काठमाडौं-नेपाली बजारमा महंगा र विलासी कार भित्रने क्रम तीव्र भएको छ। एकातिर व्यवसायीहरु सरकार ‘सवारी व्यवसायमैत्री’ नभएकाले बिक्री घटेको रटान दिइरहेका छन् भने अर्कोतर्फ तिनै व्यवसायीहरु नयाँ र विलासी ब्रान्ड ल्याउन तछाडमछाड गरिरहेका छन्।
गत साउनमा पहिलोपटक जर्मन विलासी ब्रान्ड अउडीको कार नेपाल भित्रिएको थियो। त्यसयता टेस्लाका कारसमेत नेपाल भित्र्याउने क्रममा भन्सारमा अड्किएको छ। आधिकारिक बिक्रेताविना नै आयात गरिएकाले ती गाडीको भन्सार पास हुन सकेको छैन। त्यस्तै किशोर गेयरले बेलायती ब्रान्ड ज्यागुअरको आइपेस कारसमेत नेपाल भित्र्याएको छ।
यस्तैमा स्वीडिस ब्रान्ड भोल्भोदेखि इटालीयन ब्रान्ड मासेरातीसम्म नेपाल ल्याउन व्यावसायिक घरानाहरु व्यापक लबिङमा लागेका छन्। सवारी व्यवसायमा राम्रो मुनाफा भएको, उत्पादित वस्तु ल्याएर बिक्री गर्ने हुँदा जोखिम कम हुने लगायत कारण व्यवसायीहरु ट्रेडिङ विजनेसमा केन्द्रित भएका हुन्।
इटालीको मासेराती ब्रान्डको आधिकारिक बिक्रेतामार्फत् नेपाल भित्र्याउन पञ्चकन्या समूह तीव्र लबिङमा लागेको छ। समूहले मासेरातीको एसिया प्यासिफिक कार्यालयलाई आधिकारिक बिक्रेता बन्न पत्र पठाएको छ। यस विषयमा कम्पनीले कुनै प्रतिक्रिया जनाइसकेको छैन। मासेराती नै भित्र्याउन अर्का व्यवसायी कपिल शिवाकोटीसमेत लागि रेका छन्। कुनै एक ग्रुपसँगको समन्वयमा उनले मासेराती ब्रान्ड ल्याउन लागेको एक व्यवसायीले बताए। उनैसँग जिज्ञासा राख्दा यस विषयमा तत्कालै प्रतिक्रिया जनाउने अवस्था आइनसकेको बताए।
स्वीडेनको ब्रान्ड भोल्भो ल्याउन शंकर समूह लागिपरेको छ। भोल्भोका प्यासेन्जर कार तथा ट्रक/बस विश्वभर चर्चित छन्। शंकर समूह प्यासेन्जर कार भित्र्याउन जस्तोसुकै हतकण्डा अपनाउन लागि परेको व्यावसायिक वृत्तमा चर्चा छ। त्यस्तै भोल्भोका सवारीको आधिकारिक बिक्रेता बन्न पञ्चकन्या समूहसमेत लागिरहेको छ। भोल्भोका कन्स्ट्रकसन इक्युपमेन्ट हाल पञ्चकन्या समूहले नै भित्र्याउँदै आएको छ। त्यसैले यसमा पञ्चकन्या समूहले आफ्नो स्वाभाविक दाबेदारी प्रस्तुत गरे पनि अन्य व्यवसायीहरु भोल्भोको आधिकारिक बिक्रेता ल्याउन लागिपरेका छन्।
इलेक्ट्रिक कारमा विश्व बजार तताएको अमेरिकी ब्रान्ड टेस्लाका कार दुई छुट्टाछुट्टै कम्पनी ग्यालेक्सी अटोमोटिभ्स प्रालि र श्रीमा डिस्ट्रिब्युसन नेपाल प्रालिले आधिकारिक बिक्रेताको दाबी गर्दै नेपाल भित्र्याएका थिए। तर भन्सारमा आधिकारिक बिक्रेताको पत्र पेश गर्न नसक्दा हालसम्म ती गाडी भन्सारमै थन्किएका छन्। तर व्यावसयिक घरानाहरु आधिकारिक बिक्रेता बनेर टेस्ला नेपाल भित्र्याउन लागिगरेका छन्।
टेस्लाको आधिकारिक बिक्रेता बन्ने ज्योति समूह कम्मरकसेर लागेको छ। समूह विभिन्न माध्यमबाट टेसलसँग सम्पर्क स्थापित गर्दै आधिकारिक बिक्रेता बन्ने दाउमा रहेको छ। अर्को एउटा समूह समेत एनआरएनको सहयोगमा टेस्लाको आधिकारिक बिक्रेता बन्ने दौडमा रहेको छ।
जर्मन विलासी ब्रान्ड बगुवार्ड नेपाल भित्र्याउन सुरुमा नेपाल उद्योग वाणिज्य महासंघकी अध्यक्ष भवानी राणा, औषधि व्यवसायी प्रवलजंग पाण्डे तथा व्यसायी भरत आचार्य एउटा कम्पनीमार्फत ल्याउने तयारीमा थिए। सम्झौताकै चरणमा पुगेका उनीहरु एकाएक पछिहटेका हुन्। यसमा सवारी व्यवसायी देवस्वरुप महर्जनको समेत चर्चा थियो। हाल उनै महर्जनले बगुवार्ड ब्रान्ड भित्र्याउने निश्चित गरेका छन्। महर्जनले भ्याली कोल्डस्टोका बाबुराजा रावलसँग मिलेर उक्त ब्रान्ड ल्याउन लागेका हुन्। बगुवार्डको गाडी नेपाल ल्याउन सिपमेन्ट भइसकेको स्रोतको भनाइ छ।
यसका साथै जर्मन ब्रान्ड अउडीको आधिकारिक बिक्रेतामा समेत भन्सारले प्रश्न उठाएको छ। प्रिन्सा अटोमोटिभ्सले आफू आधिकारिक बिक्रेता भएको प्रमाण भन्सारमा बुझाउन नसकेपछि अउडीको बिक्रेता बन्ने समेत व्यवसायीहरुको लबिङ सुरु भइसकेको छ।
भारत प्रवेश गरेको चिनियाँ सवारी ब्रान्ड ग्रेटवाल नेपाल ल्याउनसमेत व्यवसायीहरु लागिपरेको यसअघि नेपाल लाइभले लेखेको थियो। कुनै पनि कम्पनीसँग लिखित सम्झौता भइनसकेकाले अन्य व्यवसायीहरु समेत सक्रिय भएका छन्।
ग्रेटवाल मोटर्स गोयन्का र सारडा समूहले संयुक्त रुपमा ल्याउने गरि मौखिक सहमति भएको उनीहरुले दाबी गरेका छन्। दुई समूहले एउटा कम्पनी माफर्त नेपालमा ग्रेटवाल तथा यसको ब्रान्ड हाभालका सवारी ल्याउने गरि मौखिक सम्झौता गरेका स्रोतले बताएको थियो। अन्य उपयुक्त ब्रान्डका सवारी ल्याउन व्यवसायीहरु अध्ययनमा लागेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
