काठमाडौं– सरकारले निजी कम्पनीसँग किनेको र चीनले नेपाललाई सहयोग गरेका स्वास्थ्य सामग्रीसहित आइतबार बिहानै नेपाल वायुसेवा निगमको विमान त्रिभुवन अन्तर्राष्ट्रिय विमानस्थलमा अवतरण भयो। पहिलो चरणमा चिनियाँ पक्षबाट नेपालले पाएका मेडिलक सहयोगमा चीन सरकारभन्दा त्यहाँका व्यापारिक समूहबाट प्राप्त सहयोग धेरै छ।
नेपाल वायु सेवा निगमको विमान शनिबार चीनको ग्वान्जाओ पुगेर उक्त सहयोग ल्याएको हो।
सरकारी तहमा नेपाललाई काठमाडौंस्थित चिनियाँ दूतावास र सिचुवानबाट सहयोग प्राप्त भएको हो। त्यस्तै निजी क्षेत्र अन्तर्गत व्यापारिक समूहहरु अलिबाला फाण्डेसन, ज्याक्मा फाउन्डेसन, चाइना इन्जिनियरिङ लिमिटेड, सिचुवान ह्वाङ्सी ग्रुप र ह्वाङ्सी सिमेन्टले सहयोग प्रदान गरेका हुन्।
कसले कति दिए?
चिनियाँ दूतावास र सिचुवान प्रदेश सरकारले नेपालालई एन–९५ मास्क २ हजार, डिस्पोजेबल सर्जिकल मास्क २४ हजार, डिस्पोजेबल मास्क २० हजार, ग्लोब्स ५ सय, इन्फ्रारेड थर्मोमिटर १०० थान, प्रोटेक्टिभ क्लोथ ५ सय ३० र एक थान पोर्टेबल भ्यान्टिलेर लगायत रहेको छ।
त्यस्तै अलिबाला फाण्डेसन र ज्याक्मा फाउन्डेसनले एकलाख एन–९५ मास्क र २० हजार पीसीआर मेसिन दिएको छ। चाइना इन्जिनियरिङ लिमिटेड, सिचुवान ह्वाङ्सी ग्रुप र ह्वाङ्सी सिमेन्टले पनि विभिन्न मेडिकल सामग्री दिएका छन्।
चिनियाँ दूतावासले दोस्रो चरणको सहयोग अप्रिल २ मा आइपुग्ने बताएको छ।
नेपालले मागेको सहयोग
नेपालले कोरोना संक्रमणको उपचारका लागि आवश्यक मेडिकल सामग्रीका लागि चीन सरकारलाई आग्रह गरेको थियो। नेपालले गत हप्ता कोरोना संक्रमितको उपचारका लागि आवश्यक पर्ने सामग्रीहरुको सूची चीनलाई बुझाएको थियो। स्वास्थ्य मन्त्रालयले आवश्यक सूची बनाएपछि सरकारले परराष्ट्र मन्त्रालयमार्फत चीनसँग २ लाख पर्सनल प्रोटेक्टिभ इक्विपमेन्ट (पीपीई), पीसीआर टेस्ट किट एक लाख, भीटीएम एक लाख, एन ९५ मास्क डेढ लाख थान मागेको थियो।
त्यसैगरी ल्याबसहितको एम्बुलेन्स १० थान, मोबाइल एम्बुलेन्स ५ थान समेत नेपालले चीनसँग मागेको थियो। गत हप्ता नेपालका लागि चिनियाँ राजदूत होउ याङ्छीले नेपाललाई सहयोग पुर्याउन आफूहरु तयार रहेको बताएकी थिइन्। ‘हामी नेपालका लागि प्रार्थना गर्दैछौँ,’ उनले ट्विटरमा लेखेकी थिइन, ‘हाम्रा नेपाली साथीहरूलाई सहयोग पुर्याउन चिकित्सा सामग्रीहरू ककेसम्म मिलाउँदै छौँ। हामी साथमा छौँ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
