काठमाडौं- विदेशमा रोजगारी गुमाएर स्वदेश फर्किएकालाई उद्यमशिलतामा आवद्ध गर्ने विशेष योजना बनाउन कार्यदल गठन भएको छ।
आइतबार उद्योग वाणिज्य तथा आपुर्ति मन्त्रालयले उद्योग वाणिज्य महासंघ, उद्योग वाणिज्य परिसंघ, घरेलु तथा साना उद्योग महासंघ , नेपाल चेम्बर अफ कमर्सलगायतका संगठन प्रतिनिधीहरुसँग छलफल गरेको थियो। छलफलपछि कोभिड-१९ का कारण विश्वभरी रहेका नेपाली युवाहरुले रोजगारी गुमाएर स्वदेश फर्किएको अवस्थामा उत्पादनशील उद्यमशीलतामा सहभागी गराउन विशेष योजना तयार पार्न कार्यदल गठन गरिएको हो।
वाणिज्य मन्त्रालयको औद्योगिक लगानी तथा प्रर्वद्धन महाशाखा प्रमुखको संयोजकत्वमा कृषि तथा पशुपंन्छी, अर्थ, संघीय मामिला तथा सामान्य प्रशासन मन्त्रालयका प्रतिनिधि तथा निजी क्षेत्रका छाता संगठनका प्रतिनिधी सहितको कार्यदल गठन गर्ने निर्णय भएको हो।
कार्यदललाई १५ दिन भित्र सुझाव सहितको प्रतिवेदन पेश गर्न समय दिइएको छ। त्यस्तै आइतबारको उक्त बैठकले औद्योगिक प्रतिष्ठानमा कार्यरत श्रमिकहरुलाई लकडाउन अवधीको पारिश्रमिक दिने निर्णय पनि गरेको छ।
त्यस्तै लकडाउनका कारण बन्द भएका उद्योगहरु सञ्चालनका लागि सम्पूर्ण उद्योगहरुलाई ३ चरणमा वर्गीकरण गरी उद्योग सञ्चालन गर्न उच्च स्तरीय समितिमा प्रस्ताव लैजाने निर्णय समेत भएको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।