लकडाउन उल्लंघन गर्नेमाथि कडा हुँदै ट्राफिक [फोटो फिचर]

कोरोना अपडेट

लकडाउन उल्लंघन गर्नेमाथि कडा हुँदै ट्राफिक [फोटो फिचर]२ बजेसम्म ८ सय १४ सवारी नियन्त्रणमा

ऋग्वेद शर्मा/शिव बोहरा मंगलबार, वैशाख १६, २०७७ १४:३७

काठमाडौं- सरकारले घोषणा गरेको लकडाउन उल्लंघन गरेर अनावश्यक रूपमा सडकमा निस्कने सवारीसाधनलाई ट्राफिक प्रहरीले निगरानी कडा गरेको छ। सोमबार गृहमन्त्रालयले लकडाउनलाई पथ कडा गर्न निर्देशन दिएसँगै ट्राफिक प्रहरीले उपत्यकाका विभिन्न स्थानबाट सवारी नियन्त्रणमा लिएको छ।

मंगलबार दिउँसो २ बजेसम्ममा नै उपत्यकाका विभिन्न स्थानबाट महानगरीय ट्राफिक प्रहरी महाशाखाले ८ सय १४ वटा सवारीसाधन नियन्त्रणमा लिएको जनाएको छ। त्यसमध्ये ७ सय ७१ वटा दुईपांग्रे र ९३ वटा चारपांग्रे सवारी रहेका छन्।

सोमबार दिनभरमा महाशाखाले ४ सय ७९ वटा दुईपांग्रे र ५८ वटा चारपांग्रे गरि ५ सय ३७ वटा सवारी नियन्त्राणमा लिएको थियो। सोमबारको तुलनामा मंगलबार २ बजेसम्ममा लकडाउन उल्लंघन गर्ने सवारीको संख्या २ सय ७७ वटा बढी हो।

कोरोना भाइरसबाट विश्वव्यापी महामारी फैलिएपछि नेपालमा हुने सम्भावित जोखिम रोक्न सरकारले चैत ११ गते बिहान ६ बजेदेखि लागू हुने गरी देशव्यापी रूपमा लकडाउन गरेको छ। लकडाउन बैशाख २५ गतेसम्मका लागि लम्ब्याइएको छ।

महानगरीय ट्राफिक प्रहरीले लकडाउन उल्लंघन गर्ने सवारी साधनहरूलाई नियन्त्रणमा लिएको र आगामी दिनमा बाहिर ननिस्कने प्रतिबद्धतासहित सोही दिन बेलुका उक्त सवारीसाधन छाड्ने गरिएको महानगरीय ट्राफिक प्रहरी महाशाखाका प्रवक्ता जीवनकुमार श्रेष्ठले जानकारी दिए।

‘लकडाउन एउटा व्यक्ति वा समूहको फाइदाको लागि गरिएको नभएर तपाईं हामी सम्पुर्णको सुरक्षाको लागि हो, यसको पूर्णपालना गर्न तथा उच्च सुरक्षा सतर्कता अपनाउनपर्छ,’ श्रेष्ठले भने, ‘अत्यावश्यक सेवाका, पास भएका र व्यवहारिक कठिनाइ भएकालाई अवस्था हेरेर जान दिएका छौं। त्यस बाहेककालाई भने नियन्त्रणमा लिइएको छ।

ट्राफिक प्रहरीले लकडाउन उल्लंघन गरेर सवारी चलाउनलेलाई जहाँबाट नियन्त्रणमा लिइएको हो त्यही राख्ने र सवारीको साँचोसमेत सवारी धनीलाई नै दिएर पठाउने गरेको छ। नियन्त्रणमा लिइएका सवारी साँझ ६÷७ बजेट रजिस्टरमा बुझिलिएको दस्तखत गराएर मात्र छाड्ने गरिएको प्रवक्ता श्रेष्ठको भनाइ छ।

ट्राफिक प्रहरीले पास भएर पनि शान देखाउँदै घुम्न निस्कने, तीव्र गतिमा कुदाउने, एक व्यक्तिको नाममा भएको पास अर्को व्यक्तिलाई दिने उपर महाशाखाले विशेष निगरानी गरेको जनाएको छ। मंगलबार दिउँसो साढे १ बजे सिंहदरबार पश्चिमी गेट अघि लकडाउन उल्लंघन गर्ने २ सय भन्दा बढी सवारीसाधन नियन्त्रणमा रहेका छन्।

ट्राफिक प्रहरीले बैंकका कर्मचारी, विरामीलाई खाना लिएर हिँडेका कुरुवालगायत व्यवहारिक कठिनाइ भएकालाई भने पास बेगर समेत छाडि दिने गरेको छ। तर बहाना पारेर सवारी लिएर हिँडेकालाई भने सवारी नियन्त्रणमा लिएर साँझमात्र छाड्ने गरेको प्रवक्ता श्रेष्ठले जानकारी दिए।