कोरोना रोकथाममा नेपालगञ्ज : बिना मास्क सामान किन्न प्रतिबन्धदेखि, निगरानीमा ‘टास्क फोर्स’सम्म

कोरोना अपडेट

निर्मला घिमिरे बिहीबार, चैत २७, २०७६ ०९:०४

काठमाडौं- विश्वभर महामारीका रुपमा फैलँदै गएको कोभिड-१९ (कोरोना भाइरस)को संक्रमण नियन्त्रणका लागि नेपालगन्ज उपमहानगरपालिकाले विशेष सतर्कता अपनाएको दाबी गरेको छ। नगरका अनुसार कोरोना संक्रमितका लागि आइसोलेसन र मिल्दोजुल्दो लक्षण देखिएका बिरामीका लागि क्वारेन्टाइनको व्यवस्था गरिएको छ भने र स्वास्थ्यकर्मीहरु समेत तयारी अवस्थामा राखिएको छ।

नेपालगन्ज उपमहानगरपालिकाले दशगजा क्षेत्र र महेन्द्र बहुमुखी क्याम्पसमा गरी दुई ठाउँमा क्वारेन्टाइन बनाएको उपमहानगरपालिकाका प्रमुख डा धवल शमशेर राणाले नेपाल लाइभसँगको कुराकानीमा बताए। उपमहानगरपालिकाले २५ बेडको आइसोलेसन वार्ड तयारी अवस्थामा राखिए तर बिरामी भने नरहेको जानकारी उनले दिए। कोरोनाको आशंकितका लागि भेरी अस्पताल र मेडिकल कलेजको आइसोलेसनमा राखिएको छ।

क्वारेन्टाइनमा २५० जना
यो समाचार तयार पार्दासम्म नेपाल–भारत सीमानाको दशगजा क्षेत्र र महेन्द्र बहुमुखी क्याम्पसमा गरी २ सय ५० जनालाई क्वारेन्टाइन बेड बनाइएको छ। महेन्द्र बहुमुखी क्याम्पसमा २२ जना छन्। बाँकी दशगजा क्षेत्रमा पाल टाँगेर निमार्ण गरिएको क्वारेन्टाइनमा छन्। १५ जना व्यक्तिहरु १४ दिन क्वारेन्टाइनपछि घर फर्किसकेका उपमहानगरपालिकाकी उपप्रमुख उमा थापामगरले जानकारी दिइन्।

‘हामीले दशगजा क्षेत्रमा पाल टाँगेर ६० वटा क्वारेन्टाइन बेड बनाएका छौँ। भारतबाट फर्किएका व्यक्तिहरु क्वारेन्टाइनमा रहनुभएको छ,’ उपप्रमुख थापामगरले नेपाल लाईभसँग भनिन्। कोरोना भाइरस नियन्त्रणका लागि उपमहानगरपालिकाले माइकिङमार्फत् जनचेतना जगाउने कामलाई विशेष जोड दिएको उनको भनाइ छ। नगरबासीलाई सरसफाइमा ध्यान दिन समेत आग्रह गरिरहेको छ।

विदेशबाट आएकालाई अनिवार्य क्वारेन्टाइन
विदेशबाट आएकाहरुलाई उपमहानगरपालिकाले क्वारेन्टाइनमा अनिवार्य रुपमा बस्नुपर्ने नियम बनाएको छ। भारत वा अन्य तेस्रो मुलुकबाट आएका व्यक्तिहरुको पहिचानका लागि वडा समिति तथा स्थानीयहरुले सहयोग गर्दै आएका छन्। पहिचानपछि उनीहरुलाई सेल्फ क्वारेन्टाइन तथा उपमहानगरको क्वारेन्टाइनमा राखिने गरिएको छ। जिल्ला बाहिरबाट आएकाहरुले पनि नियमित स्वास्थ्य परीक्षण गराउनुपर्ने व्यवस्था गरिएको छ।

स्वास्थ्य, सुरक्षा र निगरानीका लागि टास्क फोर्स टिम
कोरोना संक्रमण नियन्त्रणका लागि सबै स्वास्थ्यकर्मीलाई अलर्टमा राखिएको छ। भारत वा अन्य मुलुकबाट आएर लुकिछिपी बसेका व्यक्ति तथा कोरोनासँग मिल्दोजुल्दो लक्षण भएका व्यक्तिहरुको खोजी गर्ने, उनीहरूलाई क्वारेन्टाइनमा लैजाने तथा घरमै क्वारेन्टाइनमा बस्न मिल्ने वातावरण छ भने होम क्वारेन्टाइनमै बस्न परामर्श दिने, बिरामीको चेकजाँच तथा उपचारका लागि स्वास्थ्यकर्मीहरुको टास्क फोर्स टिम खडा गरिएको उपप्रमुख उमा थापामगरले जानकारी दिइन्।

