‘कार्साङ’को ट्रेलरमा शेर्पा समुदायको कथा

सिनेमा

नेपाल लाइभ शनिबार, पुस २०, २०८१ २०:३०

काठमाडौं– यही पुष २६ गतेबाट प्रदर्शनमा आउने तयारीमा रहेको फिल्म ‘कार्साङ’को ट्रेलर सार्वजनिक गरिएको छ।

अंग्रेजी नयाँ वर्ष २०२५ को अवसर पारेर बुधबार सार्वजनिक तीन मिनेट लम्बाईको ट्रेलरले फिल्मको कथावस्तुबारे जानकारी गराउँछ।

शेर्पा समुदायको परम्परागत संस्कृति र आर्थिक समस्यासँग जुधिरहेको एउटा झाँक्री परिवारको कथालाई ट्रेलरमा मर्मस्पर्शी रुपमा देखाइएको छ।

झाँक्रीको भूमिकामा रहेका फिल्मका मुख्य पात्र दयाहाङ राईलाई समाजले पानी काट्ने चेतावनीबाट ट्रेलर सुरु हुन्छ। त्यसपछि उनी हराएको सन्तान खोज्न निस्किन्छन्। तर, केही पत्तो लाग्दैन। भाकल र हराएको छोरा खोज्न दयाहाङले गर्ने संघर्षमा ट्रेलर केन्द्रित छ। भद्दा र द्विअर्थी संवाद हाबी रहेको ट्रेलरमा जितु नेपाल र दीया मास्केबीचको नोकझोंक रोचक देखिन्छ।

ग्रामीण परिवेशमा आधारित भएर बनेको फिल्ममा सिर्जना निङ्लेखु, बुद्धि तामाङ, कविता आले, यासेली लिम्बू, प्रेम लोप्चन, सृष्टि गौतम, डोमा ह्योल्मो, रविन्द्र झा, सुरवीर पण्डित, कर्मा शेर्पा लगायतको पनि अभिनय छ। भ्लगरको रुपमा परिचित सिर्जनाको यो डेब्यु फिल्म हो। यसमा उनी दयाहाङको श्रीमतीको भूमिकामा छिन्।

फिल्मलाई यम शेर्पाले निर्देशन गरेका हुन्। यो उनको पहिलो निर्देशकीय फिल्म हो। र, पहिलो फिल्ममै उनले आफ्नै समुदायको कथा उठाएका छन्। यसमा उनी स्वयंको लेखन छ। यार्सा फिल्म्स र पुरुषोत्तम प्रधान फिल्म्सको प्रस्तुति रहेको फिल्मका निर्माता तथा छायाँकार पुरुषोत्तम प्रधान हुन्। यसमा गोविन्द बोहरा सह-निर्माता तथा आङछिरिङ शेर्पा कार्यकारी निर्मातामा रहेका छन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

आयात प्रतिस्थापन तथा निर्यात प्रर्वद्धनका लागि सरकारले ठोस कदम चाल्नुपर्छ : अध्यक्ष ढकाल

गृहका १२ सहसचिव र उपसचिवको सरुवा, काठमाडौंसहित ७ जिल्लाका सीडीओ हेरफेर

प्रधानमन्त्री कप महिला क्रिकेटको खेल तालिका सार्वजनिक