काठमाडौं- जब भारतमा आतंकवादसम्बन्धी फिल्म बन्छन् कहीँ न कहीँ नेपाल जोडिन्छ नै। अधिकांश फिल्ममा नेपाललाई भारतविरोधी आतंकवादी समूहको आश्रयस्थलकै रुपमा चित्रण गरिएको हुन्छ।
केही समयअघि रिलिज भएको ‘बेबी’ होस् या ‘इन्डिया मोस्ट वान्टेड’ यी दुवैमा नेपाल जोडिएको थियो। र दुवै फिल्ममा नेपालको चित्रण आतंकवादीको आश्रयस्थलको रुपमा देखाइयो।
बेबी भारतविरोधी आतंकवादी गतिविधीमा संलग्न पाकिस्तानी आतंकवादी समूहका नाइकेको खोजीमा केन्द्रित थियो। अक्षयकुमार अभिनित सो फिल्ममा नेपालमा सो समूहका एजेन्टहरु बसेको र नेपालबाट समेत भारतविरोधी गतिविधी हुने गरेको देखाइएको थियो।
अक्षय कुमारको नेपाल यात्रा नेपालमा रहेका आतंकवादी समूहका सदस्य खोज्न भएको थियो। धन्न फिल्ममा मुख्य नाइके नेपालमै रहेको चित्रण भने गरिएन।
हालसालै रिलिज भएको अर्को फिल्म ‘इन्डिया मोस्ट वान्टेड’ पनि नेपालमा बसेर भारतविरोधी आतंकवादी गतिविधीमा सक्रिय नाइकेको खोजीमा केन्द्रित थियो।
अर्जुन कपुर अभिनित सो फिल्मको अधिकांश भाग नेपालको काठमाडौं र पोखरामा खिचिएको थियो। फिल्ममा चित्रण गरिएको पात्र इन्डियन मुज्जाहिद्धिनका नाइके यासिन भट्कलको खोजीमा केन्द्रित थियो। भट्कलको खोजीका लागि भारतीय सुरक्षाकर्मी नेपाल आएर पोखरामा सादा पोशाकमा बसेर आतंकवादी खोजेर ज्युँदै भारत लग्नु नै फिल्मको मुख्य कथा थियो। सो फिल्मले पनि नेपाललाई आतंकवादीको आश्रयस्थल देखाउन राम्रै मेहनत गरेको थियो।
हालै अक्षयकुमार, रणविर सिंह र अजय देवगनको अभिनय रहेको भारतीय फिल्म ‘सूर्यवंशी’को ट्रेलर रिलिज भयो। ट्रेलरमा समावेश दृष्यअनुसार सो फिल्म भारतको मुम्बईमा आतंकवादी गतिविधीमा सक्रिय समूहको खोजी र निस्क्रिय बनाउने कथामा केन्द्रित रहेको सहजै देखिन्छ।
फिल्मको ट्रेलरमा नेपालको कुनै दृष्य समावेश छैन। तर ट्रेलरको प्रारम्भ र अन्त्यमा नेपाल प्रहरीको वाकिटकीको कल साइन सहितको संवाद समावेश गरिएको छ जसले सो फिल्ममा पनि नेपाल जोडिएको देखिएको छ। ट्रेलरको अन्त्यमा पोखरा नआउनु भन्ने शब्द सुनिन्छ। यसले यो फिल्म पनि ‘इन्डियन मोस्ट वान्टेड’ झैं यासिन भट्टकल केन्द्रित झैं देखिएको छ।
नेपाल आश्रयस्थल हो त?
भारतविरोधी गतिविधीमा संलग्न केही आपराधिक समूहका व्यक्तिहरु नेपालमा पक्राउ पर्ने गरेका छन्। मोस्ट वान्टेडमा देखाइएको भट्टकल नेपालको पोखरामै लुकेर बसेको सत्य हो। केही अन्य आपराधिक व्यक्तिहरु समेत नेपालमा पक्राउ परेका नै हुन्।
तर‚ ती जति आपराधिक समूहका सदस्य नेपालमा पक्राउ परे पक्राउमा नेपाल प्रहरीको सक्रियता देखिन्छ। पोखरामा भट्कल लुकेर बसेको पहिल्याउनेदेखि उनलाई पक्राउ गरेर भारत पूर्याउने कामसम्ममा नेपाल प्रहरीले लुकिछिपी काम गरेको थियो। जब उनी फेला परे भारतीय सिमासम्म पूर्याएर उनलाई सिमा कटाउन नेपालकै सुरक्षा एजेन्सीले सघाएकै हुन्।
तर फिल्ममा चित्रण गरिँदा नेपालका सुरक्षा संगठन अपराधी खोज्न सहयोगी होइन, अपराधीको संरक्षणमा सक्रिय झैं देखाइने गरिएको छ। यसले भारतीय फिल्मका दर्शकमाझ नेपाल आतंकवादी समूहको आश्रयस्थलको रुपमा चित्रित हुने खतरा त छ नै, नेपाली सुरक्षा संगठनको छवीसमेत अपराधीको संरक्षकको रुपमा स्थापित हुने जोखिम बढाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1772271039.png)
