काठमाडौं- बार्सिलोनाले नयाँ प्रशिक्षक ल्यायो तर अवस्था उस्तै देखिन्छ, बल आफैसँग खेलाइरहनेबाहेक। डिफेन्समा देखिएको कमजोरी, गोलमा बढ्ने खेलाडीको अभाव र लियोलन मेस्सीमा रहने निर्भरता।
यसैले त ला लिगा अन्तर्गत शनिबार राति भ्यालेन्सियाविरुद्धको खेलमा मेस्सीको सट ‘मिसफायर’ हुँदा टिम पराजित भयो। कोपा डेल रेमा तेस्रो डिभिजनको युडी आइबिजासँग नै कठीन जित पाएको बार्सिलोनामा एन्टोनियो ग्रिजम्यानले अन्तिममा जसरी जोगाएका थिए, त्यो भ्यालेन्सियाविरुद्ध हुन सकेन।
बार्सिलोना गोलपिकर मार्क आन्द्रे टेर स्टेगनको केही राम्रो बचाउलाई छाडेर हेर्दा नयाँ प्रशिक्षक क्विके सेटियन सन्तुष्ट हुने ठाउँ छैन। योहान क्रुफको बार्सिलोना शैली सेटियनले मैदानमा उतार्न सकेनन्। एर्नेस्टो भालभर्देलाई बर्खास्त गर्दै ल्याइएका सेटियनको तीन खेलमा नै मूल्याकंन गर्न हतार हुने भए पनि उनको शैली खेलाडीले पछ्याउन सकेको देखिँदैन।
खेर जाने बल ‘पोसेसन’ पोस्टमा हुने कम प्रहार नै बार्सिलोनालाई घातक भइरहेको छ। विपक्षी काउन्टर अट्याकमा बढ्दा छरपस्ट हुने मिडफिल्ड र डिफेन्समा गोलकिपरको मात्र बल चल्ने कुरा पनि भएन।
ला लिगामा बार्सिलोनाको यो चौथो हार हो। यसअघि एथ्लेटिको बिल्बाओसँग १–० ले, ग्रानडासँग २–० ले, लेभान्टेसँग ३–१ ले हारेको बार्सिलोना सेटियनको समयमा पनि भ्यालेन्सियासँग २–० ले पराजित भयो। सबै अवे मैदानमा नै। ती खेललाई विचार गर्ने हो भने हारको कारणमा समानता पनि देखिन्छ। त्यसो भए बार्सिलोनामा के फेरियो?
२१ खेलमा २५ गोल खाएको बार्सिलोना देखिएको जति नै कमजोर छ कि सामान्य कमजोरी हो त? बार्सिलोनाले यति धेरै गोल खाएको २००३–०४ को सिजनपछि यसैपटक हो। त्यसमा पनि सेटियनको आगमनपछि बढेको बल पोसेसन बार्सिलोनाको गोलमा परिणत हुन नसक्नु कमजोरी ठूलो छ।
‘खेलाडीहरुले राम्रो खेलेनन्, या त हामीले नै खेलाडीहरुलाई हाम्रो तरिका बुझाउन सकेका छैनौँ’, प्रशिक्षक सेटियनले खेलपछि भने, ‘हामीले अनावश्यक पासहरु खेलेर समय खेर फाल्यौँ, यसमा हामीले सुधार गर्नै पर्छ।’
बार्सिलोनाले जति नै बल खेलाए पनि भ्यालेन्सियाको पोस्टको दिशामा १४ बल प्रहार गरेको थियो। त्यसमा पनि ११ प्रहार त कप्तान लियोनल मेस्सीले मात्रै गरेका थिए। बाँकी तीन प्रहार सम्झनलायक पनि थिएनन्। यसैले मेस्सीलाई रोक्न सके बार्सिलोनालाई रोक्न सकिने विपक्षी रणनीति सफल भयो।
घाइते रहेर चार महिनाका लागि टिमबाहिर रहेका लुइस स्वारेजको कमि अन्सु फातीले पूरा गर्न सकेनन्। कोपा डेल रेमा देखिएको ग्रिजम्यानको प्रहार भ्यालेन्सियाविरुद्ध हुन सकेन। ला लिगाका अरु खेलमा डिफेन्ससम्म पुगेर बल जोगाउन लागिपर्ने ग्रिजम्यानको उपयोग कसरी गर्ने भन्नेमा सेटियन स्पष्ट छैनन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।