काठमाडौं- आइसिसी विश्वकप क्रिकेट लिग–टु अन्तर्गत त्रिदेशीय सिरिजमा ओमानविरुद्ध नेपालले टस जितेर बलिङ गर्ने निर्णय गरेको छ।
त्रिवि क्रिकेट मैदानमा नेपालले टस जितेर बलिङ गर्ने निर्णय गरेसँगै ओमानले ब्याटिङ गर्ने भएको छ। खेल केही बेरमा सुरु हुनेछ।
एकदिवसीय अन्तर्राष्ट्रिय सिरिजमा सुशान भारी र अभिनाष बोहराले डेब्यु गरेका छन्।
ज्ञानेन्द्र मल्ल (कप्तान), दिपेन्द्रसिंह ऐरी (उपकप्तान), पारस खड्का, सन्दीप लामिछाने, करण केसी, आरिफ शेख, बिनोद भण्डारी, अभिनाश बोहरा, सुशान भारी, रोहितकुमार पौडेल र शरद भेषावकर प्लेइङ इलाभेनमा छन्।
अहिलेसम्म नेपाल र ओमानबीच ५० ओभरको खेलमा ७ पटक प्रतिस्पर्धा भएको छ। जसमा ओमानले ४ खेलमा जित हात पार्दा नेपालले ३ खेलमा मात्रै जितेको छ।
सन् २००२ मा भएको एसीसी ट्रफिमा नेपालले पहिलो पटक ओमानसँग प्रतिस्पर्धा गरेको थियो। जुन खेलमा नेपालले ओमानलाई १०५ रनले पाखा लगाएको थियो। त्यसपछि २०१० मा भएको एसीसी ट्रफिमै ६ विकेटले ओमानलाई पराजित गरेको नेपालले सन् २०१३ मा भएको आइसिसी विश्व क्रिकेट लिग डिभिजन(थ्री मा २८ रनले पराजित गरेको थियो।
यसपछि भने नेपालले ओमानसँग ५ खेलमा प्रतिस्पर्धा गरेको छ तर सबै नतिजा ओमानलाई सुम्पिएको तितो यथार्थ छ।
नेपालमाथि ओमानको विजयी सुरुवात सन् २०१४ एसिसी प्रिमियर लिगबाट भयो‚ जहाँ नेपाल ओमानसँग २ विकेटले पराजित भएको थियो। सन् २०१५ मा भएको खेलमा दोस्रो पटक ओमानसँग नेपाल ३ विकेटले पराजित भएको थियो। २०१८ मा आयोजना भएको आइसिसी विश्व क्रिकेट लिग डिभिजन(टु मा ओमानसँग ६ विकेटले स्तब्ध बनेको नेपाल एसिया कप छनोटमा पनि ७ विकेटले पराजित भएको थियो।
पछिल्लो समयमा ब्यहोरेको हारको पूर्णविराम लगाउने नेपालको लक्ष्य छ। तर ओमान पनि कमजोर टिम भने होइन। एकपछि अर्को खेलमा नेपालमाथि हावी हुँदै आएको ओमान फेरि त्यस्तै नतिजा निकाल्ने लक्ष्यमा छ।
के हो लिग-टु ?
आइसिसी विश्व कप क्रिकेट लिग-टु सन् २०२३ मा आयोजना हुने विश्वकपसम्म पुग्ने बाटो हो।
लिग-टु मा अहिले सात देश छन्। २०१९ को अगष्टबाट नै सुरु भएको यो लिग-टु मा नेपाल, अमेरिका, ओमान, स्कटल्यान्ड, नामिविया, युएई र पपुवा न्युगिनी रहेका छन्। जसमा अमेरिका, स्कटल्यान्ड र पपुवा न्युगिनीले समान ८-८ खेल खेलिसकेका छन् भने, नामिविया, र युएईले समान ७-७ खेल खेलिसकेका छन्। यता ओमानले भने ६ खेल खेलेको छ। नेपालको भने ओमान र अमेरिकासँगको सिरिज नै पहिलो हो।
यसरी एउटा टिमले लिग-टु मा ३६ वटा खेल खेल्नेछ। लिग-टु बाट शीर्ष ३ टिमले २०२३ को विश्व कप छनोटमा सिधै स्थान बनाउने छन्।
बाँकी चार टिमले पनि विश्वकप छनोटमा प्रवेश गर्न अर्को मौका पाउने छन्। जसलाई आइसिसीले प्लेअफको नाम दिएको छ।
जहाँ लिग-टु बाट आएका ४ टिम र च्यालेन्ज लिगबाट आएका शीर्ष २ टिमसहित ६ टिमले प्लेअफमा प्रतिस्पर्धा गर्नेछन्। २०२२ मा आयोजना हुने प्लेअफबाट शीर्ष २ टिम विश्वकप छनोट खेलमा प्रवेश गर्नेछन्।
विश्वकप छनोट २०२२ मा आयोजना हुनेछ। जहाँ सुपर लिगका पुछारका ५, लिग-टु बाट आएका ३ र प्लेअफबाट आएका २ राष्ट्र गरी १० टिमले विश्वकप छनोटमा प्रतिस्पर्धा गर्नेछन्। सुपर लिगमा टेस्ट मान्यता प्राप्त १२ देश र नेदरल्याण्ड्स रहेका छन्। यस्तै च्यालेन्ज लिगमा आइसिसी वरियतामा २१ सहित ३२ औँ स्थानसम्म रहेका देशले प्रतिस्पर्धा गर्नेछन्।
विश्वकप छनोटबाट विजेता र उपविजेता बन्ने टिमले मात्रै भारतमा सन् २०२३ मा आयोजना हुने विश्वकप क्रिकेटमा भाग लिन पाउने छन्। विश्वकपमा १० टिमको सहभागिता रहने छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
