काठमाडौं-शिक्षण अस्पताल, महाराजगञ्जमा प्रधानमन्त्री केपी शर्मा ओलीको मिर्गौला प्रत्यारोपण चलिरहेको छ। शुभचिन्तक र आफन्तहरू सफल प्रत्यारोपणको कामना गरिरहेका छन्। कोही अस्पताल परिसरमै प्लेकार्डसहित बसिरहेका छन्। कसैले फ्लेक्स बोर्डमा लेखेका छन् र कोही अस्पताल परिसरकै मन्दिरमा पूजाआजा गरिरहेका छन्।
तीमध्ये अतिनिकटस्थहरूमा भने प्रधानमन्त्री ओलीको मिर्गौला प्रत्यारोपण सफल हुने आत्मविश्वास बढी देखिन्छ। किनभने उनीहरूलाई प्रधानमन्त्री ओलीले नै आत्मविश्वास दिलाएर अप्रेसन थिएटर पसेका हुन्।
अप्रेसन सुन्नेबित्तिकै हरेक बिरामीको शरीरमा काँडा उम्रिन्छ । त्यसैले सामान्यतया बिरामी आत्तिन्छन् र आफन्तहरूले सम्झाउनुपर्छ अप्रेसनअघि। निश्चिन्त बनाउनुपर्छ, केही पनि हुँदैन भनेर आफन्तले बिरामीलाई।
तर, प्रधानमन्त्री ओलीले निकटस्थहरूलाई उल्टै सम्झाएका छन्, केही पनि हुँदैन भनेर। पूरापूर आत्मबल बोकेर गएका छन् अप्रेसन थिएटरतर्फ। अप्रेसन थिएटरमा जानुअघि भेटेका प्रधानमन्त्रीका राजनीतिक सल्लाहकार विष्णु रिमाल भन्दै थिए, ‘उहाँलाई मिर्गौला प्रत्यारोपण, यससँग जोडिएका जोखिम र त्यसपछि झेल्नुपर्ने समस्या सवै थाहा छ।’ त्यसैले आफू निश्चिन्त बनेर उनले आफन्तलाई पनि आत्मबल दिएका हुन्।
लामो समयदेखि मिर्गौलाको समस्या झेलिरहेका प्रधानमन्त्री ओलीलाई त्यतिमात्रै होइन, ‘मिर्गौला इतिवृत्त’ ज्ञान छ। इतिवृत्त भन्नाले मिर्गौला रोग, यसले पार्ने समस्या र प्रत्यारोपणमात्रै होइन, विश्व चिकित्साले यसमा गरेका पछिल्ला खोजहरूसम्म। कृत्रिम मिर्गौला बनाउने बैज्ञानिकहरूको खोज कहाँ पुग्यो? मिर्गौलाको जस्तै काम गर्ने उपकरण बनाउने विषयमा कुन हदसम्मको सफलता हासिल भयो? आदि इत्यादिको ज्ञानसमेत छ उनलाई। जुन कुरा उनी निकटस्थहरूलाई सुनाइरहन्छन्।
प्रधानमन्त्रीका परराष्ट्र सल्लाहकार राजन भट्टराईले मिर्गौलाका विषयमा धेरै कुरा प्रधानमन्त्री ओलीको मुखबाट सुनेका छन्। उनी भन्छन्, ‘हामीलाई यस्तो परेको भए यति धेरै थाहा हुँदैनथ्यो होला। हरेक कुरालाई मिहीन ढंगले बुझ्न खोज्ने उहाँको बानी छ। मिर्गौलाका विषयमा पनि सानोभन्दा सानो कुरा जानकारी उहाँले राख्नुभएको छ।’
