काठमाडौं- सरकारले कोरोनाका कारण ज्यान गुमाएका नेपाली श्रमिकहरुको सम्बन्धित गन्तव्य मुलुकमै दाहसंस्कारको व्यवस्था गर्ने भएको छ। कोरोना सरुवा रोग भएका कारण यो रोग लागि ज्यान गुमाएका श्रमिकहरुको उतै दाहसंस्कार गर्ने व्यवस्था मिलाउन सरकारले परराष्ट्र मन्त्रालयमार्फत सम्बन्धित दूतावासमा पत्राचार गरिसकेको छ।
ओमानका लागि नेपाली राजदूत सर्मिला ढकाल पराजुली भन्छिन, ‘मृतकका आफन्तहरुसँग समन्वय गरी कोरोनाका कारण ज्यान गुमाएकाहरुको दाहसंस्कार सम्बन्धीत मुलुकमै गर्न भनेर सरकारले हामीलाई पत्र पठाएको छ। ओमानमा भने अहिले कोरोनका कारण कोही पनि नेपालीलाई कोरोना पुष्टि भएको छैन। यो सुखद् कुरा हो।’
कोरोना बाहेक अन्य कारणले ज्यान गुमाएर शव अलपत्र परेको अवस्थामा नरहेको राजदूत ढकालको भनाइ छ।
बहराइनका लागि नेपाली राजदूत पदम सुन्दास पनि सरकारले कोरोनका कारण ज्यान गुमाएकाहरुको जहाँ ज्यान गुमाएको हो त्यहीँ अन्त्येष्टि गरिने गरी परिवार तथा त्यहाँको सरकारसँग समन्वय भइरहेको बताउँछन्।
राजदूत सुन्दास भन्छन्, ‘अन्य विभिन्न कारणले ज्यान गुमाएकाहरुको शवहरुको पनि परिवारले यहिँ सम्बन्धित मुलुकमै अन्त्येष्टि गर्न इच्छुक हुनुभयो भने यही हुन्छ। नेपाल ल्याएरै अन्त्येष्टि गर्ने इच्छा राख्नुभयो भने लकडाउनपछि सुरक्षित रुपमा नेपाल पठाइनेछ।’
कोरोनाका कारण २८ नेपालीले गुमाए ज्यान
विदेशमा कोरोनाका कारण २८ जना नेपालीले ज्यान गुमाएका छन्। गैह्रआवासीय नेपाली संघ (एनआरएनए)को कोभिड(१९ उच्चस्तरीय समितिअन्तर्गतको स्वास्थ्य समितिले संकलन गरेको तथ्यांकअनुसार बेलायतमा १७, अमेरिकामा ८, युएईमा २ र आयरल्याण्डमा १ गरी २८ नेपालीको ज्यान गएको हो।
अन्य कारणले ज्यान गुमाएका ८० भन्दा बढी शव अलपत्र
मलेसिया, खाडीलगायतका मुलुकमा कोरोना बाहेक अन्य विभिन्न कारणले ज्यान गुमाएका ८० भन्दा बढी शव अलपत्र अवस्थामा छन्। ती शव आफन्तहरुसँग समन्वय गरेर आफन्तहरुले सहमति दिएमा विदेशमै दाहसंस्कार गर्ने र आफन्तहरु असहमत भए लकडाउनपछि स्वदेश ल्याइने श्रम मन्त्रालयले जनाएको छ।
यो विषय संवेदनशील विषय भएकाले सरकारले शव व्यवस्थापनका सम्बन्धमा गम्भीर छलफल गरिरहेको श्रम मन्त्रालयका सहसचिव सुमन घिमिरेले बताए।
‘अहिले सबै अन्तर्राष्ट्रिय उडानहरु बन्द छन्। शव ल्याइदेऊ भन्दा पनि विदेशबाट शव ल्याइदिने अवस्था पनि छैन। लकडाउन खुलेपछि कोरोना बाहेक अन्य कारणले ज्यान गुमाएकाहरुको शव ल्याइन्छ‚’ सहसचिव घिमिरेले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
