काठमाडाैं- प्रधानमन्त्री केपी शर्मा ओलीले सरकारले तीव्र गतिमा काम गरिरहेको दाबी गरेका छन्। राष्ट्रिय सभागृहमा सुरु भएको नेपाल कम्युनिस्ट पार्टी (नेकपा)को केन्द्रिय कमिटी बैठकमा बोल्दै अध्यक्षसमेत रहेका ओलीले सरकार गठन भएदेखि विविध क्षेत्रमा उत्साहजनक रुपमा काम गरेको दाबी गरे।
‘सरकारले काम नगरेको होइन, काम हुँदै नभएको होइन, हुँदै छन्,’ उनले भने, ‘नारायाणी नदीमा छिटै क्रुज चल्ने तयारीमा छ। एकै दिनमा काम भइहाल्दैन नि विस्तारै हुने हो, हुँदैछ।’ उज्यालो नेपालको अभियानअन्तर्गत २०७५ जेठदेखि नै देशभर लोडसेडिङ्गमुक्त भएको भन्दै ओलीले भेरी बबइ डाइभर्सनको बाँध निर्माण कार्य अघि बढ्नु सुखद् भएको दावी गरे।
४० वर्षपछि त्रिभुवन विमानस्थलको पुननिर्माण गरिएको, देशभर विमानस्थल विस्तारको काम भइरहेको, पाँचवटा धावनमार्गको काम भइरहेको उनले बताए। कतिपय रात्रिकालीन सेवा पनि सुरु भइरहेको दाबी उनले गरे।
‘प्रधानमन्त्री, प्रदेश प्रमुखहरुको आवास तथा सम्पर्क कार्यालय निर्माण भइरहेको छ। काठमाडौंको फोहोर व्यवस्थापन बन्चरे डाडाँमा हुँदैछ,’ उनले भने, ‘तातोपानी नाकाबाट व्यापार अब सुरु हुँदैछ। मेलम्ची खानेपानी यसै आर्थिक वर्षमा सम्पन्न गर्ने गरी काम गरिहरहेको छ। यसै आर्थिक वर्षदेखि पानी काठमाडौं आउने छ।’
तुइन विस्थापनअन्तर्गत १२५ वटा तुइन विस्थापन यही सरकारले गरेको दाबी उनले गरे। आफू सरकारमा आएपछि २२८ वटा अस्पतालका भवन सरकारले निर्माण गरेको, पुनर्निर्माणमा पनि सरकारले ४ लाख भन्दा धेरै निजी आवास निर्माण गरिसकेको दाबी उनले गरे।
'जोखिमयुक्त बस्तीमा रहेका २ हजार लाभग्राहीले रकम पाएका छन्। पुनर्निर्माणमा व्यापक तीव्रता भइरहेको छ। यसमा असाधारण प्रगति भएको छ।' उनले भने, 'पुरातात्विक भवन र सुरक्षा निकायका लागि आवश्यक भवन धमाधम सम्पन्न भइरहेका छन्।' धरहराकाे छैटाैं तह ढलान भइरहेको उनले बताए। यो बाहिरबाट आँखाले देख्न सकिन्छ उनकाे भनाइ छ।
रानीपोखरीको पुनर्निर्माण भइरहेको, २ लाख ७० हजार बालबालिकालाई यही सरकारले विद्यालय पुर्याएको उनले बताए। पाठ्यपुस्तक नपुगेको गुनासो समाप्त पारिएको उनकाे भनाइ छ।
ओलीले लिम्पियाधुरा हाम्रो हो भनेर पहिलोपटक पत्राचार भएको बताए। उनले लिम्पियाधुराका बारेमा भारतसँग वार्ता भइरहेकाे पनि जानकारी दिए।
'हाम्रो सम्पूर्ण प्रमाणहरुका साथ भारतसँग वार्ता हुन्छ। लिपुलेक, कालापानी र लिम्पियाधुरा दावी गर्नेछौं। केही कुरा प्रारम्भ भएको छ,' उनले भने, 'याे सरकार राष्ट्रवादी सरकार हो। यो देशभक्त सरकार हो। कसैसँग डराउँदैन। यो सरकार कुनै पनि अनुचित कुराबाट डराउँदैन।'
ओलीले सरकारविरुद्ध प्रचार युद्ध र प्रचार आक्रमण छेडिएको बताए । भने, 'युद्ध पनि दुईतर्फी हुन्छ। हामी युद्धमा छैनौं। तसर्थ, हामीविरुद्ध प्रचार आक्रमण छेडिएको छ।'
उनले सरकारले प्रशस्तै काम गरेको बताए। ओलीले भने, 'सरकार नतिजाबाट जवाफ दिन सक्ने ठाउँमा छ।'
सरकारले काम गर्दा केही कमजोरी भएकाे हुनसक्ने उनकाे भनाइ छ। प्रधानमन्त्री ओलीले भने, 'हामी काम नगरी बसेका छैनौं। निर्वाचनपछि हामीले असाधारण काम गरेका छौं।'
सरकारले संविधान कार्यान्वयनका सन्दर्भमा महत्त्वपूर्ण काम गरेको ओलीले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768438874.png)
-1764146706.png)
-1768395492.png)
