काठमाडौं- काठमाडौं पर्यटन व्यवसायीले भुक्तानी गर्दै आएको घरभाडा तथा करमा हालको लागि ५० प्रतिशतसम्मको छुटको व्यवस्था गर्न माग गरेका छन्। पर्यटन व्यावसायसँग जोडिएका ९ संस्थाले संयुक्त रुपमा सरकारसँग यस्तो माग गरेका हुन्।
उनीहरुले अन्तर्राष्ट्रिय रुपमा व्यापक ढंगले फैलिरहेको कोरोना भाइरसको प्रभावले विश्व अर्थतन्त्रलाई असर गरेको सन्दर्भमा समेत मध्यनजर गर्दै सरकारले छुट दिनुपर्ने माग अगाडि सारेका हुन्।
पर्यटन आगमनमा ८० प्रतिशत कमी आइसकेको र अझ बुकिङ भएको पर्यटकको नेपाल आउने तालिका समेत रद्द भइसकेकाले यो क्षेत्रलाई बचाइराख्न पनि सरकारले छुट तथा राहत दिनुपर्ने उनीहरुको माग छ।
अहिलेको परिस्थितिमा पर्यटन व्यवसायी तथा पर्यटन व्यवसायमा भएको लगानी संरक्षण गर्न र व्यवसाय सञ्चालन भइरहन उपयुक्त वातावरणको लागि नेपाल सरकारबाट पर्यटन व्यवसायलाई समस्याग्रस्त क्षेत्र घोषणा गरी राहत प्याकेजको व्यवस्थाको गर्नुपर्ने उनीहरुको माग छ।
व्यवसायीको सात बुँदे माग
१) नेपाल राष्ट्र बैंकले जारी गरेको सहुलियतपूर्ण कर्जाको लागि ब्याज अनुदानसम्बन्धी एकिकृत कार्यविधि २०७५ को संशोधनमा पर्यटन व्यवसायको लागि दिएको कर्जा तथा ब्याजलाई होटलमा दिइँदै आएको पुनर्कर्जाको व्यवस्था ट्राभल्स, पर्यटन यातायातलगायतका पर्यटनसँग सम्बन्धित सम्पूर्ण क्षेत्रमा समेत दिने व्यवस्था गरियोस्।
२) माथीको बुदा नं.१ मा भएको व्यवस्थाअनुसार पर्यटन क्षेत्रको सम्पूर्ण कर्जाको हाल पुनर्तालिका गर्ने तथा ब्याजलाई समेत तत्काल पुँजिकृत गर्ने वा सहुलियत डिमाण्ड कर्जाको व्यवस्था गरी एक वर्षपछिमात्र सावाँसहितको ट्रमलोन भुक्तानी गर्ने व्यवस्था मिलाउने।
३) पर्यटन क्षेत्रमा क्रियाशील श्रमिकहरुलाई आवश्यकताअनुसार कटौती गर्ने व्यवस्था गरियोस् एवं श्रमिकहरुको राहतका लागि सामाजिक सुरक्षा कोषबाट कम्तिमा ५० प्रतिशत राहतको व्यवस्था गरियोस्।
४) कोरोना भाइरसको प्रभावले पर्यटन क्षेत्रमा रहेका श्रमिकहरुलाई पलायन हुन नदिनको लागि नेपाल सरकारले नाथम्सँगको सहकार्यमा निजी क्षेत्रको समन्वयमा विशेष तालिम तथा सेमिनारको व्यवस्था गरियोस्। जसको कारण श्रमिहरुको पेशा तथा दक्षता अभिवृद्धि रहिहोस्।
५) कोरोना भाइरसका कारण पर्यटकहरुले आफ्नो बुकिङ (होटल तथा हवाई टिकट) रद्द गरिरहेकाले पुनर्तालिका वा फुल रिफण्डको लागि व्यवस्था मिलाइयोस्।
६) पर्यटन व्यवसायीले विभिन्न क्षेत्रअन्तर्गत नेपाल सरकारलाई भुक्तानी गर्नुपर्ने कर, राजश्व, वार्षिक सवारी कर तथा स्थानीय करहरुमा ५०प्रतिशत सहुलियत प्रदान गर्ने तथा हाललाई एक वर्षको लागि कुनै पनि दण्ड जरिवाना नगरियोस्।
७) पर्यटन व्यवसायीले भुक्तानी गर्दै आएको घरभाडा तथा कर हालको लागि ५० प्रतिशतसम्मको छुटको व्यवस्था गरियोस्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
