काठमाडौं– काठमाडौं गोल्डेन्स् धनगढी प्रिमियर लिग (डिपिएल) क्रिकेट प्रतियोगिताको प्लेअफमा प्रवेश गरेको छ। शुक्रबार भएको खेलमा विराटनगर किंग्सलाई ५ विकेटले पराजित गर्दै काठमाडौंले लगातार चौथो जित निकालेर प्लेअफमा स्थान पक्का गरेको हो। विराटनगरको भने यो दोस्रो हार हो।
विराटनगरले दिएको १ सय ६५ रनको लक्ष्य काठमाडौंले अन्तिम बलमा ५ विकेटको क्षतिमा पार गर्यो। अन्तिम बलमा जितका लागि १ रन चाहिएको स्थितिमा कप्तान ज्ञानेन्द्र मल्लले छक्का प्रहार गर्दै काठमाडौंलाई रोमाञ्चक जित दिलाएका हुन्। काठमाडौंलाई जिताउन कप्तानी इनिङ खेलेका ज्ञानेन्द्रले नटआउट ६८ रन जोडे। उनले ४० बलमा ५ चौका र ४ छक्का प्रहार गरे। त्यस्तै सनी पटेलको नटआउट २५ रन पनि काठमाडौंका लागि महत्वपूर्ण सावित भयो। पटेलले १० बलमा १ चौका र ३ छक्का हिर्काएका थिए।
त्यसअघि ओपनर अमित श्रेष्ठ ५ रनमा आउट हुँदा उनका ओपनिङ पार्टनर सुवोध भाटीले १० रन भन्दा बढी बटुल्न सकेनन्। तर भुपेन्द्र थापाले २८ बलमा ३ चौका र २ छ्क्काको मद्दतले ३६ रन जोडेर काठमाडौंको इनिङलाई उकासेका थिए। नरेश बुढाऐर शून्य रनमा आउट भएपछि ब्याटिङमा आएका पुष्प थापाले १७ बलमा २४ रन जोडे।
बलिङतर्फ विराटनगरका बसन्त रेग्मीले २ विकेट लिए। मञ्जित श्रेष्ठ, शुभम् कामत र कप्तान पारस खड्काले १–१ विकेट हात पारे।
अंक तालिका
त्यसअघि टस जितेर पहिले ब्याटिङ गरेको विराटनगरले ८ विकेट गुमाएर १ सय ६४ रन जोड्यो। काठमाडौंका लागि बाबर हायतले उत्कृष्ट ब्याटिङ गरे। उनले ३३ बलमा ६७ रन जोडे। हायतले सुवोध भाटीबाट बोल्ड हुनुअघि ३ चौका र ७ छक्का प्रहार गरेका थिए। दिलीप नाथले २७ बलमा ४ चौका र १ छक्काको मद्दतमा ३३ रन बटुले। उनका ओपनिङ पार्टनर अनिलकुमार साह१० रनमा आउट हुँदा शुभम् कामत शून्य र पवन सराफ २ रनमै पेभिलियन फर्के। बसन्त रेग्मी १० रनमा आउट हुँदा कप्तान पारस खड्काले ४ बल खेल्दा १ चौका र १ छक्काको मद्दतमा नटआउट ११ रन बटुले। सौरभ खनालले ५ बल खेल्दा ९ रन जोडे।
बलिङतर्फ काठमाडौंका ललितनारायण राजवंशीले ४ ओभरमा ३ विकेट लिए। रासिद खानले २ विकेट लिए भने सुवोध भाटीले १ विकेट हात पारे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
