काठमाडौं- बुधबार दिउँसो १ बज्न लागेको थियो। उद्योग, वाणिज्य तथा आपूर्ति मन्त्रालयमा पत्रकारको आवातजावत बढ्दै गयो।
उद्योग राज्यमन्त्री मोतीलाल दुगडले अनौपचारिक शैलीमा पत्रकार भेटघाट कार्यक्रम आयोजना गरेका थिए।
उनले अनौपचारिक रूपमा पत्रकार भेटघाट भएका कारण सबै पत्रकारलाई आफ्नै कार्यकक्षको सभाहलमा बोलाए।
विभिन्न सञ्चार माध्यम सम्बद्ध करिब एक दर्जनभन्दा बढी पत्रकार त्यहाँ पुगेका थिए। उनले यो भेटघाट गर्नुको कारण थियो, 'आफ्नो भारत भ्रमणपछिका अनुभव र उपलब्धिबारे पत्रकारसँग कुराकानी गर्ने।'
राज्यमन्त्री दुगड मार्च ६ र ७ मा भारतमा आयोजना भएको इकोनोमिक टाइम्स ग्लोबल बिजनेस समिटमा सहभागी भएर फर्किएका थिए। कार्यक्रमका वक्ताका रूपमा भाग लिएर उनी मंगलबार नेपाल फर्केका थिए।
समानुपातिक निर्वाचन प्रणालीतर्फ नेकपाबाट सांसद्मा मनोनित भएका थिए व्यवसायी दुगड। विराटनगरबाट व्यापारिक क्षेत्रमा उदाएका दुगडले 'पार्टीलाई सहयोग' गरेकै कारण समानुपातिक सांसद बन्ने सौभाग्य पाएका थिए।
राज्यमन्त्री दुगडले आफ्नो भारत भ्रमणबारे 'ब्रिफिङ'सँगै पत्रकारलाई सानो 'टोकन' दिए, जुन उनकै स्वामित्वका कम्पनीको प्रचार सामग्री थियो। पत्रकार भेटघाटको अवसर छोपेर दुगडले सेन्चुरी ब्राण्डको प्रचार गरेका थिए।
सांसद मनोनित हुँदै मन्त्री भएका दुगड यो पदमा आसीन रहुञ्जेल कम्तीमा दुगड ग्रुपका प्रबन्धक मात्रै होइनन्, जनताको करबाट तलब खाने सेवक हुन्। उनै दुगडले बुधबार आफ्नो यो भूमिका बिर्संदै मन्त्रालयमा आफ्नै स्वामित्वको कम्पनी र उत्पादनको प्रचार सामग्री बाँड्न भ्याए। जुन सामान्य हिसाबले मन्त्रीको नैतिक दायित्वभन्दा धेरै परको विषय थियो।
यसले मन्त्री दुगड जनताको सेवा गर्न भन्दा आफ्नै व्यवसाय विस्तारको निहित उद्देश्य पूर्ति गर्न झन्डा हल्लाउँदै सिंहदरबार प्रवेश गरेको प्रष्ट देखाउँछ।
मन्त्री मात्रै होइन, जनताको करबाट तलब भत्ता बुझ्ने सम्पूर्णको उद्देश्य राष्ट्रसेवा हुनुपर्ने हो। तर उद्योगी दुगडले आफू मन्त्री भएको ख्याल गरेनन् वा यो पदको गरिमा बुझेनन्।
उनले पत्रकारलाई सानो उपहार भन्दै ‘सेन्चुरी स्पाइस एन्ड स्न्याक्स'को एउटा सानो प्याकेट दिए। त्यसको अर्कोपट्टि भने आफ्नो कम्पनीको प्रोफाइलसमेत राखिएको थियो। प्याकेटभित्र भने एउटा कलम राखिएको थियो। कलममा पनि दुगड स्पाइस एन्ड फुट प्रोडक्ट प्रालिको ट्याग छ।
जुन राज्यमन्त्री दुगडकै उद्योग हो। त्यसमा उनकै लगानी छ। उनले किन यसो गरे? त्यसकै एउटै कारण हो आफ्नो कम्पनीको विज्ञापन गर्नु।
उनले अनौपचारिक पत्रकार भेटघाटको सुरू गर्दै भनेका थिए, 'अहिले सरकारले निजी क्षेत्रका सबै समस्या समाधान गर्न सकेकै कारण निजी क्षेत्र निकै खुशी भएको र सरकारले पनि उनीहरूलाई निकै माया गरेको छ।'
व्यापारिक पृष्ठभूमिबाट हुर्किएका दुगडले निजी क्षेत्रको बारेमा वास्तविकता भन्दा बाहिर गएर उनीहरूको पक्षमा बोल्नु वा सरकारले खुशी पार्न सकेको भनेर दावी गर्नु अनौठो कुरा भएन। तर, उनले निजी क्षेत्रको पक्षमा यतिसम्म भन्न भ्याए कि, 'अहिले बजारमा माक्समा भएको कालाबजारी र नाफाखोरी जायज हो।’ उनले कार्यक्रममा पटक–पटक १० रूपैयाँ पर्ने माक्सलाई २०–२५ रूपैयाँमा व्यापारीले बेच्न पाउनुपर्ने बताइरहे।
जबकी कालोबजारी तथा केही अन्य सामाजिक अपराध सम्बन्धी ऐन २०३२ ले कुनै पनि वस्तुमा २० प्रतिशतभन्दा बढी मूल्य तोकिए कालोबजारी र नाफाखोरी भएको ठहरिन्छ।
मन्त्री दुगडले कालोबजारी गर्ने व्यापारीको पृष्ठपोषणमा यतिसम्म भन्न भ्याए कि, 'निजी क्षेत्र सरकारको ज्वाँइ जस्तै हो। उसलाई आदर, सत्कार र भरणपोषण गर्नुपर्छ। मन्त्रालय पसल हो र उद्योगी निजी क्षेत्र हाम्रा ग्राहक हुन्।’
अहिले बजारमा देखिएको वस्तु अभाव र कालोबजारी तथा बिचौलियाको अवस्थालाई दुगडले कुन हदसम्म उपेक्षा गरेका छन् र कति सामान्य रूपमा लिएर व्यापारीको पृष्ठपोषण गरिरहेका छन् भन्ने उनको एक–एक शब्दमा झल्कन्थ्यो।
कोरोना कहरका कारण अस्तव्यस्त बजारका बारेमा दुगडले आफैँ भने बोलेनन् तर संचारकर्मीहरूको प्रश्नमा दिएको जवाफ निकै गैरजिम्मेवार थियो।
'अलिकति गल्ती सबैले गर्छन्, सबैबाट हुन्छ। वस्तु अभाव छ तर कुनै बज्रपात भएको होइन,' उनले भने, 'व्यापारीहरूले नराम्रो मात्रै गरे भनेर हुँदैन। पैसा ठूलो होइन स्वास्थ्य ठूलो कुरा हो।’
दुगड मन्त्री मात्र होइन, देशभरका उद्योगी व्यवसायीको समस्या सुन्दै समाधानको बाटोतर्फ लैजानुपर्ने जिम्मेवार व्यक्ति पनि हुन्। उनले आफ्नो यो भूमिका बिर्सँदै आफू मंसिर ५ गतेयता यो देशको उद्योग राज्यमन्त्री हुँ भन्ने बिर्सिएका छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
