कोरोना अपडेट

विराटनगर महानगरपालिकाद्वारा टोलटोलमा ‘फिभर क्लिनिक’ सञ्चालन

विनय बाह्रकोटी शुक्रबार, चैत २८, २०७६ १०:२८

इटहरी- कोरोना संक्रमण रोकथाम तथा पहिचानको लागि भन्दै बिराटनगर महानगरपालिकाले टोलटोलमा फिभर क्लिनिक सञ्चालन सुरु गरेको छ। कोरोना भइरस (कोभिड १९) को जस्तै लक्षण देखिने बिरामीका लागि टोलमै क्लिनिक सञ्चालन गरी रोग पहिचान गर्ने काम सुरु गरिएको हो।

कोरोना र मौसमी रुघाखोकी तथा ज्वरोको लक्षण मिल्दोजुल्दो हुने भएकाले स्थानीयमा त्रास फैलिन सक्ने भन्दै महानगरले टोलटोलमा क्लिनिक कार्यक्रम ल्याएको स्वास्थ्य शाखा अधिकृत दिलिप यादवले बताए। हरेक चोक तथा बजारमा साबुन पानी र स्यानिटाइजरको व्यवस्था मिलाइएको पनि उनले बताए।

लकडाउन भएदेखि विदेशबाट आएकाहरुका लागि होम क्वारेन्टाइनमै बस्ने व्यवस्था गरेको र महानगरले नियमित अनुगमन गरिरहेको उनले जानकारी दिए। उनका अनुसार वडा कार्यलयको समन्वयमा हरेक व्यक्तिको विवरण राख्ने र नियमित स्वास्थ्य अवस्थाबारे बुझ्ने काम भइरहेको छ। धेरै मान्छेहरु लुक्न खोजिरहेको तर महानगरले संयन्त्र बनाएर पहिचान गरीरहेको उनले बताए।

हालसम्म विभिन्न देशबाट ३ सय १८ जना विराटनगर आएको र उनीहरुको नियमित स्वास्थ्य परीक्षण भइरहेको छ। १४ जना महानगरको क्वारेन्टाइनमा बसेका छन्। हालसम्म ३ जना १४ दिन पूरा गरेर घर फर्किसकेका छन्। बाँकी ११ जनालाई क्वारेन्टाइनमै राखिएकोछ। त्यसमध्ये दुईजना जनकपुरका रहेको यादवले बताए।

सम्भावित जोखिमलाई हल गर्न बैजनाथपुरमा हेल्थपोस्टमा २० शय्या, अतिथि सदन ४० शय्या सहित २ सय २० शय्याको क्वारेन्टाइन निर्माण भएको छ। क्वारेन्टाइनमा खाने, बस्ने, सरसफाई लगायत सम्पूर्ण पूर्वाधार तयारी अवस्थामा रहेको यादवले बताएका छन्।

हाल कोशी अस्पतालमा आइसियू सहित १० बेडको आइसोलेसन कक्ष निर्माण भइसकेको छ। प्रदेश १ सरकारसँगको सहयोगमा कोरोना रोकथामको लागि उच्च सतर्कता अपनाइएको महानगरले जनाएको छ।

व्यक्तिगत सुरक्षा सामाग्री (पिपिइ) को अभाव भने कायमै छ। बजार अनुगमनको क्रममा भेटिएका ११ हजार थान मास्कको वितरण भएपछि अभाव पुर्ति भएको यादव बताउँछन्।

यादवका अनुसार, जोगबनी नाकाबाट मान्छेको आवगमन शून्य छ। तर मालवाहक गाडी नेपाल भित्रिइरहेकाले गाडीका चालक र सहचालकको ‘थर्मल गन’बाट तापक्रम परीक्षण गरेर मात्र नेपाल छिर्ने व्यवस्था मिलाइएको छ।

गरीब र मजदुर वर्गको पहिचान गरी राहत वितरणको काम तिब्र पारिएको छ। उपमेयर इन्दिरा कार्कीका अनुसार वडा कार्यालयले दिएको जानकारीका आधारमा पालैपालो राहत वितरण भइरहेको छ।