दुर्गा कार्कीको कथा संग्रह 'कुमारी प्रश्नहरू' आउँदै

नेपाल लाइभ | २०७६ फागुन १ बिहीबार | Thursday, February 13, 2020 १८:२३:०० मा प्रकाशित

काठमाडौँ- दुर्गा कार्कीको प्रथम कृति ‘कुमारी प्रश्नहरू’ आगामी फागुन ९ गते सार्वजनिक हुने भएको छ। पब्लिकेसन नेपालयले कार्कीको यो कथा संग्रह बजारमा ल्याउन लागेको हो। 

कथा संग्रहमा सामाजिक यथार्थवादका कोणबाट लेखिएका १३ कथा समावेश छन्।

‘दुर्गा कार्कीको पुस्तकबाट २०२० को आफ्नो प्रकाशन शुरु गर्न पाएकोमा हामी एकदम हर्षित छौं। आफ्नो लेखन मार्फत उनी सामाजिक न्यायको मुद्दामा चलाखीपूर्ण तरिकाले प्रस्तुत हुन्छिन्। लिङ्गभेदका विसंगतीलाई उमेर अनुसारका महिला पात्रका दृष्टिकोणबाट अभिव्यक्त गर्छिन्,’ नेपालयकी भूषिता वशिष्ठले भनिन्, ‘चातुर्यपूर्ण गद्य शैली र आकर्षक कथा बुनावट कार्की को विशेषता हो। उनको यही शैलीले उनलाई अखबार लेखनमा ख्याति र लोकप्रियता दिलाएको छ।’

कथाकारका रूपमा पहिलोपटक आउँदा आफूलाई खुशी लागेको प्रतिक्रिया कथाकार कार्कीले दिएकी छन्। 

‘किताबको पहिलो प्रति पाउँदा समेत मलाई मेरा कथाहरू साँच्चिकै किताबको रूपमा आए भनेर विश्वास नै लागेन, यिनमा काम गरेर साँच्चै सकियो र भन्ने लागिरह्यो,' कथाकार कार्कीले भनिन्, ‘यी प्रत्ये‍क कथालाई मैले कम्तीमा पनि बीस पटक पढेकी छु, हरेक पटक केही न केही थपघट गरेकी छु र कतिलाई त महिनौँ सोचाइको गर्भमा बोकेर हिँडेकी छु। मलाई आशा छ, पाठकहरू यी कथाबाट पटक्कै निराश हुनु पर्दैन।’

नेपाली प्रकाशनको बजार मन्द रहेको गुनासो र चर्चा भैरहका बेला नेपालयले २०२० को तालिका सार्वजनिक गर्दै ४ महिला लेखकहरूको सामग्री प्रकाशन गर्ने लक्ष्य लिएको छ। 

‘दुर्गा आफ्नो कथा लेखनमार्फत ताजापन बोकेर आएकी छिन्। मलाई आशा छ यो किताबले बजारलाई उत्साही बनाउने छ र पुनर्जीवन दिनेछ,’ पब्लिकेसन नेपालयकी सिइओ. सैजन मास्के भन्छिन्, ‘यो शृङ्खलाका चारवटै पुस्तकले भिन्दै शैली र कथानक बोकेर आएका छन्; त्यसैले यिनले नेपाली समकालिन साहित्य र प्रकाशन उद्योगलाइ सकारात्मक योगदान पुर्याउने विश्वास लिएको छु ’ सैजनले भनिन्।

कार्की लेखनका अनेकौं पुरस्कार प्राप्त गरेकी लोकप्रिय स्तम्भकार पनि हुन्। दुर्गा कार्कीको पढाई कानून हो , रुचि लेखन।

साहित्य उनको उपासना हो जसमा कथा उनको आफ्नै शैली र शिल्पले सशक्त बन्छन्।

‘कुमारी प्रश्नहरू’ को मूल्य ४२५ रुपैँया निर्धारण गरिएको छ। कार्कीको सो पुस्तक नेपालका पुस्तक बिक्रेताका साथै एमेजन डट कममार्फत् संसारभर उपलब्ध हुनेछ।