भैरहवा- लकडाउनको समयमा कृषि उपज बिक्रीका लागि रुपन्देहीको जनउत्थान बचत तथा ऋण सहकारी संस्था रुपन्देहीले भैरहवामा सुरु गरेको कृषि एम्बुलेन्समा उपभोक्ताहरुको आकर्षण बढ्दै गएको छ। कृषि एम्बुलेन्सबाट तरकारी खरिद गर्ने उपभोक्ताको संख्या दिनप्रति दिन बढ्दै गएको छ।
कडा परिश्रम तथा मेहनतका बाबजुद किसानले उत्पादन गरेका तरकारीको मूल्य नपाउने र उपभोक्ताले पनि बढी मुल्य तिर्नुपर्ने बाध्यता थियो। अझ लकडाउनको समयमा किसानको तरकारी बिक्री नभएर उत्पादन भएकै स्थानमा कुहिने र नेपाली उपभोक्ताहरुले पनि भारतीय तरकारी प्रयोग गर्न बाध्य थिए। तर अहिले भने किसानले उत्पादन गरेका तरकारीको मूल्य पाउने र उपभोक्ताले पनि सुपथ मूल्यमा ताजा हरियो तरकारी पाइरहेका छन्।
प्रदेश ५ सरकारको भूमिव्यवस्था, कृषि तथा सहकारी मन्त्रालयको सहयोगमा कृषि एम्बुलेन्स सुरु भएको हो। कृषकले उत्पादन गरेका तरकारी त्यत्तिकै खेर जाने अवस्थामा कृषि मन्त्रालय तथा सिद्धार्थनगर नगरपालिकाको सहयोगमा जनउत्थान सहकारीले अगुवाइ गरेर सुपथ मूल्यमा उपभोक्ताहरुलाई तरकारी बिक्री गर्न थालेको हो। टोलटोलमै उपभोक्ताले आवश्यक पर्ने ताजा हरियो तरकारी पाएपछि उनीहरु अहिले निकै खुसी छन्।
सिद्धार्थनगर नगरपालिकालाई केन्द्रित गरेर लकडाउनको बेला भारतबाट तरकारीको आयात रोकियोस् र स्वदेशमै कृषकले उत्पादन गरेको तरकारी खेर जान नपाओस् भन्ने उद्देश्यले कृषक र उपभोक्ताबीच जनउत्थानले पुलको काम गरेको अध्यक्ष ज्ञानु पौड्यालले बताइन्। उनले प्रदेश ५ सरकारको भुमिव्यवस्था, कृषि तथा सहकारी मन्त्रालय र सिद्धार्थनगर नगरपालिकाको सहकार्य एवं सहयोगमा जनउत्थान सहकारीले अगुवाइ गरेर सिद्धार्थनगरभित्र दैनिक कम्तीमा चारवटा टोलमा कृषि एम्बुलेन्सले सेवा दिइरहेको बताइन्। ‘ताजा तथा हरियो तरकारी कृषककै मूल्यमा उपलब्ध गराउने र कृषक/उपभोक्ताबीच सहजीकरण भएको अवस्थामा उपभोक्ताहरु खुसी हुनुहुन्छ’, उनले भनिन्।
दिनहुँ तरकारी किन्ने उपभोक्ताको उत्साहपूर्वक सहभागिता बढेको उनको भनाइ छ। हालसम्म सिद्धार्थनगरका ६ हजार बढी उपभोक्तालाई कृषि एम्बुलन्सले सेवा पुर्याइसकेको पौड्यालले जानकारी दिइन्।
लकडाउनको अवधिमा कोरोना भाइरसको संक्रमण फैलिन नदिन पोषणयुक्त खानेकुरा एकदम महत्वपूर्ण भएकोले रोगसँग लड्ने क्षमता बढाउन पनि हरियो तथा ताजा तरकारीले ठूलो भूमिका खेल्ने पौड्यालको भनाइ छ। पैसा हुँदाहुँदै पनि सहज रुपमा तरकारीको उपलब्धता हुन नसकेको अवस्थामा टोलमै तरकारी पाएर उपभोक्ता पनि खुसी भएको उनले बताइन्। यो कार्यले कृषिको बजारीकरणमा पनि सहयोग पुर्याएको उनको दाबी छ।
सहकारीले भैरहवामा प्रत्येक टोल–टोलमा तरकारी बिक्री केन्द्र र र समय तोकेर भीड नहुने गरी तरकारी बिक्री गर्ने व्यवस्था गरेको सहकारीका व्यवस्थापक रन बहादुर थापाले बताए।
प्रदेश ५ सरकारका भूमिव्यवस्था, कृषि तथा सहकारी मन्त्री आरती पौडेलले कृषि एम्बुलेन्समार्फत किसानका उत्पादन निर्वाध बजारसम्म पुग्ने र उपभोक्ताले सुपथ मूल्यमा पाउने बताइन्। बाटोमा कहीँ रोकटोक नहोस् र किसानको उत्पादन सहज रुपमा उपभोक्ता माझ पुगोस् भन्ने उद्देश्यले यो कार्यको थालनी गरिएको उनले बताइन्। ‘किसानले मुस्किलले उत्पादन गरेका वस्तु, यो बेला पनि किसानसँग सस्तोमा किनेर बढी मुल्यमा विक्री गर्ने प्रवृत्ति छ। यो रोक्न पनि कृषि एम्बुलेन्सले सहयोग गर्छ’, उनले भनिन्।
वितरण प्रणालीमा भैरहवामा जनउत्थान सहकारीले सहयोग गरेको उनले बताइन्। कृषकले उत्पादन गरेका उत्पादन उपभोक्ता समक्ष ल्याउन सहकारीको महत्वपूर्ण भूमिका रहने उनको भनाइ छ।
सिद्धार्थनगर नगरपालिकाका प्रमुख हरि प्रसाद अधिकारीले कृषि एम्बुलेन्स सञ्चालनले किसान र नगरबासी दुवै लाभान्वित हुने बताए।
कृषि एम्बुलेन्समा तरकारी किन्न आएका सिद्धार्थनगर नगरपालिका वडा नम्बर ८ का नेत्र बहादुर कोइरालाले जनउत्थान सहकारीले गरेको काम सराहनीय भएको बताए। उनले कृषि एम्बुलेन्समार्फत लकडाउनको बेला पनि नागरिकले सुपथ मूल्यमा ताजा तरकारी पाएको बताए। ‘बजारको मूल्यभन्दा धेरै सस्तो र अर्गानिक तरकारी पाएका छौं। मानिसको स्वास्थ्यमा समेत यसले फाइदा पुर्याउँछ’, उनले भने।
अर्का उपभोक्ता सुरेश बेल्बासेले हालसम्म राहत नपाएका अवस्थामा कृषि एम्बुलेन्सले राहतकै काम गरेको बताए। त्यस्तै तरकारी खरlद गर्न आएकी गीता गौतमले पनि सस्तोमा तरकारी किन्न पाउँदा साह्रै खुसी लागेको बताइन्। सिद्धार्थनगर नगरपालिका वडा नम्बर १२ का वडा सदस्य सरोज ठकुरीले पनि लकडाउनको बेला टोलटोलमै सहज तरिकाले तरकारी उपलब्ध गराउने कार्य प्रशंसनीय भएको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751793737.png)
-1749826086.png)
