बुटवल- बुटवल उपमहानगरपालिकाले कोरोना भाइरसको संक्रमणबाट जोगिने हरेक उपाय अवलम्बन गरेको दाबी गरेको छ। विश्वमा महामारीको रुपमा फैलिएको यो संक्रमणका कारण नेपाल पनि उच्च जोखिममा परेपछि यसबाट बच्न नगरले सक्रियतापूर्वक काम गरेको उपमहानगरपालिकाले जनाएको छ।विदेश तथा नयाँ स्थानबाट आउनेहरुको खोजी तथा पहिचानका लागि संयन्त्र प्रयोग गर्नेदेखि होम क्वारेन्टाइनमा बस्नेहरुको निगरानीमा समेत जोड दिएको उपमहानगरले जनाएको छ।
बुटवल उपमहानगरका प्रमुख शिवराज सुवेदीले विदेशबाट आएका १ सय ४७ नागरिक होम क्वारेन्टाइनमा बसेको बताए। उनले ५० बेड क्षमताको क्वारेन्टाइनमा एक जनामात्रै बसेको बताए। विदेशबाट आएकाहरुले घरमै सुरक्षित तरिकाले क्वारेन्टाइनमा बसेकाले उनीहरुलाई नगरपालिकाको निगरानीमा होम क्वारेन्टाइनमा राखिएको बताए।
घरमा क्वारेन्टाइन बस्न असहज भएमा तथा गाउँ तथा टोलमा कोही आएको थाहा पाए तुरुन्त क्वारेन्टाइनमा ल्याएर राख्ने गरी संयन्त्र प्रयोग गरिएको प्रमुख सुवेदीले नेपाल लाइभसँग बताए।
प्रमुख सुवेदी कोरोना भाइरस कोभिड–१९ ले अहिले सारा विश्व नै आक्रान्त बनेका बेला यसबाट बँच्न सबैले सहयोग गर्नुपर्नेमा जोड दिन्छन्। ‘सारा विश्व नै कोरोना भाइरसका कारण अहिले थलिएको छ‚ यो बेलामा जो जहाँ हुनुहुन्छ त्यही बस्नुहोला,’ प्रमुख सुवेदीले भने‚ ‘यस्तो अवस्थामा कोही आएको थाहा पाए तत्काल नगरपालिकालाई खबर गर्नुहोला। हामीले निर्माण गरेको क्वारेन्टाइनमा लगेर व्यवस्थापन गर्नेछौं।’
२०७१ मंसिर १६ गते बुटवल नगरपालिकाबाट बुटवल उपमहानगरपालिकामा स्तरोन्नति भएको नगरपालिकामा २२ वटा वडा छन्। सबै वडामा वडा स्तरीय विपद व्यवस्थापन समिति निर्माण गरिएको छ। वडा अध्यक्षको नेतृत्वमा अनुगमन समिति निर्माण गरिएको छ। वडा समितिले टोल समितिमार्फत राहत वितरणका लागि लगत संकलन गर्ने तथा दैनिक जिविकोपार्जन गर्न समस्यामा परेका मजदूर तथा निमुखा नागरिकलाई राहत वितरण गरिरहेको उपमहानगरले जनाएको छ।
राहत वितरणलाई प्रभावकारी बनाउन जनपरिचालन गर्ने, टोल विकास संस्था मार्फत अनुगमन गर्नेलगायतका कामलाई प्रभावकारी बनाइएको नगरपालिकाले जनाएको छ। नगरपालिकामा बसोबास गरेको जो कोहीलाई पनि राहतमा विभेद नगरिएको नगरप्रमुख सुवेदीले बताए।
नगरपालिकाले ५ जनाको परिवार १५ केजी चामल, २ केजी दाल, १ केजी नुन र १ लिटर तेलका दरले राहत वितरण गरिरहेको छ। साथै उपमहानगरमा रहेका अनाथालय, वृद्धाश्रम र मानव सेवा आश्रमलाई पनि प्राथमिकताका आधारमा राहत प्रदान गर्ने काम गरिएको बताएको छ।
बुटवल उपमहानगरपालिकाभित्रको जनसंख्या करीब डेढ लाखको हाराहारीमा रहेको छ। २०६८ को जनगणनाअनुसार यस क्षेत्रको कुन जनसंख्या १,३८,७४२ रहेको थियो जसमध्ये ६८,२८८ जना पुरुष थिए भने ७९,४५४ जना महिला थिए।
कोरोना विशेष अस्थायी अस्पताल
लुम्बिनी प्रादेशिक अस्पताल र बुटवल उपमहानगरपालिका बुटवलको सहकार्यमा बुटवलको धागो कारखानामा कोरोना विशेष अस्थायी अस्पताल स्थापना गरिएको छ। ५० बेडको आइसोलेसन अस्पतालमा अहिले १ जना उपचारमा रहेका छन्। हालसम्म २९ जनाले उपचार गरी फर्किएका छन्। २६ चैतसम्म २९ जना आइसोलेसन अस्पतालमा उपचाररत थिए।
अहिलेसम्म ३२ जनाको स्वाब परीक्षणका लागि पठाइएको अस्पतालका सूचना अधिकारी डा. विष्णु गौतमले जानकारी दिए। त्यसमध्ये ३१ जनाको रिपोर्ट नेगेटिभ आएको र एक जनाको रिपोर्ट आउन बाँकी रहेको अस्पतालले जनाएको छ।
