काठमाडौं- आफ्नो पार्टीका सांसद डा सुरेन्द्र यादवलाई अपहरण गरिएको भन्दै आएका समाजवादी पार्टीका संघीय परिषद् अध्यक्ष डा बाबुराम भट्टराईले सरकारले कानुनी राज्य र नागरिकको जीवन रक्षा गर्ने सम्बन्धमा प्रश्न उठाएका छन्।
आइतबार सांसद् अपहरण प्रकरणमा संलग्नमाथि कारबाही माग गर्दै किटानी जाहेरी गर्न पुगेका डा भट्टराईसहितको टोलीले दर्ता गराउन लागेको किटानी जाहेरी दर्ता नगरेपछि यस्तो प्रश्न उठाएका हुन्।
समाजवादी पार्टीका अध्यक्ष, उपेन्द्र यादव, संघीय परिषद् अध्यक्ष डा बाबुराम भट्टराई, र नेताहरू राजेन्द्र श्रेष्ठ, हिसिला यमी अशोक राई किटानी जाहेरी दर्ता गराउन प्रहरी परिसर टेकु पुगेका थिए। उनीहरूसँगै राजपाका तर्फबाट राजेन्द्र महतोलगायतका नेता निवेदन लिएर टेकु पुगेका हुन्। समाजवादी पार्टीले पूर्व आइजिपी सर्वेन्द्र खनाल, सांसदहरू किसन श्रेष्ठ र महेशबस्नेत विरुद्ध कारबाहीको माग गर्दै प्रहरीमा उजुरी दिन पुगेका थिए।
पूर्वस्वास्थ्य राज्यमन्त्री डा यादव घरमै रहेको अवस्थामा नेपाल प्रहरीका पूर्व आइजिपी सर्वेन्द्र खनाल, सांसद्हरू बस्नेत र श्रेष्ठसमेतको टोलीले महोत्तरीबाट गाडीमा राखेर प्रधानमन्त्री निवास बालुवाटार पुर्याएका थिए।
समाजवादी पार्टी फुटाउन लक्षित गरी आफ्ना पार्टीका सांसद् अपहरण गर्नेविरुद्ध कारबाहीको माग गर्दै दुवै पार्टीका नेताहरूले उजुरी दर्ता गराउने तयारी गरेका थिए। तर प्रहरीले सो किटानी जाहेरीसहितको उजुरी दर्ता गराउन नमानेपछि चर्काचर्की भएको बुझिएको छ।
'यत्रो देशविदेश तरंगित गराइरहेको सांसद अपहरणसम्बन्धी मुद्दा पीडित व्यक्तिले महानगरीय प्रहरी परिसर काठमाण्डौमा समयभित्र विधिसम्मत ढंगले जाहेरी दिन लाग्दा दर्ता गर्न इन्कार गरिन्छ भने ओलीतन्त्रमा कानूनको शासन कायम हुन्छ र नागरिकको जीवनरक्षा हुन्छ भनेर कसरी विश्वास गर्ने?,' उनले प्रश्न गरेका छन्।
समाजवादी पार्टीका नेता विश्वदीप पाण्डेले प्रहरीले जाहेरी लिन नमानेको पुष्टि गरिसकेका छन्। 'एसपी र डीएसपीले जाहेरी दिने यहाँ हैन महोत्तरी जाऊ भनिरहेका छन्! जबकि कानुनले नजिकको प्रहरी र यथाशीघ्र समयमा जाहेरी गर्ने भनेको छ। प्रहरी परिसर टेकुमा एसएसपी गायब। अहिले जाहेरी लिन नमानेको अवस्था छ। कानूनभन्दा माथि ओली सरकार?,' पाण्डेले ट्विटरमा लेखेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1700407943.jpg)
