काठमाडौं– संगीता राईले ४८ केजी तौल समूहमा १२ बर्ष पुरानो कीर्तिमानलाई भंग गर्दै आफ्नो नाममा नयाँ राष्ट्रिय किर्तिमान कायम गर्न सफल भएकी छिन्। उनले प्रथम अन्तरक्लब राष्ट्रिय भारोत्तोलन प्रतियोगिताका दौरान उक्त कीर्तिमान भंग गरेकी हुन्।
नेपाल पुलिस क्लबकी संगीताले सिनियरतर्फ स्नाच र कुलमा नीता थापाले २०६२ सालमा काठमाडौंमा भएको ३५ औं युवराज जन्मोत्सव कपमा राखेको ५३.५ र ११८.५ केजी तौल लाई भंग गर्दै ५४ र १२३ केजीको नयाँ कीर्तिमान राखिन । यस्तै संगिताले क्लिन एण्ड जर्कमा पनि आफ्नै नाममा रहेको ६६ केजी तौलमा सुधार गर्दै ६९ केजीका साथ नयाँ कीर्तिमान राखिन्। उनले दोश्रो लिफ्टमानै कीर्तिमानलाई सुधार गर्दै ६७ केजीको किर्तिमान राखेकी थिईन्। तेश्रो लिफ्टमा उनले पुन ६९ केजी भार बहन गर्नै नयाँ राष्ट्रिय कीर्तिमान कायम गरिन्। यस स्पर्धामा नेपाली सेनाका मनीषा रानाभाटले कुलमा ११६ केजीका साथ रजत र रिता गुरुङ्गले ९३ केजीका साथ कास्य पाए ।
४८ केजी तौलकै जुनियर तर्फको प्रतिस्पर्धामा ग्यालेक्सी फिटनेशकी करिना चौधरीले कुलमा ९३ केजी भारबहनका साथ स्वर्ण हात। डिभाईन फिजिकल फिटनेशकी पल्लभी चौधरीले ७३ केजीका साथ रजत र ग्यालेक्सीकै राधा भुजेलले ३५ केजीका साथ कास्य पाईन् ।
प्रतियोगिताको पहिलो दिन महिला तर्फ ८ राष्ट्रिय कीर्तिमान कायम भएका छन्। महिला तर्फकै सिनियर ५३ केजी तौलमा नेपाल प्रहरी क्लबकी देवीकुमारी चौधरीले स्नाचमा ६५ केजीको नयाँ कीर्तिमान राखिन् । उनले सञ्जु चौधरीले यसै वर्ष पोखरामा सम्पन्न २३ औं पुरुष तथा ८ औं महिला राष्ट्रिय भारोत्तोलन च्याम्पियनसिपमा राखेको ६३ केजी तौलको कीर्तिमान भंग गरेकी थिइन्। चौधरीले कुलमा १४५ केजी भार बहन गर्दै स्वर्ण पाईन्। दोश्रो स्थानमा रहेकी खर्साल युथ क्लबकी सरस्वती चौधरीले ८५ केजी तौलका साथ रजत पाईन् ।
यसै स्पर्धाको जुनियर तर्फ ओम फिटनेश तथा अर्डर सप्लायर्सकी संजु चौधरीले तीन किर्तिमान राखिन्। उनले पोखरामा भएको २३ औं पुरुष तथा ८ औं महिला राष्ट्रिय भारोत्तोलन च्याम्पियनसिपमा स्नाचमा राखेको ६३ केजी, स्नाचको ८२ केजी र कुलको १४५ केजीमा सुधार गर्दै ६४, ८४ र १४८ को नयाँ कीर्तिमान रचिन् ।
महिलाको ५८ केजी तौलमा स्पोर्टस् हाईवका शितल घिमिरेले स्वर्ण ६६ केजीका साथ स्वर्ण पाईन्। यस्तै जुनियर तर्फ खर्साल युथ क्लबकी काजल यादवले ९७ केजीका साथ स्वर्ण र वीरगंज युनाईटेडकी रविना बस्नेतले ९० केजीका साथ रजत पाईन् ।
ललितपुरस्थित स्पोर्टस् हाईवमा भएको प्रतियोगिताको पुरुष ५६ केजी सिनियर तर्फको प्रतिस्पर्धामा नेपाली सेनाका तुलाराम महतोले १८२ केजीका साथ स्वर्ण पाए। सेनाकै सन्तोष थपलियाले १६५ केजीका साथ रजत र वीरगंज फिजिकल फिटनेशका अशोक कुमार शाहले १२५ केजीका साथ कास्य पाए। यसै स्पर्धाको जुनियर तर्फ खर्साल युथ क्लबका राम कुमार यादवले १८१ तौलका साथ स्वर्ण पाए। खर्सालकै लालबाबु पासवानले १५३ केजीका साथ रजत र वीरगंज युनाईटेडका राजा शाह कानुले १३५ केजीका साथ कास्य पाए ।
पुरुषकै ६२ केजी तौलमा नेपाली सेनाका राजु चौधरीले कुल २१० केजी तौल भार बहन गर्दै स्वर्ण हात पारे। दोश्रो स्थानमा रहेका नेपाल प्रहरीका मुई लामाले २०१ केजीका साथ रजत र एपिएफ क्लबका सुभाष कुमार साहले १६५ केजीका साथ कास्य पाए । जुनियर तर्फ खस्र्याल युथ क्लबका रमेश झाले १६० केजीका साथ स्वर्ण, डिभाईन फिजिकल फिटनेशका गणेश रानाभाटले १५६ केजीका साथ रजत र वीरगंज युनाईटेडका सजरुद्धिन आलमले १५० केजीका साथ कास्य पाए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791562069.png)
-1786602170.png)
