एजेन्सी–कोरोना भाइरसका महामारीका कारण विश्वभर ‘फिसिङ अट्याक’ बढिरहेको छ। इन्टरनेट जायन्ट कम्पनी गुगलका अनुसार इन्टरनेटमा सहज रुपमा फसाउन सकिने शिकारको खोजीमा रहेकाहरुले हरेक दिन कोभिड १९ बारे १ करोड ८० लाख इमेल पठाइरहेका छन्।
‘फिसिङ अट्याक’ इन्टरनेट जालसाजीको यस्तो तरिका हो, जसमा साइबर अपराधीहरुले इमेलमार्फत् प्रयोगकर्ताहरुलाई अनेक लोभ देखाउँदै उनीहरुको क्रेडिट कार्ड डिटेल, पासवर्डजस्ता निजी जानकारी प्राप्त गर्ने कोसिस गरिरहेका हुन्छन्। गुगलले हरेक दिन यस्ता १० करोड फिसिङ इमेल ब्लक गरिरहेको जनाएको छ। यस्ता इमेलमा हरेक पाँचौं इमेल कोरोना भाइरससँग सम्बन्धित हुने गरेका छन्।
कोरोना भाइरस फिसिङ अट्याकको सबैभन्दा ठूलो विषय बनेको गुगलको दाबी छ। विश्वभर २ अर्ब मानिस गुगलको इमेल प्रयोग गर्ने गर्छन्।
फिसिङ इमेल
साइबर ठगहरुले जिमेल प्रयोगकर्ताालई कयौं प्रकारका इमेलहरु पठाइरहेका छन्, जसमा विश्व स्वास्थ्य संगठनजस्ता संस्थाहरुको नामबाट पनि पठाइएका छन्। प्रयोगकर्तालाई कुनै सफ्टवेयर डाउनलोड गर्न उक्साउनु या त्यही बहानामा रकम माग्ने प्रयास उनीहरुले गर्ने गरेका छन्।
साइवर अपराधीले आजकाल सरकारी संस्थाका नाममा पनि फाइदा उठाउने प्रयास गरिरहेका छन्। गुगलले आफ्नो आर्टिफिसियल इन्टेलेजिन्स मेशिनले यस्ता ९९।९ प्रतिशत इमेल ब्लक गर्न सक्षम रहेको दाबी गरेको छ। साइबर सुरक्षासँग जोडिएका कम्पनीहरुले पनि कोरोना भाइरससम्बन्धी यस्ता ‘फिसिङ इमेल’माथि निगरानी राखिरहेका छन्।
साइबर सुरक्षा कम्पनी ‘बार्राकुडा’का अनुसार कोरोना महामारीका बेला ठगीको योजना राखेर इमेल पठाउने क्रममा ६६७ प्रतिशतले वृद्धि भएको छ। यस्ता साइबर अपराधीहरु फेक इमेल र एसएमएस पठाइरहेका छन्। यस्ता इमेलहरुमा बेलायती सरकार, विश्व स्वास्थ्य संगठन, सेन्टर फर डिजिज कन्ट्रोल र राष्ट्रपति डोनाल्ड ट्रम्पको नाममा पनि फेक इमेल पठाएको पाइएको छ। साइबर सुरक्षा अनुसन्धानकर्ता स्कट हेल्म यो पछिल्ला दिनहरुमा सामान्य झै भएको बताउँछन्। ‘उनीहरुले हाम्रो भावनालाई दोहन गर्ने उद्देश्य राखेर इमेल पठाउने गरेका छन्,’ उनले भने, ‘यस्तो अवस्थामा केही पनि नसोची हतारमा उनीहरुले भनेअनुसार उनीहरुले भनेअनुसार गर्छाैं।’
‘अहिले कोरोना भाइरसको विषय भावनात्मक भएको छ। साइबर अपराधीले यही कुरालाई ख्याल गरेर निशाना बनाइरहेको उनको अनुभव छ। त्यसरी पठाइएको लिंक प्रयोगकर्ताले क्लिक गर्ने सम्भावना धेरै हुन्छ र उनीहरु भावनामा बगेर ठगहरुले जे भन्छन्, त्यही गर्छन्,’ उनले भने।
फर्जी वेबसाइट्स र स्मार्टफोन एप्स
शोधकर्ताका अनुसार कोरोना भाइरसबारेमा जानकारी दिने नाममा फर्जी वेबसाइट्सहरु निर्माण भएका छन् र स्मार्टफोन एप्सहरु पनि अस्तित्वमा देखिएका छन्। यस्तै गलत नियत राखेर निर्माण भएको एक एन्ड्रोइड एपको दावी थियो–उनले कोरोना भाइरसको प्रसारलाई ट्र्याक गर्न मद्दत गर्दछ। यसरी यो ऐप डाउनलोड गर्नेबित्तिकै उनीहरुको नियन्त्रणमा प्रयोगकर्ताको फोन जान्छ ।
फोन र्यान्समवेयर (ठगीका लागि बनाइएको प्रोगाम) को शिकार हुन्छ। फोनलाई पहिलेकै अवस्थामा ल्याउन उनीहरुले पैसा माग्छन्। गत साता बेलायती एजेन्सी नेशनल साइबर सेक्युरिटी सेन्टर र अमेरिकाको होमल्याण्ड सेक्युरिटी विभागले यस विषयमा एक संयुक्त एडभाइजरी जारी गरेका थिए। एडभाइजरीमा भनिएको थियो– ‘साइबर हमलाको संख्या वृद्धि भइरहेको र यस्ता अपराधीले कोरोना भाइरसको महामारीमा फाइदा उठाइरहेकाले सचेत हुनुहोला।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
