काठमाडौं- कतारमा कोभिड १९ (कोरोना भाइरस)को संक्रमणको त्रासका कारण कतारस्थित नेपाली दूतावासले अत्यावश्यक कामबाहेक सिधै दूतावासमा नआउनू भन्दै सूचना जारी गरेको छ।
कतार सरकारले अपनाएको सतर्कता र संवेदनशीलतालाई मध्यनजर गर्दै आवश्यक काम परे फोनमार्फत नै खबर गर्न दूतावासले सूचना जारी गरेको हो।
सूचनामा भनिएको छ, ‘अत्यावश्यक अवस्थाबाहेक भेटघाट वा भौतिक सम्पर्क नराख्नु हुन र एक आपसमा टेलिफोन वा इमेलमार्फत सम्पर्क गर्नुहुन अनुरोध छ। दूतावासबाट प्राप्त हुने सेवाका सम्बन्धमा समेत आवश्यक जानकारी लिनुपरेमा भौतिक रुपमा राजदूतावासमा आइराख्नुपर्दैन।’
राजदूतावासको फोन नम्बरमार्फत आवश्यक जानकारी दिन सकिने दूतावासले जनाएको छ।
कतारको स्वास्थ्य मन्त्रालयका अनुसार हालसम्म कतारमा ३ आप्रवासीसहित १५ जनामा कोरोना संक्रमण देखिएको छ।
कुन कुन देशका आप्रवासी भनेर खुलाइएको छैन। कोरोना संक्रमण जोखिम न्यूनिकरणका लागि कतार सरकारले नेपालसहित १४ वटा मुलुक वा ती मुलुक हुँदै प्रवेश गर्ने व्यक्तिलाई रोक लगाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
