कोरोना अपडेट

लकडाउन उल्लंघन गरेको भन्दै सशस्त्र प्रहरीद्वारा निर्घात कुटपिट

दिनेश शर्मा सोमबार, चैत १७, २०७६ ११:५७

राजविराज–भारतीय क्षेत्रबाट सामान किनेर फर्कदै गरेका दुई युवालाई आईतबार सशस्त्रका प्रहरीले सीमा क्षेत्रमा निर्घात कुटपिट गरेका छन्। कुटपिटपछि दुवै युवा घाईते भएका छन्।

भारतीय क्षेत्रबाट नेपाल प्रवेश गर्दै गरेका वलान बिहुल गाउपालिका–३ मौवाहाका हरेकृष्ण साह र चन्दर यादवलाई सशस्त्र प्रहरी बल सीमा सुरक्षा कार्यालय राजविराजअन्तर्गतको बोर्डर आउट पोष्ट रामनगर कोदरकट्टीको प्रहरी टोलीले कुटपिट गरेको हो।

नेपाल प्रवेश गरेपछि बलान नदीमा रोकेर प्रहरीले आफूुहरुलाई गोरु कुटेझै लठ्ठीले हिर्काएको पीडितले बताए। प्रहरीले उनीहरुलाई कुटपिट गरेको भिडियो पनि सार्वजनिक भएको छ। उक्त भिडियोमा प्रहरीले निर्मम तरिकाले युवकलाई लाठीले हानेको देखिन्छ र कुट्दाकुट्दै लाठी भाँचिएपछि अर्को लाठी लिएर पुनः उनीहरुमाथि कुटपिट गरिएको छ।

नेपाल–भारत सीमानजिकै रहेको भारतीय बजार लौकाहाबाट औषधि किनेर घर फर्किने क्रममा प्रहरीले आफुहरुलाई कुटपिट गरेको युवाहरुले वताएका छन्। लकडाउन उल्लंघन गर्ने भन्दै कुटेको चन्दरले बताए।

घाईते दुवै युवाको बलानविहुल गाउँपालिकास्थित स्वास्थ्य चौकीमा उपचार गरिएको छ। बलान बिहुल गाउपालिकाका अध्यक्ष दयानन्द गोईतले भने लकडाउनको नाममा प्रहरीले ज्यादति गरेको बताए। सम्झाईवुझाई गर्नुपर्ने बेलामा प्रहरी नै यसरी ज्यादतिमा उत्रनु खेदजनक भएको उनको भनाइ छ। ‘औषधिलगायतका अति आवश्यक वस्तु खरिद÷विक्री गर्न पाउनु उनीहरुको अधिकार हो,’ उनले भने, ‘नेपालभन्दा भारतीय बजारनजिक भएकाले उनीहरु त्यता गएका होलान्, कुरै नबुझी कुटपिट गर्नु दुःखद हो ।’

सशस्त्र प्रहरी वल सीमा सुरक्षा कार्यालय सप्तरीका एसपी उद्धव न्यौपानेले पनि प्रहरीबाट गल्ति भएको स्वीकारे। ४÷५ जना युवाहरु दैनिक रुपमा भारत जाने र सामान खरिद गरेर नेपाल छिर्ने गरेको र पटक–पटक सम्झाउँदा पनि अटेर गरेकाले त्यस्तो परिस्थिति उत्पन्न भएको वताएका
उनले सम्झाएर काम गर्नुपर्ने ठाउँमा कुटपिट गर्नु गलत भएको स्वीकारे। ‘उक्त घटनामा संलग्न दुवै प्रहरीलाई मैले जिल्लामा झिकाएको छु’ न्यौपानेले भने, ‘अनुसन्धान र छानबिनपछि उनीहरुलाई कारबाही हुन्छ ।’