कोरोना अपडेट

कोरियन एयरले उडान अनुमति नपाउँदा कोरियामा संकलित स्वास्थ्य सामग्री पठाउन समस्या

शिव भुसाल आइतबार, चैत १६, २०७६ १०:३७

सोल- नेपालमा कोरोना परीक्षणका लागि आवश्यक स्वास्थ्य सामग्री सहयोग गर्न कोरियाका नेपालीले साढे १४ करोड कोरियन वन (करिब डेढ करोड नेपाली रुपैयाँ) संकलन गरेका छन्। गैर आवासीय नेपाली संघ दक्षिण कोरियाको नेतृत्व र अन्य स्वतन्त्र अभियन्ताको सक्रियतामा चार दिनसम्म अर्थ संकलन अभियान सञ्चालन गरी यो रकम संकलन गरिएको हो।

शनिबार साँझसम्ममा १४ करोड २६ लाख ३७ हजार ७ सय ७९ कोरियन वन (करिब १ करोड ४१ लाख रुपैयाँ) संकलन भएको एनआरएनए कोरियाका अध्यक्ष यज्ञराज सुवेदीले जानकारी दिए। हाल अर्थ संकलन अभियान बन्द भए पनि कतिपय जिल्ला समितिले रकम जम्मा गरिरहेकाले यो रकम १४ करोड ७५ लाख वन पुग्ने अनुमान गरिएको संघका महासचिव विमल सुवेदीले जानकारी दिए। संकलित रकमको व्यवस्थापन एनआरएनए कोरियाले गर्नेछ।

संकलित रकमबाट संस्थाले आवश्यक स्वास्थ्य सामग्री खरिदका लागि सुझाव दिन डा देवीबहादुर बस्नेतको नेतृत्वमा सल्लाहकार समिति गठन गरी आवश्यक प्रक्रिया अघि बढाएको जानकारी समेत दिएको छ। रकम संकलन अभियान सुरु गर्दा किट मात्र सहयोग गर्ने भनिए पनि सहयोग रकम बढेकाले थप सामग्री पनि पठाउने तयारी गरिएको महासचिव सुवेदीले नेपाल लाइभलाई बताए।

किट खरिदका लागि करिब ४ करोड कोरियन वन खर्च भएको र बाँकी रकमबाट थप सामग्री खरिदका लागि छलफल भइरहेको उनको भनाइ छ। किटका साथै पिपिई, मास्क, स्यानिटाइजर र बिरामीलाई दोस्रो चरणमा परीक्षणका लागि आवश्यक पर्ने स्वास्थ्य उपकरण खरिद गर्ने विषयमा छलफल जारी रहेको संस्थाले जनाएको छ।

स्वास्थ्य सामग्री खरिद गरी नेपाल पठाउने विषयमा भने समस्या परिरहेको संस्थाको भनाइ छ। किटलाई न्यून तापक्रममा २४ घण्टाभित्र भण्डारण गर्नुपर्ने भएकाले चीनको बाटो हुँदै पठाउन नसकिने महासचिव सुवेदी बताउँछन्। अप्रिल ३ तारिखका दिन नेपालमा रहेका कोरियाली नागरिक लिन कोरिया सरकारले नेपालसँग अनुमति मागेको भएपनि नेपाल सरकारले अनुमति दिइसकेको छैन। कोरियन एयरलाई नेपाल सरकारले अनुमति नदिएका कारण एनआरएन कोरियाले खरिद सम्झौता गरी उत्पादन भइरहेका किट नेपाल पठाउने विषयमा अन्योल बढेको संस्थाको भनाइ छ।

नेपालका सम्बन्धित निकायले कोरियामा उत्पादन भइरहेका सामग्री प्रयोगयोग्य भएको सिफारिस गरी नसकेकाले पनि थि अन्योल सिर्जना भएको संस्थाका पदाधिकारी बताउँछन्। ‘नेपालबाट सामग्री पठाउनुस् भन्नेमात्र जवाफ आउँछ। यस्तो सामग्री प्रयोगयोग्य छ, नेपालमा यस्तो नपठाउनुस् भन्ने प्रतिक्रिया नै आउँदैन,’ एनआरएनए कोरियाका एक पदाधिकारीले भने।

पहिलो चरणमा किट पठाइसकेपछि अन्य सामग्री विज्ञको सल्लाहका आधारमा खरिद गरी पठाउने प्रक्रिया थालिने संस्थाले जनाएको छ। अन्य सामग्री पठाउनका लागि पनि कोरियाबाट चीन जाने जहाज नियमित उडानमा नरहेकाले समस्या परिरहेको सुवेदीको भनाइ छ।

कोरियाबाट सहयोगस्वरुप पठाउन लागिएका स्वास्थ्य सामग्रीको नेपालमा दुरुपयोग नहोस् भन्ने उद्देश्यले ती सामग्रीमा नै एनआरएनए कोरियाको लोगो प्रिन्ट देखिने गरी तयार गरिने संस्थाका सचिव मनोज गौतमले बताए।

‘नेपालमा पनि हामीले अरु कसैलाई जिम्मा दिनुपर्ने हुन्छ। त्यसको कहीँ कतैबाट दुरुपयोग नहोस् भन्नका लागि 'नट फर सेल' लेखेर एनआरएनए कोरियाको लोगो प्रिन्ट गरी सामग्री पठाउने विषयमा छलफल गरिरहेका छौँ,’ उनले भने।