होम क्वारेन्टाइनमा बसेका व्यक्तिको नियमित अनुगमनका लागि वडा समिति सक्रिय रहेको उनको भनाइ छ। क्वारेन्टाइनमा बसेका व्यक्तिहरुको स्वास्थ्य परीक्षण तथा उनीहरुको निगरानी समेत टास्क फोर्स टिमले गर्नेछ।

मास्क नलगाए सामान किन्न नपाइने
उपमहानगरपालिकामा २३ वटा वडाले साबुन र मास्क वितरण गरिरहेको छ। यतिबेला नगरवासीहरु मास्क नलगाई अत्यावश्यक सामग्री किन्न समेत नपाउने नियम लागू गरेको छ।

‘हामीले अत्यावश्यक सामग्री राखिएका मेडिकल, खाद्यान्न, पानीलगायत पसलमा पनि मास्क र पन्जा अनिवार्य लगाएर बस्न र मास्क नलगाई सामान किन्न गएका ग्राहकलाई सामान नबेच्न पसललाई निर्देशन दिएका छौँ,’ उपप्रमुख उमा थापामगरले भनिन्।

कालोबजारी नियन्त्रणका लागि दैनिक मूल्यसूची निर्धारण
उपमहानगरपालिकाले यो संकटको घडीमा कालोबजारी बढ्न सक्ने तथा उपभोक्ताहरु ठगिने अवस्था सिर्जना हुने भन्दै दैनिक मूल्यसूची निर्धारण सुरु गरेको छ।

दैनिक उपभोग्य वस्तु किनमेल हुने ठाउँमा भिड नियन्त्रणका लागि समय निर्धारण गरिएको छ। यसमा प्रशासनको सहयोग पनि लिइएको छ। नगरले बिहान ६ बजेदेखि दिउँसो ३ बजेसम्म तरकारी खरिदबिक्री गर्न पाउने समय तोकिदिएको छ। साथै ठेला र साइकलमार्फत् पनि टोलटोलमा तरकारी, फलफूल लगायतका सामग्री पुर्‍याउने वातावरण मिलाइएको उपमहानगरले जनाएको छ।

‘यस्तो बेला उपभोक्ता ठगिनु नपरोस् भनेर हामीले दैनिक मूल्यसूची निर्धारण गर्ने गरेका छौँ। मूल्य सूचीअनुसार बजार भाउ छ वा छैन सो सम्बन्धमा अनुगमनका लागि स्थानीय प्रशासनसँग सहकार्य गरेका छौँ,’ उपप्रमुख उमा थापामगर भन्छिन्।

दैनिक ज्यालादारी गर्ने तथा विपन्न वर्गलाई राहत
नेपालगन्ज उपमहानगरपालिकाले स्थानीय तथा अन्य स्थानबाट आएका विपन्न वर्ग, दैनिक ज्यालादारी गर्ने मजदुरहरुलाई राहत दिइरहेको छ। बुधबारसम्म ३ हजारभन्दा बढीलाई राहत वितरण गरिसकेको छ।

५ जना सदस्य भएका विपन्न परिवारलाई १५ किलो चामल, ५ किलो पिठो, ५ किलो आलु, १ लिटर तेल र एउटा साबुन उपलब्ध गराइएको छ। ५ जनाभन्दा ठूलोे सदस्यको परिवारलाई अवस्था हेरेर राहत उपलब्ध गराइने उल्लेख गरिएको छ। राहतका लागि प्रत्येक वडाहरुले नै बजेट व्यवस्थापन गरेको नगरप्रमुख डा धवल शमसेर राणाले बताए।

‘राहत वितरणको काम सबै वडामार्फत् भइरहेको छ। राहत वितरणका लागि बजेटसम्बन्धी सबै विवरण आउने क्रममा छ। प्रदेश र संघबाट राहतका लागि बजेट पाएका छैनौँ,’ नगरप्रमुख राणाले भने।

२३ हजार ५ सय घरधुरी रहेको नेपालगञ्ज उपमहानगरपालिकामा करिब डेढ लाख जनसंख्या छ। विपन्न परिवारको संख्या भने यकिन छैन।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।