काठमाडौ-अदालतले मागेको धरौटी बुझाउन नसकेपछि थुनामा रहेका अभियुक्तलाई छुटाउन सेटिङका लागि घुस लिएको आरोप लागेका एक वकिल आफैं थुनामा पुगेका छन्। जिल्ला अदालत काठमाडौले धरौटी मागेर बुझाउन नसकेपछि थुनामा गएका अभियुक्तलाई छुटाउन प्रयास गरेका कानुन व्यवसायी सोही अदालतको आदेशअनुसार थुनामा पुगेका हुन्।
यसरी रकम असुल गर्ने अधिवक्ता टंकबहादुर राना मगरलाई जिल्ला अदालत काठमाडौले थुनामा पठाएको हो। जिल्ला अदालतले मागेको धरौटी बुझाउन नसकेपछि राना सोमबार पुर्पक्षका लागि थुनामा गएका हुन् ।
राजश्व चुहावट मुद्दामा धरौटी बुझाउन नसकेर थुनामा रहेका एक प्रतिवादीलाई कानुन व्यवसायी रानाले ‘सेटिङ मिलाएर’ छुटाइदिन्छु भन्दै ४२ लाख रुपैयाँ लिएका थिए। रकम लिएर पनि धरौटी छुटाउन नसकेपछि पीडित पक्षले ठगीको उजुरी दर्ता गरेका थिए। उक्त उजुरीमा सुनुवाइ गर्दै जिल्ला न्यायाधीश श्रीकृष्ण भट्टराईको इजलाशले रानासँग १२ लाख धरौटी माग गरेको थियो।
जनन्यायिक कानुनी सेवा नामक कानुन परामर्श केन्द्रका सञ्चालकसमेत रहेका रानामगरले राजश्व छलिको अभियोगमा थुनामा रहेका रमेश दाहाललाई छुटाइदिन्छु भन्दै ४२ लाख रुपैयाँ लिएका थिए।
अभियुक्तका परिवारले दिएको उजुरीका आधारमा महानगरीय अपराध महाशाखाले रानामगरलाई पक्राउ गरेको थियो।
जिल्ला अदालतले दाहालसँग सुरुमा ५ करोड धरौटी माग गरेको थियो। राजश्व चुहावट मुद्दामा जिल्ला अदालत काठमाडौले मागेको धरौटी बुझाउन नसकेपछि उनी त्यसविरुद्ध उच्च अदालत पाटन पुगेका थिए। पाटनले धरौटी घटाएर २ करोड २५ लाख माग गरेको थियो। उक्त रकम पनि बुझाउन नसकेपछि उनी पुर्पक्षका लागि नख्खु कारगार चलान भएका थिए।
थुनामा गएपछि अधिवक्ता राना र विनुता लिम्वुसँग गरि ४२ लाख लिएको कागज गरेका थिए। रानाले बहस गरेवापत नभई सेटिङ गरेर धरौटीमा छुटाउने भन्दै उक्त रकम लिएर कागज गरे पनि धरौटीमा छुटाउन नसकेपछि दाहालका पिताले ठगीको जाहेरी दिएका थिए।
प्रहरीको केन्द्रीय अनुसन्धान ब्यूरो (सीआईबी) ले २७ मंसिर २०७५ मा राजश्व छलि गरेको गरेको अभियोगमा रमेश दाहालसहित ४ जनालाई पक्राउ गरेको थियो।
सीआईबीको अनुसन्धानबाट रमेशसहितका दिनेश शिवाकोटी, जयनारायण श्रेष्ठ, रमेश दाहाल र शरद रिजालसहितका व्यक्तिले भेट्टाएको नागरिकताका आधारमा कम्पनी दर्ता गरी ६८ करोड रुपैयाँ बराबरको कर छलि गरेको पाइएको थियो। राजश्व अनुसन्धानले उनीहरु विरुद्ध सोही बराबर विगो दाबी गर्दै जिल्ला अदालतमा मुद्दा दायर गरेको थियो। उक्त मुद्दामा जिल्ला अदालतले दाहालसँग ५ करोड धरौटी माग गरेको थियो। अदालतले मागेको धरौटी बुझाउन नसक्ने भने पछि उनी थुनामा गएका थिए।
प्रहरीका अनुसार अदालतको आदेशानुसार रमेश जेल चलान भएपछि अधिवक्ता रानामगरले सेटिङ मिलाएर उनलाई छुटाइदिने भन्दै परिवारबाट ४२ लाख रुपैयाँ लिएका थिए।
जग्गाधितो अदालतले स्वीकार नगरेपछि विवाद
तर कानुन व्यवसायी रानाले भने उक्त रकम आफूले नभई जग्गा जेथा जमानत राख्न लिएको दाबी गरेका छन्। ६० लाख बराबरको जग्गा जेथा जमानत राख्ने सहमति भएको र सोही कारोबारका लागि ४२ लाख लिएको तर त्यसमा आफूले २ लाखमात्र लिएको दाबी उनले अदालतमा गरेका छन्। रकम जग्गा जेथाजमानत दिने जयराम फुयाँल र प्रेमबहादुर पराजुलीको मन्जुरीमा जाहेरवाला तीर्थराज दाहाल र विनुता लिम्बूबीच जम्मा ६० लाखमा कार्य सम्पन्न गर्ने भनी करार भएको दाबी उनले गरेका छन्।
अदालतले जेथा स्वीकार नगरेपछि जेथा जमानतको जग्गा दिन जग्गाधनीलाई दिएको रकम फिर्ता गर्नु भनी जाहेरवालाले भनेकोमा जग्गाधनीले उक्त रकम घर बनाउन प्रयोग गरी समयमा फिर्ता नदिएपछि ठगीमा उजुरी गरेको बयान उनले दिएका छन्।
उक्त रकम बापतमा जग्गाधनीले उक्त जग्गा नै पास गरिदिन्छु भनेकोमा पनि निज जाहेरवालाले घर सल्लाह गरी खबर गर्छुभन्दा उक्त खबर नगरी एकैपटक फसाउने कुनियत राखी लेनदेन तथा करारका देवानी मुद्दामा जानुपर्नेमा फौजदारी अन्तर्गतको ठगीमा आएका दाबी गरेका छन्। उनले अदालतमा उक्त रकम जाहेरवालालाई काम नभएपछि फिर्ता दिनु भनी आफूले बारम्बार जग्गाधनीलाईसमेत अनुरोध गरेको तर दिन नसकेका कारण ठगीको मुद्दा आएको जिकीर उनले अदालतमा गरेका छन्।
जमानतका लागि काठमाडौं दक्षिणकाली नगरपालिका ८ मा रहेको कित्ता नम्बर ८० र ८१, प्रेमबहादुर पराजुलीको नाममा दर्ता कायम रहेको र किनं ३२९ र जयराम फुयाँलको नाममा दर्ता कायम रहेको जग्गा खरिद गर्ने तयारी भएको बयान उनले दिएका छन् ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775566576.png)
-1764146706.png)
