काठमाडाैं- भारतकाे पश्चिम बंगालको राजधानी कोलकातामा एक गर्भवतीलाई सरकारी अस्पतालले भर्ना नलिँदा बच्चाकाे मृत्यु भएकाे छ। कोरोना भाइरसको डरका कारण उनलाई फर्काउदाँ बच्चाको ज्यान गएको हाे।
शनिबार राति कोलकाताको सरकारी अस्पताल एनआरएस मेडिकल कलेजमा सुत्केरी ब्यथा लागेकी महिला भर्नाका लागि पुगेकी थिइन्। तर, उनलाई भर्ना लिन अस्वीकार गर्दै अस्पतालले फर्काएकाे थियाे। उनी राज्यको रेड जोनमा रहेको हावडाबाट आएकी थिइन्।
अस्पतालले भर्ना लिन अस्वीकार गरेपछि परिवारले घर फर्काएका थिए। घर पुगे लगत्तै उनले बच्चालाई जन्म दिएकी थिइन्। जन्मेको केही समयमा बच्चाको मृत्यु भएपछि स्वास्थ्य विभागमा हंगामा मच्चिएको छ। एनआरएस मेडिकल कलेजका अध्यक्ष शैवाल मुखर्जीले बिरामी फर्काउने डाक्टरमाथि कारबाही हुने बताएका छन्।
‘मैले प्रसुति विभागको प्रमुखसँग कुरा गरेको छु। खोजी भइरहेको छ। साे समयमा कसको पालो थियो,’ अध्यक्ष मुखर्जीले भने, ‘गर्भवती महिलालाई कसरी अस्पतालबाट फिर्ता पठाउन मिल्छ।’ तर परिवारका सदस्यहरुले भने अस्पतालमा डाक्टरहरुलाई हात जोडेर विन्ति गर्दा पनि भर्ना लिनबाट अस्वीकार गरेको बताएका छन्।
त्यहाँ रहेका जुनियर डाक्टरहरुले पहिला नेशनल मेडिकल कलेज लैजान भनेका थिए। यो घटनापछि स्वास्थ्य विभागले घटना बारेमा विस्तृत रिपाेर्ट माग गरेको छ। विभागका अधिकारीका अनुसार शनिबार साँझको ड्युटीमा रहेका डाक्टरलाई तीन महिनाका लागि निलम्बनको कारबाही गरिएको छ।
रोग कल्याण समितिका अध्यक्ष शान्तनु सेनले यो एकदमै अमानवीय घटना भएको बताए। उनले यसरी बिरामी फर्काउने डाक्टरमाथि कडा कारबाही हुनुपर्ने बताए। डाक्टरको रजिष्ट्रेशन खारेजसम्मको सजाय सिफारिस हुनुपर्ने उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
