काठमाडौं- कोरोना भाइरसको खासै प्रभाव नरहेको फागुन महिनामा मूल्यवृद्धि औषतमा ६.५ प्रतिशत रहेको नेपाल राष्ट्र बैंकले जनाएको छ। वार्षिक बिन्दुगत आधारमा उपभोक्ता मूल्य सूचकाङ्कमा आधारित मद्रास्फीति ६.७० प्रतिशत छ।
अघिल्लो वर्षको सोही महिनामा यस्तो मुद्रास्फीति ४.२० प्रतिशत रहेको थियो। समीक्षा महिनामा खाद्य तथा पेय पदार्थ समूहको मुद्रास्फीति ९.३३ प्रतिशत र गैर-खाद्य तथा सेवा समूहको मुद्रास्फीति ४.६९ प्रतिशत रहेको छ।
समीक्षा महिनामा खाद्य तथा पेय पदार्थ समूहअन्तर्गत तरकारी, मसला, दाल तथा गेडागुडी र मासु तथा माछा उपसमूहको मूल्यवृद्धि उच्च रहेको छ। गैर-खाद्य तथा सेवा समूहअन्तर्गत शिक्षा, स्वास्थ्य र लुगा तथा जुत्ता उपसमूहको मूल्य केही बढेको छ।
समीक्षा महिनामा काठमाडौं उपत्यकामा ७.६१ प्रतिशत, तराईमा ६.८४ प्रतिशत, पहाडमा ५.५३ प्रतिशत र हिमालमा ५.४२ प्रतिशत मुद्रास्फीति रहेको छ। २०७५ फागुनमा यी क्षेत्रहरुमा क्रमशः ४.५१ प्रतिशत, ३.५१ प्रतिशत, ४.६४ प्रतिशत र ५.४७ प्रतिशत मुद्रास्फीति रहेको थियो।
समीक्षा महिनामा नेपालको वार्षिक बिन्दुगत उपभोक्ता मुद्रास्फीति ६.७ प्रतिशत रहेकोमा भारतमा यस्तो मुद्रास्फीति ५.९१ प्रतिशत रहेको छ। अघिल्लो वर्षको सोही महिनामा नेपाल र भारतको मुद्रास्फीति क्रमश: ४.२० प्रतिशत र २.८६ प्रतिशत रहेको थियो।
समीक्षा महिनामा उपभोग्य वस्तु, मध्यवतीं वस्तु र पुँजीगत वस्तुको थोक मूल्यवृद्धि क्रमश: ५.८१प्रतिशत र २,७७ प्रतिशत रहेको छ। समीक्षा महिनामा निर्माण सामग्रीको थोक मूल्य ३.८१ प्रतिशतले घटेको छ।
नेपाल राष्ट्र बैंकका अनुसार आयात २.६ प्रतिशतले घटेको छ भने निर्यात २२.२ प्रतिशतले बढेको छ। विप्रेषण आप्रवाह १.६ प्रतिशतले बढेको छ। शोधनान्तर स्थिति २७ अर्ब ८४ करोड रुपैयाँले बचतमा छ। कुल विदेशी विनिमय सञ्चिति ११३६ अर्ब ५१ करोड रुपैयाँ बराबर कायम भएको छ। उक्त सञ्चितिले ८ महिनाको वस्तु तथा सेवा आयात धान्न पुग्ने देखिन्छ।
संघीय सरकारको बैंकिङ कारोबारमा आधारित खर्च ५६२ अर्ब ९७ करोड रुपैयाँ र राजस्व परिचालन ६३० करोड रुपैयाँ छ।
विस्तृत मुद्राप्रदाय २ प्रतिशतले बढेको छ। वार्षिक बिन्दुगत आधारमा यस्तो महाप्रदाय १४.६ प्रतिशतले बढेको छ। बैंक तथा वित्तीय संस्थाको निक्षेप संकलन ८० प्रतिशतले र निजी क्षेत्रतर्फको कर्जा १०१ प्रतिशतले बढेको छ। वार्षिक बिन्दुगत आधारमा निक्षेपको वृद्धिदर १६.१ प्रतिशत र कर्जाको वृद्धिदर १४.८ प्रतिशत छ।
वार्षिक बिन्दुगत आधारमा उपभोक्ता मूल्य सूचकाङ्कमा आधारित मुद्रास्फीति ६.७० प्रतिशत छ। आठ महिनाको औषत मुद्रास्फीति ६.५० प्रतिशत छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
