काठमाडौं- कोरोना संक्रमणको सन्त्रास बढेसँगै विश्वभरका विभिन्न गन्तव्य र नेपालबाट विभिन्न गन्तव्यमा हवाई यात्रा गर्ने यात्रुको संख्यामा गिरावट आएको छ।
नेपाल नागरिक उड्डयन प्राधिकरण त्रिभुवन अन्तर्राष्ट्रिय विमानस्थल कार्यालयका अनुसार उडान संख्या र अन्तर्राष्ट्रिय हवाई यात्रुको संख्यामा गिरावट आएको छ।
कार्यालयका अनुसार जनवरी महिनामा मात्रै अन्तर्राष्ट्रिय उडान संख्यामा १ दशमलव ६७ प्रतिशत घटेको थियो। तर, फेब्रुअरीमा भने उडान संख्यामा ६ दशमलव ८३ प्रतिशतले कमी आइसकेको छ। यसैगरी विमानस्थल कार्यालयका अनुसार यात्रु संख्यामा भने भारी गिरावट आएको छ।
जनवरीमा सामान्य गिरावट आएपनि फेब्रुअरी भने अन्तर्राष्ट्रिय हवाई यात्रुको संख्यामा भारी गिरावट आएको छ। विमानस्थल कार्यालयका अनुसार जनवरीमा अन्तर्राष्ट्रिय हवाई यात्रुको संख्या सन् २०१९ को तुलनामा ६ दशमलव ८३ प्रतिशतले कमी आएको हो।
सन् २०१९ को जनवरीमा अन्तर्राष्ट्रिय हवाई यात्रुको संख्या ३ लाख ५५ हजार ४ सय ४४ थियो। कोरोनाको संक्रमण विश्वभर फैलिएसँगै सन् २०२० को जनवरीमा नेपाल हुँदै विश्वका विभिन्न गन्तव्यमा उडान गर्ने यात्रुको संख्या झन्डै २४ हजारले घटेर ३ लाख ३१ हजार १ सय ५० मा आएको छ।
यसैगरी सन् २०१९ को जनवरीमा काठमाडौं विमानस्थलमा २ हजार ८ सय ७९ वटा उडान तथा अवरतण भएको थियो भने सन् २०२० मा यो पनि घटेर २ हजार ८ सय ३१ मा झरेको छ। यसैगरी फेब्रुअरीमा भने अन्तर्राष्ट्रिय हवाई यात्रुको संख्या सन् २०१९ को तुलनामा सन् २०२० मा झन्डै ५३ हजारले कमी आएको छ।
सन् २०१९ को फेब्रुअरीमा ३ लाख ३० हजार २५ अन्तर्राष्ट्रिय हवाई यात्रु थिए भने यो संख्या सन् २०२० को फेब्रुअरीमा घटेर २ लाख ७७ हजार ८८ मा झरेको छ। जनवरीमा घटेको यात्रु संख्या ६ दशमलव ८३ प्रतिशत थियो भने फेब्रुअरीमा घटेको यात्रुको संख्या १६ दशमलव ०४ रहेको छ।
यसैगरी सन् २०२० को फेब्रुअरीमा उडान संख्यामा पनि ६ दशमलव ८० प्रतिशतले गिरावट आएको छ। सन् २०२० को फेब्रुअरीमा २ हजार ३ सय ४२ वटा उडान तथा अवतरण भएको छ। जुन संख्या सन् २०१९ मा २ हजार ५ सय १३ थियो।
कुन कनु एयरलाइन्सको उडान बन्द
जनवरी र फेब्रुअरीमा मात्रै नेपालबाट उडान गर्दै आएका र चीनको विभिन्न गन्तव्यबाट उडान गर्दै आएका ४ वटा एयरलाइन्स कम्पनीले उडान बन्द गरिसकेका छन्।
नेपालमा अन्तर्राष्ट्रिय उडानको अवस्था
कोरोना भाइरसको प्रभाव रहेका मुलुकहरू चीन, जापान तथा दक्षिण कोरियामा नेपालबाट सिधा उडान रहेको छ भने इरान र इटलीमा भने नेपालको सिधा उडान छैन।
चीन
काठमाडौं र चीनका १० सहरबीच नेपालबाट हिमालय एयरलाइन्स र चीनबाट ५ वटा एयरलाइन्सले सातामा कुल ६५ वटा सिधा उडान गरिरहेकोमा हालको उडान अवस्था देहाय बमोजिम रहेको छः
हङकङ (चीन)
नेपाल एयरलाइन्सले चीनको हङकङमा हप्तामा ३ उडान यथावत् रुपमा गर्दै आएको छ भने हङकङको क्याथे ड्रागनले काठमाडौंमा हप्तामा ५ उडान रहेकोमा यही ३ मार्च २०२० बाट घटाई ४ उडान कायम गरेको छ। यसको मूख्य कारण यात्रुको संख्यामा गिरावट रहेको विमानस्थल कार्यालयले जनाएको छ।
जापानः
नेपाल वायुसेवाले जापानको ओसाकामा हप्तामा ३ उडान गर्दै आएकोमा २ मार्च २०२० देखि ओसाकाको उडान हटाई टोकियोमा हप्तामा ३ उडान प्रारम्भ गरेको छ। यो गन्तव्यको उडान पनि यथावत छ।
दक्षिण कोरियाः
दक्षिण कोरियामा नेपाली वायुसेवाले उडान गरेको छैन। तर कोरियन एयरलाइन्सले सोलबाट हप्तामा ४ उडान यथावत रुपमा गर्दै आएको छ।
कतार
कतारको दोहामा अहिले हिमालय एयरलाइन्स र नेपाल एयरलाइन्सले उडान स्थगित गरिसेका छन्। हिमालयले ९ मार्चदेखि उडान स्थगित गरेको हो भने नेपाल एयरलाइन्सले मंगलबारबाट उडान स्थगित हुने सूचना जारी गरिसकेको छ। तर, कतार एयरवेजले भने उडान यथावत् नै गरिरहेका छन्।
यसैगरी भारत, मलेसिया, साउदीलगायतका देशमा भएका उडान केही घटेपनि कुनै पनि एयरलाइन्सले स्थगित गरेका छैनन्।
उडान संख्यामा सामान्य कमी आएपछि यात्रु संख्या भने अहिले निरन्तर रुपमा घटेको नेपाल नागरिक उड्डयन प्राधिकरणका प्रवक्ता राजकुमार क्षेत्री बताउँछन्। उनको अनुसार पछिल्लो समय यात्रुको संख्यामा ५० प्रतिशतभन्दा बढीले गिरावट आइसकेको छ। उनका अनुसार त्रिभूवन विमानस्थल हुँदै अन्तर्राष्ट्रिय हवाई यात्रा गर्नेको संख्या ११ हजारबाट झरेर ५ हजारको हाराहारीमा आइसको छ। यात्रुको संख्या घटनु भने प्राधिकरणको पनि कारोबार कम हुँदै गएको उनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1772777462.png)
