काठमाडौं–बुधबारबाट सुरु भएको सत्ताधारी दल नेकपा केन्द्रीय समिति बैठकमा पेश गरिएको राजनीतिक प्रतिवेदनमा सरकारका राम्रा काम र सुधार गर्नुपर्ने कामसमेत उल्लेख गरिएका छन्।
प्रतिवेदनमा राम्रा कामको सूचीमा ‘जोड गरिएको’, ‘प्रयास गरिएको’ जस्ता शब्द प्रयोग गरिएको छ भने सुधार गर्नुपर्ने सूचीमा राखिएका ६ बुँदामा सरकारलाई सचेत गराउने भाषा छनोट गरिएको छ ।
राम्रा ७ काम
१.संघीय प्रणाली कार्यान्वयनमा आवश्यक नीति, विधि र कानुन निर्माणमा पहल लिई तीनै तहका सरकारका काम कारबाही अगाडि बढाउन सहज बनाएको। संघीयता कार्यान्वयनमा जोड गरेको।
२. विधिको शासन सुदृढ गर्ने आधार तयार पार्दै लगेको।
३. स्वतन्त्र एवं सन्तुलित परराष्ट्र नीतिमार्फत् छिमेकी लगायतका अन्तर्राष्ट्रिय सम्बन्धलाई बिस्तार गर्दै लगेको। भारत र चीनमा भएका उच्चस्तरीय राजनीतिक भ्रमणमा भएका सहमति र समझदारीले सकारात्मक मोड लिएको।
४.सामाजिक सुरक्षा, रोजगारी सिर्जना, सुशासन प्रवद्र्धन, सेवा प्रवाहमा सहजीकरणका निम्ति सरकारका तर्फबाट निरन्तर पहल भइरहेको।
५.सूचना प्रविधिका माध्यमबाट सेवा प्रवाह र सुशासन अभिवृद्धि गर्ने दिशामा समुन्नत र सबल सामाजिक वातावरण निर्माणमा जोड गरिरहेको।
६. युवा खेलकुदको विकासमा सरकारका तर्फबाट विविध योजना र कार्यक्रममार्फत् सम्बोधनको सकारात्मक प्रयास भइरहेको छ। यसको ठोस प्रमाण र अभिव्यक्तिको रुपमा १३ औं सागको भब्य र सफल आयोजना र नेपाली खेलाडीहरुले प्रदर्शन गरेको उत्कृष्ट खेल र हासिल गरेको पदकहरूको तालिकाले प्रस्तुत गरेको छ ।
७. गत वर्षको तुलनामा यो वर्ष शान्ति सुरक्षामा उल्लेख्य सुधार ।
सुधार्नुपर्न ६ काम
१. संघीयताको प्रभावकारी कार्यान्वयनका लागि संघ, प्रदेश र स्थानीय तहबीच क्षेत्राधिकार स्पष्ट पार्न ऐनहरू बनाउनुपर्ने।
२. विधेयक मस्यौदा गर्दा सरोकारवाला समूह र विज्ञ समूहसँग छलफल गरेर बनाउनु पर्ने। गुठी विधेयकको विरोधबाट पाठ लिनु पर्ने।
३. संबैधानिक र राजनीतिक नियुक्तिमा ढिलाइ गर्न नहुने। नियुक्ति गर्दा समावेशी र समानुपातिक मान्यताअनुसार गर्नुपर्ने।
४. सुशासन कायम गर्न र भ्रष्टाचार नियन्त्रण गर्न अझ प्रभावकारी कदम चाल्नुपर्ने।
५. ठूला परियोजना बन्न समय लाग्दा जनताले विकासको अनुभव गर्न नपाएकाले साना परियोजना बनाउनुसमेत ध्यान दिनुपर्ने।
६. जनतामा भरोसा र उत्साह बढाउने नीति तथा कार्यक्रम र बजेट ल्याउनुपर्ने ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
