इटहरी- कोरोना संक्रमण फैलिन नदिन भन्दै इटहरी उपमहानगरपालिकाले स्वास्थ्यकर्मी परिचालन गरी सचेतना अभियान चलाइरहेको छ। कोरोना भाइरसका लक्षण र त्यसबाट बच्चे उपायको बारेमा घरघरमा पुगेर सचेत गराउन सुरु गरिएको हो।
नेपाल सरकारले श्वास्थ्य स्वयंसेविकालाई पनि परिचालन गर्ने निर्णय गर्नुभन्दा एक महिनाअघिदेखि नै इटहरी उपमहानगरले स्वयंसेविका परिचालन गर्ने निर्णय गरेको थियो। इटहरीभरिका स्वास्थ्य स्वयंसेविका तथा अन्य स्वास्थ्यकर्मचारीलाई तालिम दिएर सचेतनाको लागि खटाइएको उपमेयर लक्ष्मी गौतमले बताइन्।
बाहिरबाट आएका नयाँ आगन्तुकको बारेमा डाटा राख्ने र स्वास्थ्य परीक्षण गरेर होम क्वारेन्टाइनमा राख्ने व्यवस्था मिलाइएको उनको भनाइ छ। टोल-टोलमा अनुगमन संयन्त्र बनाएर कोरोना शंकास्पदको खोजी गर्ने काम भइरहेको गौतम बताउँछिन्। उनका अनुसार हालसम्म १ सय जना जति विभिन्न देशबाट आएकाहरु उपमहानगरको निगरानीमै छन्।
हरेक वडामा वडाध्यक्षको संयोजकत्वमा अनुगमन तथा सुपरीवेक्षण समिति बनेकाले सो समितिले नियमित अनुगमनको काम गरीरहेको छ। कुनैपनि बिरामी शंकास्पद भेटिएको अवस्थामा कोरोना शंकास्पदकै लागि भनेर एउटा एम्बुलेन्स तयारी अवस्थामा रहको उपमेयर गौतमले बताइन्।
सँगै अत्यावश्क सामग्री बिक्री वितरण गर्ने पसलमा १ मिटरको दूरी कायम गर्नुपर्ने तथा अनिवार्य सेनिटाइजर र साबुन पानीका व्यवस्था गर्नुपर्ने नियम बसाइएको छ। सहर बजारदेखि गाउँसम्म माइकिङ गरी विदेशबाट आएका मानिसलाई उपमहानगरको सम्पर्कमा ल्याउन पहल गरिएको गौतमको भनाइ छ। अब दुई दिनपछि शंकास्पद बिरामीको घरमै पुगेर स्वाब संकलन गर्ने तयारी थालिएको उनले जानकारी दिइन्।
उपमेयर गौतमका अनुसार १०२ बेडको क्वारेन्टाइन निर्माण भइसकेको छ। अहिलेसम्म क्वारेन्टाइन संचालनमा नआएको र शनिबारसम्ममा प्राविधिक र स्वास्थ्यकर्मीको टोली तयार भइसक्ने र त्यसपछि क्वारेन्टाइन संचालनमा ल्याइने भएको हो।
विपन्न तथा गरीब परिवारको लागि राहत उपलब्ध गराउन भन्दै उपमहानगरको विपद शीर्षकको ८० लाख बजेट खर्च गर्ने तयारीमा उपमहानगर छ। १०३ जना जनप्रतिनिधिको १ महिनाको‚ सुविधा १५ लाख र प्रशासनतर्फका कर्मचारीको ७ दिनको तलब पनि राहत कोषमा जम्मा गर्न लागिएको हो।
सुरुमा १० हजार जनामा राहत पुर्याउने गरी योजना बनाइएको भएपनि लगत संकलन गर्दै जाँदा संख्या बढेर २० हजार हाराहारी पुगेको उपमेयर गौतमको भनाइ छ। उपमहानगरको बजेटले मात्र नभ्याउने भएपछि निजी क्षेत्रलाई पनि सहयोग आह्वान गरिरहेको उनले बताइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766305548.png)
-1764146706.png)
-1763721444.png)
