वासिङ्टन- अमेरिकी राष्ट्रपति डोनाल्ड ट्रम्पले न्यूयोर्क शहरमा दुई साता लामो ‘लकडाउन’ गर्ने निर्णय बेठिक रहेको बताएका छन्। स्थानीय राजनीतिक नेताहरु र स्थानीयबासीले कोरोना भाइरसको महामारी अरु बढ्ने चेतावनी दिइरहेपनि राष्ट्रपति ट्रम्पले लकडाउन समस्याको समाधान नभएको जिकीर गरेका हुन्।
तर अमेरिकी रोग नियन्त्रण तथा रोकथाम केन्द्र (सिडिसी) ले शनिबार नै स्थानीयबासीलाई अत्यावश्यक बाहेक अन्य परिस्थितिमा घरबाहिर ननिस्कन सुझाव दिएको छ।
राष्ट्रपति ट्रम्पले आइतबार एक ट्वीट गर्दै भनेका छन्, ‘न्यूयोर्कमा क्वारेन्टाइनको जरुरत छैन।’ स्थानीयबासीलाई अन्य राज्य र शहरको भ्रमणमा जाँदा वा न्यूयोर्क प्रवेश गर्दा क्वारेन्टाइनमा राख्नुपर्छ भन्ने चौतर्फी माग गरिए पनि राष्ट्रपति ट्रम्पले यस्तो धारणा नै गलत रहेको दाबी गरेका छन्।
राष्ट्रपति ट्रम्पले यसअघि अरु राज्यहरु खासगरी फ्लोरिडा राज्यले चिन्ता व्यक्त गरेपछि आवातजावत खुलै राख्नुपर्ने धारणा अघि सारेका हुन्। उनले संवाददाताहरुलाई अति संक्रमण फैलिएको न्यूयोर्क निवासीका कारण छिमेकी राज्य फ्लोरिडामाथि दबाब परेको पनि उल्लेख गरे।
तर न्यूयोर्कका गभर्नर एन्ड्रु कुमो र न्यूजर्जीका गभर्नर नेड लामोन्टले राष्ट्रपतिको भनाइप्रति तीब्र असन्तोष व्यक्त गरेका छन्। अमेरिकी वित्तीय क्षेत्रमै संकट आउने भन्दै दुवै गभर्नरले मानिसको आवतजावतमा कडाइ गर्नुपर्ने बताएका हुन्।
राष्ट्रपति ट्रम्पले ट्वीटमा भनेका छन्, ‘ह्वाइट हाउसको कोरोना भाइरस कार्यदलको सुझाव तथा न्यूयोर्क, न्यूजर्जी र कनेक्टिकट राज्यका गभर्नरसँगको परामर्शपछि मैले सिडिसीलाई विशेष ट्राभल एड्भाइजरी (यात्रासम्बन्धी सल्लाह) जारी गर्न आदेश दिएको छु।’
त्यसलगत्तै सिडिसीले तत्काल लागू हुनेगरी १४ दिनसम्म अत्यावश्यक परेको अवस्थामा बाहेक तीनवटा राज्यमा यात्रा नगर्न र घरभित्रै बस्न तीनै राज्यका स्थानीयबासीलाई आग्रह गरेको छ।
संयुक्तराज्य अमेरिकामा भेटिएका कूल संक्रमित संख्या १ लाख २४ हजार ६ सय ८६ मध्ये न्यूयोर्कमा मात्र ५३ हजार ५ सय २० मा कोरोना संक्रमण देखिएको छ। न्यूयोर्कमा शनिबारमात्र १५५ जनाको मृत्यु भएको छ, र योसहित न्यूयोर्कमा कूल मृतकको संख्या ८ सय ३४ जना पुगिसकेको छ।
जोन हप्किन्स विश्वविद्यालयका अनुसार कोरोना भाइरसका कारण अमेरिकामा २ हजार १ सय ९१ जनाको मृत्यु भइसकेको छ। छिमेकी राज्य न्यूजर्जीमा ११ हजार १ सयभन्दा बढी संक्रमित व्यक्ति भेटिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1732445217.webp)
