काठमाडौं– नेपाल नागरिक उड्डयन प्राधिकरणले निर्माण अन्तिम चरणमा पुगेसँगै गौतमबुद्ध अन्तर्राष्ट्रिय विमानस्थलमा सुरुवाती चरणमा अन्तर्राष्ट्रिय उडान गर्ने एयरलाइन्स कम्पनीलाई भन्दै तयार पारेको छुट योजना अस्वीकृत भएको छ। प्राधिकरणले झन्डै ६ महिना अगाडि नै छुट को प्याकेज बनाउँदै संस्कृति, पर्यटन तथा नागरिक उड्डयन मन्त्रालयलमा पठाएको थियो।
मन्त्रालयले पनि अर्थ मन्त्रालयको सहमति लिँदै उक्त प्रस्ताव मन्त्रिपरिषदमा पठाएको थियो। तर, मन्त्रिपरिषदेको विधायन समितिबाट उक्त छुट दिने प्रस्ताव अस्वीकृत भएको हाे।
पर्यटन मन्त्रालयका एक सह-सचिवले हचुवाको भरमा आर्थिक पाटो नै विश्लेषण नगरी पठाइएको विमानस्थल सञ्चालनको सुरुवाती चरणमा दिने छुट प्याकेज अस्वीकृत भएको जानकारी दिए। प्राधिकरणले विमानस्थल सञ्चालन गर्ने तयारी गरेसँगै अन्तर्राष्ट्रिय उडान गर्ने एयरलाइन्स कम्पनीलाई दुई वर्षसम्म दिने छुटको प्याकेज तयार पारे पठाएको थियो।
प्राधिकरणको बोर्ड बैठकले छुटको प्याकेज तयार पार्दै मन्त्रालयमा पठाएको थियो भने मन्त्रालयले पनि अर्थ मन्त्रालयको सहमतिमा मन्त्रिपरिषद् पठाइएको थियो।
यस्तो थियो छुट प्याकेज
अन्तर्राष्ट्रिय वायुसेवा कम्पनीलाई दिने छुट प्याकेज प्राधिकरणले २०२० डिसेम्बर ३१ सम्ममा गौतमबुद्ध अन्तर्राष्ट्रिय विमानस्थलमा उडान गर्ने गरी प्रस्ताव पेस गर्ने अन्तर्राष्ट्रिय वायुसेवा कम्पनीहरुलाई दुई वर्षसम्मको प्रोत्साहन प्याकेज दिने गरी प्रस्ताव मन्त्रालयमा पठाएको थियो।
- उडान सञ्चालन गरेको मितिले पहिलाे एक वर्षसम्म अवतरण शुल्क, पार्किङ शुल्क, सञ्चार तथा सुरक्षा शुल्कमा शतप्रतिशत छुट दिने।
- उडान गरेको दोस्राे वर्षको हकमा भने यी सबै शीर्षकमा ५० प्रतिशत शुल्क छुट दिने।
सञ्चालन आधार स्थल तोक्ने वायुसेवा कम्पनीको हकमा यस्तो सुविधा
गौतमबुद्ध अन्तर्राष्ट्रिय विमानस्थललाई सञ्चालन आधार स्थल तोक्ने अन्तर्राष्ट्रिय उडान गर्न प्रस्ताव गर्ने नेपालमा दर्ता भएका वा हुने वायुसेवा कम्पनीहरुलाई पनि प्रोत्साहन प्याकेज दिने भनेको थियो।
- वायुसेवा कम्पनीहरुलाई आफैँ भूमिस्थ प्रबन्ध सेवा (सेल्फ ग्राउन्ड ह्यान्डलिङ) सेवा सञ्चालन गर्न दिने।
- ह्याङगर निर्माण गर्न चाहेने वायुसेवा कम्पनीलाई ५ वर्षसम्म जग्गा भाडामा छुट दिने।
- फ्लाइट क्याटरिङ गर्न चाहने वायुसेवा कम्पनीहरुलाई विमानस्थलमा जग्गा उपलब्ध गराउने।
अन्य सहुलियत तथा प्रोत्साहन सुविधा
- वायुयान मर्मत सम्भार संस्था (एमआरो) सञ्चालन गर्ने संस्थालाई ५ वर्ष जग्गा भाडा छुट दिने।
- भूमिस्थ प्रबन्ध सेवा उपल्बध सेवा उपलब्त्र गराउने संस्थाहरुलाई पनि ५ वर्षसम्म प्राधिकरणले लिने शुल्कमा छुट।
- वायुसेवा कम्पनीले होटल सञ्चालन गर्न चाहेमा विमानस्थलमा जग्गा उपलब्ध गराउने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
