काठमाडौं- शुक्रराज ट्रपिकल तथा सरुवा रोग अस्पतालमा कार्यरत डा. शेरबहादुर पुनले काेभिड १९ बारे स्वास्थ्य मन्त्राललयले सञ्चालन गरेकाे अभियानमा सहयाेग पुर्याउन आजैदेखि मन्त्रालयमा उपस्थित भएकाे बताएका छन्।
उनीले आफूलाई जाेडेर सञ्चारमाध्यम र समाजिक सञ्जालमा आएका समाचारहरु प्रति ध्यानाकर्षण भएकाे बताएका छन्। उनलाई स्पष्टिकरण साेधिएकाे भन्ने समाचारहरु बाहिर आएका थिए।
डा. पुनले आइतबार विज्ञप्ति जारी गरेर मन्त्रालयले आफूलाई कोरोना रोकथामको अभियानमा सहयोग गर्न बोलाएको स्पष्ट पारे। मन्त्रालयमा उपस्थित हुने विषयमा आज नै पत्र प्राप्त भएको पनि उनले जानकारी दिए।
विज्ञप्तिमा भनिएको छ, 'पत्रानुसार मलाई कार्यरत शुक्रराज ट्रपिकल तथा सरुवा रोग अस्पतालको काममा बाधा नपर्ने गरी कोभिड १९ मा मन्त्रालयले सञ्चालन गरेको अभियानमा सहयोग पुर्याउने कामका लागि मन्त्रालयमा उपस्थित हुने भन्ने व्यहोरा रहेकाले आजैका मितिमा मन्त्रालयमा उपस्थित भई सम्बन्धित अधिकारीहरुसँग सम्पर्क गरिसकेको छु।'
यता, स्वास्थ्य तथा जनसंख्या मन्त्रालयले पनि डा. पुनलाई स्पष्टिकरण नसोधेको जनाएको छ। कोरोना रोकथामको अभियानमा सहयोग पुर्याउन मन्त्रालय पठाउनका लागि मात्र पत्र काटिएको मन्त्रालयलका सहसचिव रघुराम विष्टले बताए।
बाहिर आएजस्तो डा. पुनलाई स्पष्टिकरणका लागि पत्र नकाटिएको उनले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
