काठमाडौं– निर्णायक खेलमा विराटनगर किंग्सलाई ६ विकेटले पराजित गर्दै सिवाइसी अत्तरिया धनगढी प्रिमियर लिग (डिपिएल) टी–२० क्रिकेट प्रतियोगिताको प्लेअफमा पुगेको छ। हारसँगै विराटनगर भने बाहिरिएको छ। यसअघि रुपेन्देही च्यालेन्जर्स बाहिरिएको थियो।
योसँगै डिपिएलको समूह चरणका खेल सकिएको छ। अंक तालिकाको शीर्ष स्थानमा रहेको काठमाडौं गोल्डेन्स, दोस्रो स्थानको टिम चौराहा धनगढी, तेस्रो स्थानको महेन्द्रनगर युनाइटेड र चौथौ स्थानको अत्तरिया प्लेअफमा पुगेका हुन्। अब पहिलो क्वालिफायरमा काठमाडौं र धनगढीबीच प्रतिस्पर्धा हुनेछ। एलिमिनेटरमा महेन्द्रनगर र अत्तरियाबीच प्रतिस्पर्धा हुनेछ। दुवै खेल मंगलबार हुनेछ। पहिलो क्वालिफायरको विजेता टिम फाइनलमा पुग्नेछ। हार्ने टिमले एलटिमिनेटरको विजेतासँग दोस्रो पटक फाइनलमा स्थान बनाउनका लागि खेल्नेछ।
आइतबार भएको समूह चरणको अन्तिम खेल चिसो मैदानले प्रभावित बनेपछि ६ ओभरमा घटाइएको थियो। ६ ओभरमा विराटनगरले दिएको ५६ रनको लक्ष्य अत्तरियाले ४ विकेटको क्षतिमा २ बल बाँकी छदा पार गर्यो । अत्तरियाको जितमा दीपेन्द्रसिंह ऐरीले २० रन र विपिन चन्द्रले नटआउट २६ रन जोडे।
अन्तिम ओभरमा ७ रन चाहिएको स्थितिमा दीपेन्द्रले पहिलो बलमा पारस खड्कालाई छक्का प्रहार गरे। दोस्रो बलमा १ रन चाहिदा उनी आउट भएका थिए। तेस्रो बलमा सन्दीप जोरा पनि बोल्ड भएका थिए। तर भूपेन्द्र थापाले १ रन लिँदै अत्तरियालाई जित दिलाए। अत्तरियाले पहिलो ओभरमै २ विकेट गुमाएको थियो। गौरव चितकरा शून्य र कुशल भुर्तेल ४ रनमा आउट भए। दुवैलाई विराटनगरका रामनरेश गिरीले क्याचआउटको शिकार बनाएका थिए।
त्यसअघि टस हारेर पहिले ब्याटिङ गरेको विराटनगरले निर्धारित ६ ओभरमा ३ विकेट गुमाएर ५५ रन जोड्यो। विराटनगरका लागि बाबर हायतले ७ बलमा १ चौका र १ छक्काको मद्दतमा १४ रन र अनिलकुमार साहले १२ बलमा २ छक्काको मद्दतले १५ रन जोडे। कप्तान पारस खड्का ८ बलमा ९ रन जोडेर आउट भए। दिलीप नाथले ९ बलमा समान १ चौका र छक्का प्रहार गर्दै नटआउट १५ रन बटुले। बलिङतर्फ अत्तरियाका कमलसिंह ऐरीले २ विकेट लिए भने शुभांकर उरावले २ विकेट हात पारे।
तस्बिर : क्रिकेटिङ नेपाल डटकम
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