कोरोना अस्थायी अस्पतालमा ४ वटा भेन्टिलेटरसहितको १० वेड आइसीयु कक्ष निर्माणको काम अगाडि बढेको छ। भेन्टिलेटरसहितको आइसीयु आगामी ४–५ दिनसम्ममा सञ्चालनमा आउने लुम्बिनी प्रादेशिक अस्पतालका मेडिकल सुपरिटेण्डेन्ट डा. राजेन्द्रप्रसाद खनालले जानकारी दिए। अस्पतालमा अहिले टायल लगाउने काम भइरहेको छ।
ज्वरोलगायतका कोरोनासँग सम्बन्धित लक्षण देखिए नगरभित्र सञ्चालनमा रहेका ८ वटा स्वास्थ्य केन्द्रबाट प्रारम्भिक उपचार हुने उपमहानगरले जनाएको छ। लुम्बिनी प्रादेशिक अस्पतालले माहामारीका बेला सकेसम्मको उपचारमा जुटेको जनाएको छ।
ज्वरो, स्वासप्रसास समस्या लगायतका बिरामीलाई प्राथमिकतामा राखेर उपचार गरिएको अस्पतालले जनाएको छ। उपचारका क्रममा कोरोनासँग मिल्दोजुल्दो लक्षण देखिएपछि तत्काल अस्पताल स्थापना गरिएको कोरोना विशेष अस्थायी अस्पतालमा लगेर आइसोलेसनमा राखेर उपचार गरिने अस्पतालका डा. खनालले जानकारी दिए।
बुटवलमा पर्याप्त एम्बुलेन्स भए पनि समस्या परेका बेला नपाइने गुनासो बढेपछि नगरपालिकाले ग्रामीण भेगका नागरिकलाई सम्बोधन गर्ने गरी पीपीईसहितको एम्बुलेन्स तयारी अवस्थामा राखेको जनाएको छ। नगरपालिकाले( १४ देखि १९ सम्मका ग्रामीण वडाहरुलाई ध्यानमा राखेर सेमलारमा उक्त एम्बुलेन्सलाई स्ट्याण्डबाई राखिएको प्रमुख सुवेदीले बताए। उक्त एम्बुलेन्सले चौबिसै घण्टा सेवा प्रदान गर्ने जनाइएको छ। अर्को एम्बुलेन्सको छिट्टै व्यवस्थापन गर्ने गरी तयारी गरिएको नगरपालिकाले जनाएको छ।
संक्रमण फैलन नदिन सरकारले घोषणा गरेको लकडाउनको पूर्ण पालनाका लागि बुटवल उपमहानगरपालिकाले समन्वयकारी भूमिका खेलिरहेको छ। ‘लकडाउनको सुरुवाती दिनमा अलि गाह्रो भएको थियो। हामीले आम नागरिकमा परेको यस्तो खालको आदत फेर्ने कोशिशमा छौं।’
उपमहानगरले लकडाउनको पूर्ण पालनाका लागि माइकिङ गरेर आग्रह गरिरहेको छ। नागरिकलाई अत्यावश्यक बाहेकका काममा बाहिर ननिस्कन उपमहानगरले नगरबासीलाई आग्रह गरेको जनाएको छ। उपमहानगरले किटनाशक औषधि डिसइन्फेक्सन स्प्रे छर्कने काम गरिरहेको छ। एम्बुलेन्सलाई २४ घण्टा तयारी अवस्थामा राखिएको छ। नगरबासीलाई कुनै समस्या पर्दा उपमहानगरपालिकामा खबर गर्न आग्रह गरिएको छ।
‘नागरिकलाई खाद्यान्नको समस्या आउन दिन्नौं’
उपमहानगरपालिकाले नागरिकलाई खाद्यन्नको अभाव हुन नदिने बताएको छ। नगरपालिकाभित्रका नागरिकलाई खाद्यन्नको अभाव हुन नदिनका लागि टोलटोलका खाद्यान्न पसललाई खोल्न आग्रह गरिएको प्रमुख सुवेदीले जानकारी दिए। उनले भाटभटेनीलगायतका अन्य ठूला सुपरमार्केट तथा जनरल स्टोरलाई भिडभाड नगर्न आग्रह गरिएको बताए।
हामीले त्यस्ता मार्केटलाई आफ्ना टोलका चोकचोकमा गएर सामान बिक्री गर्न आग्रह गरेका छौं‚’ सुवेदीले भने‚ ‘भीडभाड गरे हामी कारबाही गर्नेछौं।’ सामान खरिद गर्न जाँदा अनिवार्य मास्क र सामाजिक दूरी कायम गर्न आग्रह गरिएको पनि बताए।
तरकारीका लागि नगरका ग्रामीण भेगमा रहेका तरकारी फार्मको सूची तयार गरी सेवा प्रवाहको काम अगाडि बढाइएको नगरपालिकाले जनाएको छ। वडा नम्बर १४ देखि १९ सम्मका वडामा रहेका तरकारी फार्मलाई सुपथ मूल्यमा तरकारी बिक्री गर्न भनिएको बताउँदै प्रमुख सुवेदीले महंगोमा बेचे नबेचेको अनुगमन गर्ने काम भइरहेको बताए।
बुटवल उपमहानगरले दूरी कायम गरेर बिक्री वितरण गर्नका लागि तरकारीका ठेलालाई बिक्री गर्न सुविधा दिइएको बताएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