यही ज्ञानका आडमा आफ्नो मिर्गौला प्रत्यारोपण सफल हुने आत्मविश्वास जुटाएका हुन् र आफन्तलाई समेत निश्चिन्त बनाएका हुन्। उनको आत्मविश्वासमा परिस्थितले समेत साथ दिइरहेको अप्रेसन पछिको उपचारका लागि तयार एक चिकित्सक बताउँदै थिए। उनी भन्दै थिए, ‘मिर्गौला प्रत्यारोपणका लागि दाता र प्राप्तकर्ताबीच गरिने जाँचहरूको नतिजा राम्रो आयो। एचएलए टेस्ट पनि राम्रो भएको कुरा गर्दै हुनुहुन्थ्यो अप्रेसनमा संलग्न डाक्टरहरू।’
डाक्टरहरूले पनि प्रधानमन्त्री ओलीको मिर्गौला प्रत्यारोपणमा जटिलता नआउने आश्वासन निकटस्थलाई दिएका छन्। केही समयअघि शिक्षण अस्पताल परिसरकै मनमोहन सेन्टरमा एपेन्डिसाइटिसको अप्रेसन भएको थियो। आफन्तलाई सम्झाउने क्रममा चिकित्सकले यसलाई उदाहरणका रुपमा अघि सारेर भनेका छन्, ‘त्यसको तुलनामा यो सामान्य शल्यक्रिया हो। उहाँको आत्मबलले पनि हामीलाई हौसला मिलेको छ।’ प्रधानमन्त्रीका राजनीतिक सल्लाहकार रिमाल त्यो समयको अप्रेसन आकस्मिक भएकाले पनि जोखिमपूर्ण रहेको बताउँछन्। मिर्गौला प्रत्यारोपण प्रक्रियामा भने आउन सक्ने जोखिम चिकित्सकलाई पहिल्यै थाहा हुन्छ र त्यो अनुसारको योजना तय गरिसकिएको हुन्छ।
त्रिवि शिक्षण अस्पतालमा नेताको पहिलोमात्रै होइन, धेरैको मिर्गौला प्रत्यारोपण गरिसकिएको छ। त्यसैमाथि दोहो¥याएर गरेको सबै प्रत्यारोपण सफल भएको रेकर्ड अस्पतालसँग छ र सफल तुल्याएको अनुभव चिकित्सकसँग। समग्र मिर्गौला प्रत्यारोपणकै तथ्यांक केलाउने हो भनेपनि सफलताको दर उच्च छ। हालसम्म गरिएका प्रत्यारोपणमध्ये ९८.७ प्रतिशत सफल भएका छन्।
ओलीलाई चार दशकदेखि रोगले थल्याउन खोजिरहेको छ, उनले अस्पताल जानुअघि दिएको भिडियो सन्देशमा भनेजस्तै। उनी आत्मविश्वासको हतियारले त्यसलाई परास्त गरिरहेका छन्। संविधानसभा अध्यक्ष सुवास नेम्वाङले ओलीको स्वास्थ्यका विषयमा अनुभव बाँड्दै केही समयअघि भनेका थिए, ‘मैले पहिलोपटक भेट्दा उहाँलाई कब्जियत थियो। अरु उपाय थिएन पिपलमेट चकलेट खाइरहनुहुन्थ्यो।’
जेल बस्दा उनी टीबी रोगले ग्रस्त थिए। ओलीसँगै ९ वर्ष जेल जीवन बिताएका राधाकृष्ण मैनालीले आफ्नो पुस्तकमा उनले दृढ आत्मबलका कारण टिबी जितेको उल्लेख गरेका छन्। २०६० सालपछि उनलाई मिर्गौला रोगले सतायो। २०६४ सालमा उनले भारतको अपोलो अस्पताल पुगेर मिर्गौला प्रत्यारोपण गरे। यो बीचमा पनि उनलाई अरु विभिन्न समस्याले सतायो।
प्रत्यारोपित मिर्गौलासमेत काम नलाग्ने भएपछि यतिबेला उनी शिक्षण अस्पतालको अप्रेसन थिएटरमा नयाँ मिर्गौला फेरिरहेका छन्। प्रत्यारोपण सफल होस्, शिघ्र स्वास्थ्य लाभको कामना प्रधानमन्त्रीज्यू।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
