काठमाडौं- राष्ट्रिय जनता पार्टी र समाजवादी पार्टीबीच भोलि नै एकता हुने गरी छलफल अघि बढेको छ।
नेपाल कम्युनिस्ट पार्टी (नेकपा) नेतृत्वको सरकारले दल फुटाउन सहज हुने गरी खुकुलो प्रावधान राख्दै अध्यादेश ल्याएपछि राजपा र समाजवादी फुट्ने चर्चा चलिरहेको थियो। प्रधानमन्त्री स्वयंले मन्त्रिपरिषद् बैठक र पार्टीको सचिवालय बैठकमा ती दललाई संकेत गर्दै अध्यादेश ल्याउनुपरेको बताएका थिए। त्यसलाई चिर्न दुवै दलका शीर्ष नेताहरुले एकताको कसरत गरेका हुन्।
एकतालाई अन्तिम रुप दिन अहिले राजेन्द्र महतोको निवासमा दुई पार्टीको बैठक चलिरहेको छ। बैठक चलिरहेको विषयमा दुवै पार्टीका केही नेताहरुले नेपाल लाइभलाई पुष्टि गरेका छन्। उनीहरुका अनुसार, भोलि दिउँसो एकता घोषणा गर्ने तयारी भइरहेको छ। ‘परिस्थिति अहिले जस्तै रहिरहेमा भोलि एकता हुन्छ’, समाजवादीका एक नेताले बताए।
जारी बैठकमा राजपाका तर्फबाट अध्यक्षहरु महन्थ ठाकुर, राजेन्द्र महतो, शरतसिंह भण्डारी, महासचिव केशव झा सहभागी छन्। त्यस्तै, समाजवादीका तर्फबाट संघीय परिषद् अध्यक्ष डा बाबुराम भट्टराई, केन्द्रीय अध्यक्ष उपेन्द्र यादव, वरिष्ठ अध्यक्ष अशोक राई र सहअध्यक्ष राजेन्द्र श्रेष्ठ सहभागी भएको बुझिएको छ।
आजै राति अबेरसम्म बसेर भए पनि एकताका सबै कुरा टुंग्याउने प्रयास भइरहेको बताइएको छ।
राज्य नै लागेर पार्टी फुटाउने प्रयास गरेको भन्दै डा भट्टराई विशेष सक्रिय भएका थिए। उनले राजपाका नेताहरुसँग पटकपटक कुरा गरेका थिए। साथै, उपेन्द्र यादव र राजपाका केही नेताबीच रहेको तिक्त सम्बन्धलाई पनि सहज बनाएका थिए। भट्टराईले नेकपामा रहेका पूर्व माओवादीका केही नेतासँग पनि गोप्य छलफल गरेको बुझिएको छ।
एकतासँगै दुवै पार्टीका केही नेताले पार्टी छाड्ने पनि बुझिएको छ। समाजवादीका वरिष्ठ अध्यक्ष अशोक राईले यसबीचमा राष्ट्रपतिसँग तीन पटक भेटिसकेको र उनी नेकपामा प्रवेश गर्ने लगभग टुंगो लागिसकेको पाटी स्रोतले बताएको छ। उनीसँग सहअध्यक्ष राजेन्द्र श्रेष्ठ, उपाध्यक्ष रेणु यादव तथा सचिव इस्तियाक राई लगायत पनि नेकपा प्रवेश गर्ने सम्भावना उच्च रहेको स्रोतको दाबी छ।
एकतासँगै राजपाबाट राजकिशोर यादव, अनिल झा र उनीहरु निकटका नेताहरुले पनि पार्टी छाड्ने बताइएको छ।
प्रतिनिधिसभामा अहिले राजपा र समाजवादी दुवैको १७/१७ सिट छ। राष्ट्रियसभामा राजपाका २ र समाजवादीको १ सिट छ।
प्रदेश २ मा समाजवादी पार्टीको नेतृत्वमा दुई पार्टीको संयुक्त सरकार छ। कुल १ सय ७ सिटमध्ये समाजवादीको ३० र राजपाको २५ सिट छ।
मधेस केन्द्रित राजनीति गरिरहेका विभिन्न ६ दल मिलेर २०७४ बैशाख ७ गते राजपा गठन भएको थियो। त्यस्तै, संघीय समाजवादी फोरम र नयाँ शक्ति मिलेर गत बैशाख २३ गते समाजवादी पार्टी गठन भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
