काठमाडौं- नेपाली राष्ट्रिय टिमका युवा लेग स्पिनर सन्दीप लामिछाने ओमान र अमेरिकासँग हुने त्रिदेशीय सिरिजका लागि बिग ब्यास लिग छाडेर नेपाल फर्किएका छन्। उनी सोमबार बिहान काठमाडौं आइपुग्ने छन्।
आउँदो २२ देखि २९ गतेसम्म त्रिवि क्रिकेट मैदानमा हुने आइसिसी विश्वकप क्रिकेट लिग-२ अन्तर्गत ओमान र अमेरिकासँगको त्रिदेशीय सिरिजका लागि सन्दीप फर्कन लागेका हुन्।
नेपाल क्रिकेट संघ (क्यान) ले गएको शुक्रबार ज्ञानेन्द्र मल्लको कप्तानीमा १४ सदस्यीय टोलीको घोषणा गरेको थियो। जसमा बसन्त रेग्मीको अनुपस्थितिले सन्दीप लामिछाने थप महत्वपूर्ण खेलाडी देखिएका छन्। १३औँ दक्षिण एसियाली खेलकुदको समयदेखि नै चोटग्रस्त रहेका सोमपाल कामी चोटकै कारण टिममा परेका छैनन्।
उता बिग ब्यासमा सन्दीप रहेको मेलबर्न स्टार्स १४ खेलमा १० जित, ४ मा हारसहित शीर्ष स्थानमा रहेको छ। सन्दीपले खेलेका १३ खेलमा १५ विकेट लिएका छन्। शनिबार ब्रिसबेन हिटसँग ७१ रनले हारेको खेलमा पनि सन्दीपले ४ ओभरमा १६ रन मात्र दिएर १ विकेट लिएका थिए।
सन्दीपसँगै तीव्र गतिका बलर हरिस रौफ बंगलादेशसँगको टी ट्वान्टीको लागि पाकिस्तानमा रहेकाले मेलबर्न स्टार्स समस्यामा देखिएको छ। सन्दीपलाई पूरा सिजन टिममा खेलाउन पाउने आशमा रहेको मेलबर्न नेपालको सिरिजले समस्यामा परेको बताइएको छ।
‘यो प्रतियोगिताभर हाम्रो स्पिन बलिङको अट्याक निकै राम्रो भएको थियो। सन्दीपले जब छाडेर जानुपर्ने भयो भनेको थियो तब मैले राम्ररी कुरा गर्नै सकिनँ, किनभने ऊ निकै राम्रो खेलाडी हो। प्रतियोगितामा अगाडि बढ्न उसको भूमिका महत्वपूर्ण हुने थियो’ मेलबर्न स्टार्सका प्रशिक्षक डेभिड हस्सीले क्रिकइन्फोसँग भनेका छन्।
ओमान र अमेरिकासँगको त्रिदेशीय सिरिजका लागि नेपाली टिम अहिले पोखरामा अभ्यासमा रहेको छ। जहाँ मलेसियाको टिमसँग नेपालले ३ खेलको एकदिवसीय सिरिज नेपालले क्लिन स्वीप गरेको थियो।
किन महत्वपूर्ण छ लिग-२?
आइसिसी विश्व कप क्रिकेट लिग-२ सन् २०२३ मा आयोजना हुने विश्वकपसम्म पुग्ने बाटो हो।
लिग-२ मा अहिले सात देश छन्। २०१९ को अगष्टबाट नै सुरु भएको यो लिग-२ मा नेपाल, अमेरिका, ओमान, स्कटल्यान्ड, नामिविया, युएई र पपुवा न्युगिनी रहेका छन्। जसमा अमेरिका, स्कटल्यान्ड र पपुवा न्युगिनीले समान ८-८ खेल खेलिसकेका छन् भने, नामिविया, ओमान र युएईले समान ४-४ खेल खेलिसकेका छन्। नेपालको भने ओमान र अमेरिकासँगको सिरिज नै पहिलो हो।
जसअनुसार अमेरिकाले १२ अंकसहित शीर्ष स्थानमा रहँदा स्कटल्यान्ड ९ अंक बनाएर दोस्रो र नामिविया र ओमान समान ६-६ अंक बनाउँदै तेस्रो र चौथो स्थानमा छन्। युएईले ३ अंक बनाएको छ। यता, ८ खेलमा सबैमा पराजित भएको पपुवा न्युगिनी भने लिग-२ को पुछारमा छ।
यसरी एउटा टिमले लिग-२ मा ३६ वटा खेल खेल्नेछ। लिग-२ बाट शीर्ष ३ टिमले २०२३ को विश्व कप छनोटमा सिधै स्थान बनाउने छन्।
बाँकी चार टिमले पनि विश्वकप छनोटमा प्रवेश गर्न अर्को मौका पाउने छन्। जसलाई आइसिसीले प्लेअफको उपनाम दिएको छ।
जहाँ लिग-२ बाट आएका ४ टिम र च्यालेन्ज लिगबाट आएका शीर्ष २ टिमसहित ६ टिमले प्लेअफमा प्रतिस्पर्धा गर्नेछन्। २०२२ मा आयोजना हुने प्लेअफबाट शीर्ष २ टिम विश्वकप छनोट खेलमा प्रवेश गर्नेछन्।
विश्वकप छनोट २०२२ मा आयोजना हुनेछ। जहाँ सुपर लिगका पुछारका ५, लिग-२ बाट आएका ३ र प्लेअफबाट आएका २ राष्ट्र गरी १० टिमले विश्वकप छनोटमा प्रतिस्पर्धा गर्नेछन्।
सुपर लिगमा टेस्ट मान्यता प्राप्त १२ देश र नेदरल्याण्ड्स रहेका छन्। यस्तै च्यालेन्ज लिगमा आइसिसी वरियतामा २१ सहित ३२ औँ स्थानसम्म रहेका देशले प्रतिस्पर्धा गर्नेछन्।
विश्वकप छनोटबाट विजेता र उपविजेता बन्ने टिमले मात्रै भारतमा सन् २०२३ मा आयोजना हुने विश्वकप क्रिकेटमा भाग लिन पाउने छन्। विश्वकपमा १० टिमको सहभागिता रहने छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।