रोल्पा- रोल्पाका चार सामुदायिक विद्यालय समायोजनको अन्तिम तयारीमा रहेका छन्। रोल्पा नगरपालिका १ मा रहेको तारा माध्यमिक विद्यालय र वडा नं. २ मा रहेको बालकल्याण नमूना माध्यमिक विद्यालय समायोजनको अन्तिम तयारीमा छन्।
यसैगरी रोल्पा नगरपालिका ६ मा रहेको राष्ट्रिय मावि कोटगाउँ र वडा नं. ७ मा रहेको बालउदय मावि माडीचौर पनि समायोजनको अन्तिम तयारीमा रहेका छन्।
२०२३ सालमा स्थापना भएको बालकल्याण नमूना मावि जिल्लाको पुरानो माध्यमिक विद्यालय हो। नेपाल सरकारको एक निर्वाचन क्षेत्र एक नमूना माध्यमिक विद्यालय कार्यक्रम अन्तर्गत हाल सो विद्यालय नमूना माविको रुपमा रहेको छ। २ हजार ६ सय बढी विद्यार्थीले अध्ययन गरिरहेको सो विद्यालयमा हाल मानविकी, शिक्षा, व्यवस्थापन र विज्ञान संकायमा प्लस टू सम्म पढाइ हुँदै आएको छ।
विद्यालयमा हाल सिटिइभिटी अन्तर्गत सिभिल ईन्जिनियरिङ विषयमा डिप्लोमा तह र सोहि विषयमा १८ महिने सबओभरसियरको पढाइ हुँदै आएको छ।
२०३८ सालमा स्थापना भएको तारा मावि वामरुकमा हाल ५ सय बढी विद्यार्थीले अध्ययन गरिरहेका छन्। विद्यालय समायोजनका लागि आधारपत्र तयार गर्न एक समिति गठन गरिएको छ। विद्यालय रहेका दुवै वडाका वडाध्यक्ष, दुवै विद्यालयका प्रधानाध्यापक, विद्यालय व्यवस्थापन समितिका अध्यक्षहरु र नगर शिक्षा शाखाका अधिकृत स्तरको कर्मचारी रहने गरी ७ सदस्यीय समायोजन कार्यदल गठन गरिएको बालकल्याण नमूना माविका प्रधानाध्यापक मधुसुदन पोख्रेलले जानकारी दिए।
'समितिले समायोजनको समग्र मापदण्ड र आधारपत्र तयार गर्छ,' प्रधानाध्यापक पोख्रेलले भने। 'दुवै विद्यालयको समायोजनपछि नयाँ शैक्षिक संस्थाको जन्म हुन्छ,' तारा माविका प्रधानाध्यापक ओविलाल महराले भने, 'शैक्षिक गुणस्तर सुधारका लागि विद्यालय समायोजन गरेका हौं।'
'विद्यालयको नामाकरण, जनशक्ति व्यवस्थापन, विद्यालय व्यवस्थापन समिति, भौतिक र आर्थिक सम्पत्ति व्यवस्थापनलगायत समग्र मोडालिटी तयारीका लागि गठित समितिले दिएको आधारपत्रका आधारमा शैक्षिक सत्र २०७७ देखि एउटै शिक्षण संस्थाबाट पठन पाठन सुरु गर्ने गरी समायोजनको तयारी गरिरहेका छौं,' प्रधानाध्यापक महराले भने।
रोल्पा नगरपालिका ६ मा रहेको नेपाल राष्ट्रिय मावि कोटगाउँ र वडा नं. ७ मा रहेको बालउदय मावि माडीचौर पनि समायोजनको अन्तिम तयारीमा रहेको रोल्पा नगरपालिकाका प्रमुख पूर्ण केसीले जानकारी दिए। 'नगरपालिकाभित्रका यी चार विद्यालय समायोजन भएर २ विद्यालयमा भएसँगै पठनपाठनमा समेत सुधार हुने अपेक्षा गरेका छौं.' नगर प्रमुख केसीले भने।
चार माध्यामिक विद्यालय समायोजनसँगै अन्य विद्यालयलाई पनि समायोजनका लागि दबाब सिर्जना हुने नगर प्रमुख केसीले बताए। नगरपालिकाले यसअघि विद्यालय समायोजनको कार्यक्रम अघि सारे पनि राजनैतिक दबाबलाई थेग्न नसकेर पछि हटेको थियो। यस पटक भने समुदायकै सक्रियतामा समायोजन कार्य अघि बढेको हाे।
विद्यालय समायोजनका लागि चारवटै विद्यालयले विभिन्न चरणमा छलफल अघि बढाएका थिए। चारवटै विद्यालयका विद्यालय व्यवस्थापन समितिको छुटाछुट्टै बैठक बसेर समायोजनमा जाने निर्णय गरेसँगै संयूक्त बैठक बसी समायोजन कार्यदल निर्माण गरेका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
