काठमाडौं–नेपाल एयरलाइन्सको वाइडबडी जहाज चार्टर गरेर अस्ट्रेलियन दूतावासले आफ्ना २ सय ५७ नागरिकलाई आफ्नो देश पठाएको छ।
बुधबार साँझ पौने ६ बजे नेपाल एयरलाइन्स २ सय ५७ यात्रु लिएर अस्ट्रेलिया उडेको हो। काठमाडौं–मलेसिया–ब्रिसबन गएको जहाज बिहीबार बेलुका ८ बजे सोही रुट हुँदै काठमाडौं आइपुग्ने छ।
नेपाल एयरलाइन्सको कमर्सियल विभागले बोन ट्राभल्ससँग मिलोमतो गर्दै आर्थिक हिनामिना गरेको विषय उजागर भएपछि अस्ट्रेलिया चार्टर उडान विवादित बनेको छ।
यद्यपि निमित्त महाप्रबन्धक गणेशबहादुर चन्द, प्रवक्ता अर्चना खड्का र कमर्सियल विभाग प्रमुख टंक दाहालले चार्टर जहाजमा कुनै आर्थिक हिनामिना नभएको दाबी गर्दै आएका छन्। चन्दले यो विषयमा बुझिरहेको जनाएका छन् भने दाहालले अस्ट्रेलियन दूतावासको पत्रअनुसार बोन ट्राभल्ससँग चार्टर सम्झौता गरेका बताएका छन्।
तर, दूतावासले नेपाल नागरिक उड्डयन प्राधिकरणबाट चार्टर अनुमति लिएको छ। प्राधिकरणले जारी गरेको पत्रमा पनि दूतावास नै उल्लेख छ।
तर, कमर्सियल विभागका दाहाल भने अनुमति दूतावासले लिए पनि उसैको पत्रका आधारमा बोन ट्राभल्ससँग सम्झौता गरेको बताइरहेका छन्।
नेपाल एयरलाइन्सकी प्रवक्ता अर्चना खड्काले चार्टर जहाजमा नेपाल एयरलाइन्सले यात्रु खोज्ने काम नगर्ने हुँदा प्रति घन्टा उडानको १८ हजार १ सय डलरका दरले ट्राभल्ससँग सम्झौता भएको बताएकी छन्।
उनका अनुसार यो चार्टर उडान २५ घन्टा २५ मिनेटको हो। सोही आधारमा भन्ने हो भने नेपाल एयरलाइन्सले कुल ४ लाख ५७ हजार २५ डलर पाउने छ। उक्त डलरलाई १ सय २० रुपैयाँका दरले हिसाब गर्दा नेपाल एयरलाइन्सले कुल ५ करोड ४८ लाख ४३ हजार रुपैयाँ आम्दानी गर्छ। ट्राभल्समार्फत् चार्टर सम्झौता गर्दा ट्राभल्सले यसरी भएको आम्दानीको ५ प्रतिशत कमिसन पाउँछ। ५ प्रतिशत कमिसन रकम २७ लाख ४२ हजार १ सय ५० रुपैयाँ हुन्छ।
उक्त कमिसनका लागि नै नेपाल एयरलाइन्सका कर्मचारीले सेटिङमा दूतावासबाट भएको चार्टरलाई बोन ट्राभल्समार्फत् गराएको भन्दै विरोध भएको छ।
उक्त चार्टर सिधै दूतावासमार्फत् भएको भए नेपाल एयरलाइन्सले आफैंं टिकट बुकिङ खुल्ला गरेर यात्रु म्यानेज गर्नु पर्ने हुन्थ्यो। यसो गर्दा बोन ट्राभल्सलाई दिनु पर्ने ५ प्रतिशत कमिसन वापतको २७ लाख ४२ हजार १ सय ५० रुपैयाँ नेपाल एयरलाइन्सकै हुन्थ्यो।
एयरलाइन्स आफैंले सहज गर्न पनि गार्हो भने थिएन। देशका विभिन्न भूभागमा अलपत्र परेका अस्ट्रेलियन नागरिकको उद्धार नेपाल पर्यटन बोर्डले गरेको थियो। टिकट र यात्रुलाई सम्पर्कमा आउन भन्दै नेपाल पर्यटन बोर्डबाट पनि नेपाल एयरलाइन्सले काम गर्न सक्थ्यो। तर, त्यसो गरेन।
बोन ट्राभल्सलाई एक उडानमा साढे ३४ लाख
बोन ट्राभल्सका अनुसार उडानमा २ सय ५२ जनाको टिकट काटिएको छ। जसमा २ सय ३६ जनाको हकमा १ हजार ७ सय ९५ डलर र १६ जनाको हकमा २ हजार ३ सय डलरको टिकट जारी भएको छ। २ सय ३६ जनासँग ५ करोड ८ लाख ३४ हजार ४ सय रुपैयाँ (प्रतिडलर १२० रुपैयाँका दरले हिसाब गर्दा) लिइएको छ।
यसैगरी १६ जनाबाट ४४ लाख १६ हजार रुपैयाँ संकलनगरिएको छ। यो दुवै रकम जोड्दा कुल ५ करोड ५५ लाख ५० हजार ४ सय रुपैयाँ हुन्छ। तर, बोन ट्राभल्सले नेपाल एयरलाइन्सलाई मात्रै कुल ५ करोड ४८ लाख ४३ हजार रुपैयाँ तिर्नु पर्छ। यसरी तिरेको रकमबाट पनि ५ प्रतिशत कमिसन वापत बोन ट्राभल्सले २७ लाख ४२ हजार १ सय ५० रुपैयाँ नेपाल एयरलाइन्सबाट पाउँछ। यो रकम र टिकटबाट उडाएर नेपाल एयरलाइन्सलाई तिरेर बाँकी रहेको रकम ७ लाख ७ हजार ४ सय रुपैयाँ जोड्दा बोनको आम्दानी ३४ लाख ४९ हजार ५ सय ५० हुन आउँछ।
मन्त्रालय अध्ययन गर्दै
नेपाल एयरलाइन्सको जहाज चार्टरको विषय विवादमा आएसँगै मन्त्रालयले अध्ययन गर्ने भएको छ। मन्त्रालयका सचिव तथा निगम सञ्चालक बोर्ड अध्यक्ष केदारबहादुर अधिकारीले पनि सत्यतथ्य के हो बुझेरमात्रै बोल्ने बताए। यसैगरी मन्त्रालयका सहसचिव तथा निगम सञ्चालक बोर्ड सदस्य बुद्धिसागर लामिछानेले पनि अध्ययन गर्ने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789792206.jpg)
-1786602170.png)
