काठमाडौं- भरपर्दा ब्याट्सम्यान शरद भेषावकर नेपाली क्रिकेट टिमबाट आउट भएका छन्।
योसँगै शरदले आइसिसी विश्वकप क्रिकेट लिग–टु अन्तर्गत नेपाल, अमेरिका र ओमानबीचको त्रिदेशीय सिरिज गुमाउने भएका छन्। शरदको मांसपेशीमा समस्या आएपछि उनी टिम बाहिर भएको नेपाली क्रिकेट टिमका म्यानेजर ऋषिराम गौतमले जानकारी दिएका छन्।
ओमानविरुद्धको खेलमा ५५ रन बनाएका शरदलाई त्यही खेलमा समस्या देखिएको थियो। समस्या आए पनि उनी खेलिरहेका थिए। तर डाक्टर र फिजियोथेरापिष्टकाे सल्लाहअनुसार उनले अबका खेल गुमाउने टिम म्यानेजर गौत्तमले बताए।
‘नेपाली टिमका फिजियो र टिमको सल्लाहअनुसार उनलाई १० दिनको विश्राम दिइएको हो। हामीले आइसिसीलाई रिपोर्ट पठाइसकेका छौं’, टिम म्यानेजर गौत्तमले नेपाल लाइभसँग भने।
लयमा देखिएका शरदलाई एक्कासी यस्तो समस्या किन आयो? गौतमले थपे, ‘दाइकाे केही दिनअघि निधन भएका कारण उनले निकै दिन नुन बारे। केही दिन अभ्यास पनि गरेनन्। जसले गर्दा उनको मांसपेशीमा समस्या आयो।’
शरदको स्थानमा सुवास खकुरेललाई टिममा बोलाइएको छ। पछिल्लो समयमा सुवास पनि निकै लयमा देखिएका छन्। अमेरिकाविरुद्धको अभ्यास खेलमा सुवासकै अर्धशतकमा नेपालले जित हात पारेको थियो।
सुवासलाई टिममा ल्याएसँगै ओपनिङमा परिवर्तन हुने सम्भावना देखिएको छ। यसअघि कप्तान ज्ञानेन्द्र मल्ल र पूर्वकप्तान पारस खड्काले ओपनिङ गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
