काठमाडौं- संस्कृति, पर्यटन तथा नागरिक उड्डयन मन्त्रालयले पनि आगामी आर्थिक वर्ष २०७७/०७८ को बजेटमा विषयकेन्द्रित रहेर प्राथमिकता क्षेत्र तथा नयाँ कार्यक्रमको विषयमा छलफल सुरु गरेको छ।
बजेट छलफलसँगै मन्त्रालयले पर्यटन क्षेत्रको विकास र कोरोनाबाट परेको समस्या समाधान गर्दै रिकभरका लागि आवश्यक प्याकेजका विषयमा समेत छलफल सुरु भएको सचिव केदारबहादुर अधिकारीले जनाकारी दिए।
‘आगामी वर्षका लागि मन्त्रालयको बजेट कति हुने भनेर अहिले नै भन्न सक्ने अवस्था छैन,’ उनले भने, ‘मन्त्रालयले अहिले बजेट छलफल र पर्यटन उद्योगका लागि दिने प्याकेजको विषयमा छलफलमा गरिरहेको छ।’
बजेट छलफल र प्याकेजको विषय दुवै फरक हुनेसमेत अधिकारी बताउँछन्। बजेटभित्र प्याकेज समावेश नहुने र बजेटमा साधरण त विकास निर्माणका विषयहरु प्रमुख प्राथमिकतामा रहने अधिकारीको भनाइ छ।
आगामी आर्थिक वर्षको बजेटमा मन्त्रालयले निर्माणको चरणमा रहेको मन्त्रालयअन्तर्गत राष्ट्रिय गौरवको आयोजनाहरुको काम समयमै सक्ने गरी अगाडि बढ्ने र त्यसका लागि आवश्यक रकमको व्यवस्थापन हुने उनले बताए।
‘निर्माणको तयारी भइरहेको निजगढ अन्तर्राष्ट्रिय विमानस्थलको विषय अदालतमा रहेका कारण धेरै कुरा गर्न सक्ने अवस्था छैन,’ सचिव अधिकारीले भने, ‘यो नियमित प्रक्रियामा नरम हिसाबले नै अगाडि बढिनेछ।’ गौतम बुद्ध अन्तर्राष्ट्रिय विमानस्थलको हकमा भने निमार्ण सम्पन्न गर्ने र सञ्चालनमा ल्याउने गरी मन्त्रालयले तयारी गरेको छ।
‘गौतम बुद्ध अन्तर्राष्ट्रिय विमानस्थल निर्माणमा कोराेनाका कारण केही ढिला भएको छ। लकडाउन खुलको २ महिनामा मोटामोटी काम सम्पन्न हुने अवस्थामा छ। जसका कारणले यो विमानस्थल सञ्चालनको विषय प्राथमिकतामा पर्छ,’ उनले भने।
पोखरा क्षेत्रीय विमानस्थलमा पनि केही मात्रामा काम भइरहेको छ। जसका कारण निर्धारित समयभन्दा ६ महिना अगाडि नै सम्पन्न हुने अवस्थामा भएका कारण अझै पनि तोकिएकै समयमा सम्पन्न गर्ने सक्छौं भने आशामा आफूहरु रहेको र सोही अनुसार बजेट व्यवस्थापन हुने अधिकारीले नेपाललाइभसँग बताए। यसको निर्माण सम्पन्न हुने समय २०२१ को जुलाई रहेको छ।
त्रिभुवन अन्तर्राष्ट्रिय विमानस्थलको हकमा भने प्यारालल ट्याक्सी वे निर्माणको काम थालनी गर्ने गरी यो विषय नयाँ बजेटमा राख्ने तयारी भएको उनले जानकारी दिए। त्रिभुवन अन्तर्राष्ट्रिय विमानस्थलभित्र केही भवन तथा संरचना थप्ने विषयमा पनि छलफल भएको छ। 'केही भवनहरु निर्माण हुन सक्छ, त्यसमा अन्तर्राष्ट्रिय टर्मिनल भवनको विषय पनि छ,' उनले भने। तर, धेरै ठूलो विकास निर्माणको विषय बजेमा पर्ने सम्भावन कम रहेको उनको भनाइ छ।
‘प्याकेजको विषयमा भने अर्थ मन्त्रालयमा पठाएको छौं। सुहलियत दरको ऋण र पुनर्कर्जाको विषयमा पनि त्यसमा रहेको छ। त्यसमा अर्थ मन्त्रालयले के गर्छ,’ उनले भने।
तर अहिले हामीलाई पर्यटनको क्षेत्रमा दुईवटा ठूलो समस्या खडा भएको छ। जसमा नेपाल वायुसेवा निगमको व्यवसाय विस्तारको योजना पनि नयाँ बजेटमा समावेश हुने अधिकारी बताउँछन्। निगमलाई जहाज थप्न दिनेदेखि अहिलेका कार्यकारी अध्यक्षलाई सहयोग गर्ने विषय पनि प्रमुख प्राथमिकतामा रहेको उनले बताए।
उनका अनुसार होटल क्षेत्रलाई माथि उठाउन मन्त्रालयले नयाँ कार्यत्रमको रुपमा पर्यटन बिदाको अवधारणालाई अगाडि सार्न खोजेको छ। यसका आन्तरिक पर्यटन प्रवर्द्धनका लागि सरकारी तथा गैरसरकारी कर्मचारीका लागि १५ दिन वा एक महिना पर्यटन बिदा दिने र अनिवार्यरुपमा घुम्न जानुपर्ने गरी केही विषय आउने अधिकारी बताउँछन्। त्यसमा एक महिनाको सेवा तलब दिने गरी सिफारिस भएको छ। मन्त्रालयले योसँगै पर्यटन विभागमार्फत् पनि ६ वटा प्याकेजको विषयमा पनि छलफल गरिरहेको अधिकारी बताउँछन्।
एउटा रोजगारीका लागि सस्तो ब्याजमा ऋण व्यवस्था गर्ने विषयमा रहेको उनले बताए। जसमा विना २० देखि २५ लाख रुपैयाँसम्मको ऋण दिनुपर्ने विषय छ। साथै सहुलियत दरमा पुनर्कर्जाको प्याकेजमा पनि छलफल भइरहेको र ब्याज छुट, भाडामा छुटको विषय पनि अगाडि सारिएको अधिकारीले बताए। साथै हिमाल आरोहणको शूल्क घटाउने विषय पनि प्राथमिकतामा रहेको उनले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
