मैथिलीमा माइकिङ गर्दै गाउँपालिका, मेयरको घरदैलो र हात धुवाउँदै पूर्वमन्त्री

कोरोना अपडेट

दिनेश शर्मा बिहीबार, चैत ६, २०७६ २१:५३

राजविराज- सप्तरीको तिलाठि-कोइलाडी गाउँपालिकाले कोरोना भाइरससम्बन्धी मैथिली भाषाका प्रचार सामग्री तयार गरी माइकिङ सुरु गरेको छ। बिहीबार बसेको जनस्वास्थ्य आपतकालीन व्यवस्थापन उप-समितिको बैठकको निर्णयअनुसार प्रचारप्रसार सुरु गरिएको हो।

कोरोना भाइरस सर्ने तरीका र बच्नका लागि अपनाउनुपर्ने उपायका बारेमा माइकिङ गरी जानकारी दिन थालिएको गाउँपालिका अध्यक्ष शतिस सिंहले बताए। गाउँपालिकाले भारतसँग सीमा जोडिएका नाकामा हेल्प डेस्कसमेत संचालन गरिरहेको उनको भनाइ छ।

यसैगरी, वडा नं ८ स्थित प्राथमिक स्वास्थ्य केन्द्र तोपामा दुई वेडको क्वारेन्टाइन सुरु गरिएको र हरेक स्वास्थ्य संस्थाले सेवाग्राहीको तापक्रम मापन गरी रेकर्ड राख्ने व्यवस्थासमेत मिलाइएको उनले बताए।

गाउँपालिकाअन्तर्गतका सबै निकायमा स्यानिटाइजर र प्रचार सामग्री पठाई सर्वसाधारणलाई जानकारी दिन निर्देशनसमेत दिइएको विपद व्यवस्थापन अधिकृत राजेश झाले बताए।
जिल्ला प्रहरी कार्यालय सप्तरीले समेत बिहीबारैदेखि माइकिङ गर्न र सर्वसाधारणलाई सचेत गराउन थालेको प्रहरी उपरीक्षक कृष्ण प्रसाईंले बताए। प्रहरीले यसअघि पनि कोरोनासम्बन्धी विभिन्न प्रकारका चजनचेतनामुलक कार्यक्रम गर्दै आएको थियो।

मेयरको घरदैलो
डाकनेश्वरी नगरपालिकाका मेयर शिवनारायण साहले कोरोना भाइरसका विषयमा जानकारी दिन घरदैलो सुरु गरेका छन्। नगरबासीलाई सुरक्षित बनाउन प्रचार सामग्रीसहित आफूले घरदैलो गरिरहेको साहले जानकारी दिए।

आफ्नो नगरपालिकाको सीमा जोडिएको देश भारतमा विभिन्न सहरमा कोरोनाका कारण ४ जनाको मृत्यु तथा १ सय ८० जना संक्रमित भइसकेकाले नगरबासीलाई सुरक्षित राख्न चुनाव प्रचार प्रसारकै शैलीमा आफूले जनचेतना फैलाउन सुरु गरेको साहले बताए।

भाइरसबाट जोगिन भारतीय क्षेत्रबाट आउने व्यक्तिको चेकजाँचका लागि सीमा क्षेत्रमै हेल्प डेस्क स्थापना गरी चेकजाँचको व्यवस्थासमेत मिलाइएको नगरपालिकाले जनाएको छ।

हात धुवाउँदै पूर्वमन्त्री
नेपाल कम्युनिस्ट पार्टीका नेता तथा पूर्वमन्त्री उमेशकुमार यादवले जनचेतना र हात धुवाउँने कार्यक्रम सुरु गरेका छन्। राष्ट्रिय युवा संघ नेपालको सहयोगमा कार्यक्रम सुरु गरेका यादवले बिहीबार राजविराजका सबैभन्दा बढि भिड लाग्ने मालपोत तथा जिल्ला प्रशासन कार्यालयमा कार्यक्रम गरे।

कोरोनाबाट बच्न हात धुने बानी बसाउँलगायतका जानकारी दिँदै हिडेका यादवले कार्यालय समयपश्चात स्थानीय गजेन्द्र चोकमा पनि कार्यक्रम गरे। यो कार्यक्रम जिल्लाका १८ वटै स्थानीय तहमा पुर्‍याउने उनको भनाइ छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।