल्डकपको उपाधि पनि जित्यो। १५ दिन बित्न नपाउँदै बुटवलमै आयोजना भएको मदन भण्डारी गोल्डकपमा मनाङ मर्स्याङ्दी क्लबलाई पराजित गरेर सिजनको चौथो उपाधिसमेत चुम्यो। सिजनको पाँचौ उपाधिका लागि यही साता विराट गोल्डकप खेल्न विराटनगर पुगेको थ्रीस्टारले उपाधि लिएरै फर्कियो। मनाङ उपविजेतामै सीमित भयो।
यसबाहेक थ्रीस्टारले आहारारा गोल्डकप, सिमरा गोल्डकप र विकास रनिङ शिल्डका लागि फाइनलसम्मको यात्रा तय गर्यो तर उपाधि जित्न सकेन। झापा गोल्डकपको सेमिफाइनलबाट बाहिरिएको थ्रीस्टारको यात्रा हेटौंडामा भएको सुमन भोम्जन स्मृति गोल्डकपमा राम्रो हुन सकेन। सिजनको पहिलो प्रतियोगिता सुदूरपश्चिम गोल्डकपमा पनि थ्रीस्टार क्वार्टरफाइनलबाट बाहिरिएको थियो।
१४ महिनापछि फुटबलमा फर्कंदा पनि राम्रो लय समाप्नुको श्रेय क्लब व्यवस्थापनलाई जाने प्रशिक्षक मेघराज केसी बताउँछन्। 'हामीले राम्रो फुटबल खेल्दाखेल्दै पनि एन्फाको लापरबाहीले ठूलो मुल्य चुकाउनुपर्यो,' केसीले नेपाल लाइभसँग भने, 'एन्फासँग असमझदारी राखे पनि फुटबलका लागि तयारी गरेका थियौं। हामीले सिरियल्सी फुटबल खेल्ने योजना बनाएका थियौं। त्यसकारण पनि राम्रो नजिता निस्किएको हो। क्लब व्यवस्थापन र खेलाडी धन्यवादका पात्र हुन्।'
गएको तीन महिनामा सुदूरपश्चिमदेखि सुदुरपूर्वका जिल्लामा फुटबल प्रशिक्षक भएर पुगेका केसी क्लबको सफलतामा जति खुसी छन् त्यति दु:खी एन्फा नेतृत्वको कार्यशैलीप्रति छन्।
मोफसलका प्रतियोगिताले मात्र नेपाली फुटबलको विकास नहुने उनी बताउँछन्। 'मोफसलमा फुटबलमा प्रतियोगिता हुनु राम्रो हो। तर, यसको विकासको मेरुदण्ड लिग नै हो,' केसी तर्क गर्छन्, 'मोफसलका प्रतियोगिता भोक लागेको मान्छेलाई तत्काल पेट भर्न दिएको खाना जस्तै हो। लिग चाहिँ शरीरलाई तन्दुरुस्त राख्न पौस्टिक आहार जस्तै।'
लिग नहुँदा नेपाली फुटबल शून्यतामा पुगेको समेत उनले दुखेसो पोखे। 'एन्फा नेतृत्वले क्यालेन्डर बनाएर काम नगर्दा नेपाली फुटबल जिरो अवस्थामा पुगेको छ,' उनको चेतावनी छ, 'बिगार्नेको पनि हद हुन्छ। हद पार गरेपछि त्यो आफै माथि खनिन्छ भन्ने कुरा एन्फा नेतृत्वले बुझ्नुपर्छ।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791562069.png)
-1786602170.png)
