एजेन्सी- अमेरिका लगायत अन्य देशमा निरन्तर रुपमा फैलिरहेको कोरोना भाइरसको संक्रमणका कारण विश्वले नै एककिसिमको लकडाउन गरिरहेका बेला चीनमा धमाधम सबै सामान्य जीवनमा फर्किरहेको समाचार सबैतिर छाइरहेका छन्।
चीनमा आन्तरिक उडानहरू बिस्तारै चल्ने प्रक्रियामा छन्। आउने साता वुहानका नागरिक सो क्षेत्रभन्दा बाहिर जान पनि सक्ने त्यहाँका सरकारी निकायले बताइसकेका छन्‚ जहाँबाट गत डिसेम्बरमा कोरोनाको संक्रमण सुरु भएको थियो। संक्रमितको संख्याअझै शून्यावस्थामा नझरिसकेकाले अनावश्यक रुपमा बाहिर ननिस्कनका लागि भने स्थानीय निकायहरूले चेतावनी दिइरहेका छन्।
चीनमा यति छिट्टै कोरोना भाइरसको संक्रमण यसरी नियन्त्रणमा आएको खवरले धेरै प्रश्नहरू उठाएका छन्। के यी खवर विश्वासयोग्य छन् त?
यसैका सन्दर्भमा चिनियाँ विदेशमन्त्री हुवा चुन्यिङले चीन सबैका लागि खुला भएको र यहाँ भएका अन्य घटनाका बारेमा पनि विश्वलाई अवगत गराएको बताएकी छन्।
‘अन्तर्राष्ट्रिय स्वास्थ्य‚ महामारी र संक्रमण नियन्त्रणको सन्दर्भमा हामीले झुठा राजनीतिज्ञभन्दा बढी विश्व स्वास्थ्य संगठन (डब्लुएचओ) र विषयगत विज्ञका कुरा सुन्नुपर्छ।’ उनले भनिन्‚ ‘हिजोमात्रै जेनेभामा विश्व स्वास्थ्य संगठन (डब्लुएचओ)का विशेषज्ञलाई चीनको डाटा लुकाएको भनी आरोप लगाइयो।’
आफ्नो देशमा संक्रमण ज्यादा फैलिएकाले अमेरिकाले यस्तो डरलाग्दो परिस्थितिमा दोष अर्कालाई थुपार्ने काम गरिरहेको आरोप लगाइन्।
‘सार्वजनिक स्वास्थ्यको विषयलाई राजनीतिकरण गर्नु अमानवीय व्यवहार हो‚’ उनले भनिन्‚ ‘आश गरौं‚ अमेरिकाले अरूमा ध्यान दिनुभन्दा बढी यो महामारी र आफ्ना नागरिकको स्वास्थ्यका बारेमा सोच्नेछ।’
‘प्रश्नहरू अमेरिकाले मात्र उठाएको होइन। चीनकै एक प्रतिष्ठित संस्था काइक्सिनले पनि सरकारी निकायले बाहिर ल्याएको डाटाभन्दा बढी लाशहरू भएको जनाएको थियो। तर एक करोड १० लाखभन्दा बढी जनघनत्व भएको सहरमा कोरोना भाइरसभन्दा अन्य रोगले मर्नेको संख्या पनि उत्तिकै हुने हुँदा उक्त संस्थाको कुरा पनि सान्दर्भिक नै हो‚’ उनले भनिन्।
लकडाउनका बेला चीनको सडक
सिएनएनका अनुसार चीनको वुहान सहरामा बस्ने डोरा जियाङको परिवारको कोरोनाको परीक्षणको रिपोर्ट आउन ४ दिन लाग्यो।
‘यसले मलाई भावनात्मक चोट त पुर्याएको छ नै।’ डोरा भन्छिन्‚ ‘उनीहरूले संक्रमितको संख्यामा नियन्त्रण गर्नका लागि यस्तो गरेको हो जस्तो मलाई लाग्दैन। उनीहरूले सकेसम्म गरिरहेका छन्’
केल हुइको आमाको मृत्यु जनवरीमा वुहान सहरमा भएको थियो। तर उनको ‘न्यूक्लेइक एसिड’ परीक्षण नभएकाले उनको मृत्यु कोरोनाकै कारणले भएको हो वा अन्य कुनै कारणले‚ यो भने खुल्न सकेको छैन।
यसको मतलब उनको मृत्यु कोरोनाको पुष्टि नहुँदै भयो र उनको नाम चिनियाँ सरकारले कोरोनाबाट मृत्यु भएको लिस्टमा राखेन।
वुहान सहरमा कुनै पनि नयाँ कोरोना संक्रमित नभएपछि खुसी साट्दै चिकित्सक
केही दिनपछिमात्र मानिसमा कोरोनाका विभिन्न लक्षणहरू देखिने हुनाले यसको संक्रमण अझ धेरै व्यक्तिमा सर्न सक्ने हुन्छ।
चिनियाँ सहरमा आवत जावतको संख्या बढेसँगै फेरि कोरोना भाइरसले महामारीको रुप लिने हो कि भन्ने त्रास पनि पैदा भएको छ।
बिहीबार एक विज्ञप्ति जारी गर्दै वुहान पार्टीका प्रमुख वाङ झोङ्लिनले सबै चिनियाँलाई कोरोनाको त्रास अझै पनि रहेकाले उचित सुरक्षाका साधनहरू अपनाउनका लागि आग्रह गरेको छ।
अत्यावश्यकबाहेकका कुनै पनि यात्रा नगर्न‚ मास्क लगाएर काममा जान र शरीरको तापमान परीक्षण गरिरहनका लागि पनि आग्रह गरेको छ।
सरकारी निकायले विदेशबाट आउने व्यक्तिहरूका लागि भने कडा नियम लागू गरिरहेको छ। फेरि पनि महामारी नफैलियोस् भन्नका लागि चीनले यस्तो उच्च सतर्कता अपनाएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
