जनकपुरधाम : कमजोर स्वास्थ्य पूर्वाधार, परीक्षण न्यून

कोरोना अपडेट

प्रजु पन्त शुक्रबार, चैत २८, २०७६ ०७:३७

काठमाडौं–कोरोना संक्रमण जोखिम न्यूनीकरण गर्न जनकपुरधाम उपमहानगरपालिकाले भारतलगायत विदेशबाट आएकाहरुको खोजी थालेको छ। मेयर लालकिशोर साहले वडा कार्यालयहरुले विदेशबाट आएकाहरुको तथ्यांक खोजी गरिरहेको जानकारी दिए।

‘केन्द्र सरकारले लकडाउन गरेपछि दोस्रो चरणमा म नगर घुम्दै छु,’ साहले नेपाललाइभलाई भने, ‘विपन्न वर्गलाई राहत वितरण, विदेशबाट आएकाहरुको तथ्याङ्क सङ्कलनलगायतका काम भइरहेका छन्।’

उपमहानगरले स्वास्थ्यकर्मी, कर्मचारी, विपद् व्यवस्थापन समितिलगायत गरेर ३ सयभन्दा बढी जनशक्ति परिचालन गरिएको जनाएको छ। मेयर साहले गर्भवतीसहित सिजनल फ्लु तथा अन्य रोगका बिरामीलाई पनि नियमित रुपमा स्वास्थ्य सेवा पुर्‍याइरहेको दाबी गरे। ‘हाम्रो उपमहानगरमा १० वटा स्वास्थ्य चौकी छन्,’ साहले भने,‘त्यसमार्फत् हामीले अनिवार्य स्वास्थ्य सेवा चाहिने बिरामीलाई सेवा दिइरहेका छौँ।’

धनुषाका प्रमुख जिल्ला अधिकारी कोषहरि निरौलाले जनकपुरधाममा ३ सय ६० जनाको क्षमता भएको एउटा क्वारेन्टाइन बनाइएको र ९५ जनालाई क्वारेन्टाइनमा राखिएको जानकारी दिए। क्वारेन्टाइनमा राखिकाहरुको हेरचाह सशस्त्र प्रहरीले गरिरहेको छ।

प्रजिअ निरौलाका अनुसार धनुषाभर ३२ वटा आइसोलेसन कक्ष बनाइएकामा जनकपुरमा ८ वटा छन्।

उपमहानगरका प्रशासकीय अधिकृत गोपाल रेग्मीका अनुसार १ लाख ७५ हजार जनसंख्या रहेको नगरमा २५ वटा वडा छन्, जसका लागि १० वटा स्वास्थ्य चौकी, एउटा एम्बुलेन्स, सहरी स्वास्थ्य क्लिनिक ३ वटा तथा निजी क्लिनिक १८ वटा छन्।

मेयर साहले जनकपुरमा यथेष्ट स्वास्थ्य पूर्वाधार नभएको गुनासा गरे। ‘अन्तर्राष्ट्रिय संकटमा केन्द्र सरकारले आवश्यक पूर्वाधार पठाउनु पर्ने हो, हामीले कहाँबाट ल्याउने,’साहले भने, ‘अहिलेसम्म हामीसँग २५ थान पीपीई छ।’ उपमहानगरपालिकाका अनुसार नगरअन्तर्गत हेल्थ असिस्टेन्ट, सीएमए र अनमी गरी जम्मा २५ जनामात्र स्वास्थ्यकर्मी छन्।

साहले जनकपुरमा विदेशबाट आएकाहरुको परीक्षण अत्यन्तै न्युन भएको बताए। ‘परीक्षण गर्ने व्यववस्था केन्द्र सरकारले गरे हुन्थ्यो,’ उनले भने, ‘अनि बल्ल कस्तो अवस्था छ भन्ने थाहा हुन्थ्यो।’

जनकपुरमा पनि अन्य स्थानमा जस्तै विदेशबाट आएकाहरुको तथ्याङ्क खोजी गर्न असहज भएको, क्वारेन्टाइनमा राखिएकाहरु भाग्ने गरेको प्रजिअ निरौलाले बताए। केही दिनअघि क्वारेन्टाइनमा राखिएकाहरु भागेका र उनीहरुलाई सशस्त्र प्रहरीले फर्काएको उनले बताए।

जनचेतना फैलाउन साबुन पानीले हात धुन, घर सफा राख्न नागरिकलाई आग्रह गरिएको भए नभएको वडामार्फत् अनुगमन गरिएको र सार्वजनिक स्थल सफा राख्न सफाइ कर्मचारी खटाएको मेयर साहले बताए।

प्रमुख प्रशासकीय अधिकृत गोपाल रेग्मीका अनुसार नगरले कोरोना सचेतनाका लागि ८७ लाख बजेट विनियोजन गरेको छ।

ठूलो क्षेत्रफल, कमजोर स्वास्थ्य पूर्वाधार

जनकपुरधाम उपमहानगरपालिकाको क्षेत्रफल ९१ दशमलव ९७ वर्ग किलोमिटर छ। तर, प्रदेश २ को राजधानी भए पनि जनकपुरधाम उपमहानगरपालिकाको स्वास्थ्य पूर्वाधार कमजोर देखिएको छ। २५ वटा वडा कार्यालय भए पनि सबै वडामा स्वास्थ्य चौकी छैनन्।

नगरमा स्वास्थ्य पूर्वाधारको अवस्था अत्यन्तै नाजुक भएको मेयर साहले बताए। ‘हाम्रो उपमहानगरमा गरिबी व्याप्त छ। सिज्नल फ्लुले पनि उस्तै सताउँछ, भएको बजेट त्यतै खर्च गर्दा ठिक्क हुन्छ, आवश्यक पूर्वाधार बनाउन सकिएको छैन,’ उनले भने।

तथ्यांकमा जनकपुरधारम उपमहानगरपालिकाको स्वास्थ्य पूर्वाधार