भैरहवा– घरको आर्थिक अवस्था कमजोर थियो। यसैले केही कमाउन भनेर बाँकेको राप्ती सोनारी गाउँपालिका–४ बैजापुरका अमरबहादुर सुनार १२ वर्षअघि भारत गए। साथमा श्रीमती लक्ष्मी सुनार र ७ वर्षका छोरा सन्तोष पनि थिए। लुधियाना पुगेको केही समयपछि सन्तोष हराए।
छोरा हराएपछि सुनार परिवारमा चिन्ता थपियो। एकातर्फ आर्थिक अवस्था कमजोर, अर्कोतर्फ सन्तान हराएको पीडा। सन्तान भेट्टिने आशामा सुनार दम्पति भारतमै बसिरहे। बालकको खोजतलास गर्दा कतै पत्तो लागेन। उनीहरुकाे खुसी हराए।
१२ वर्षमा खोलो पनि फर्कन्छ भनेझैं सुनार परिवारमा पनि १२ वर्षपछि खुसी फर्किएको छ। भारतस्थित नेपाली दूतावासको समन्वय तथा प्रवासी नेपालीमित्र मञ्च र मानव कल्याणमित्र मञ्च नेपालको सक्रियतामा सन्तोषले १९ वर्षको उमेरमा अभिभावकको साथ पाएका छन्।
सुनार परिवारमा अहिले सबैको मुहारमा चमक आएको छ। ‘छोरा भेट्टाउन सहयोग गर्नुहुने सबैप्रति आभारी छु, सबैलाई धन्यवाद दिन चाहन्छु’ अमरले भने, ‘सडकको सुविधा थिएन, डुंगा तरेर जानुपथ्र्यो, आर्थिक अवस्था कमजोर थियो, भारतमा गएर पैसा कमाउँला भन्ने सोच थियो, तर आफूसँगै लगेको छोरा नै हराएपछि झन् समस्या थपियो।’
सन्तोषकी आमा लक्ष्मीले छोरा भेट्टाउने आशा नै मारिसकेकी थिइन्। ‘भगवानले १२ वर्षपछि पनि हाम्रो पीडा सुनेर छोरालाई फर्काए, योभन्दा बढी खुसीको कुरा के होला र?’ उनले भनिन्।
उनले छोरा भेट्टाएपछि आफूहरुको पीडा हराएर गएको बताए। त्यस्तै सन्तोष पनि अभिभावक पाएकोमा निकै खुसी छन््। भन्छन्, ‘विगतमा के भयो, कसरी हराएँ त्यो सबै त सम्झन सक्दिनँ, तर मलाई अभिभावकसम्म ल्याउने संस्थालाई सदैव सम्झिनेछु ।’
सन्तोषलाई जिल्लाप्रहरी कार्यालय रुपन्देहीमार्फत् अभिभावकको जिम्मा लगाइएको छ। सो क्रममा रुपन्देही प्रमुख प्रहरी उपरीक्षक हेमकुमार थापाले हराएका बालकको उद्धारमा सहयोग गर्ने सम्पूर्णलाई धन्यवाद दिए।
यसरी गरिएको थियो उद्धार
सन्तोषलाई २०७५ साउन ५ गते भारतबाट उद्दार गरिएको थियो। तर उनलाई अभिभावकसम्म आउन भने त्यति सजिलो थिएन। जिल्ला प्रहरी कार्यालय रुपन्देहीका अनुसार सन् २०१४ जनवरी २२ मा लखनउमा ११ वर्ष ४ महिनाका बालक बेवारिसे अवस्थामा भेटिए। सन्तोष नाम बताउने उनले घर नेपाल दुर्गानगर, बाबु रनबहादुर र आमा कमलाले मिस्त्रीको काम गर्ने बताउथे बालकले।
भारतका विभिन्नबालगृह हुँदै राजकीय बालगृह देवरियामा बसेका सन्तोष, विजय तामाङ, राजेशकुमार, सुमितकुमार गरी ४ जनालाई पारिवारिक पुनर्मिलनका लागि भारतस्थित नेपाली दूतावासको सिफारिससहित मित्र मञ्चले जिल्ला प्रहरी कार्यालय रुपन्देही, बालबालिका तथा जेष्ठ नागरिक सहायता केन्द्रमा ल्याएको थियो ।
बालकहरुको अभिभावक पत्ता नलागेसम्म अस्थायी संरक्षणका लागि ४ बालकलाई प्रहरी कार्यालय रुपन्देहीले तिलोत्तमा नगरपालिका कोटिहवास्थित नेपाल अविनास अनाथ आश्रममा पठायो। ४ मध्ये ३ जनाको अभिभावक पत्ता लागे पनि सन्तोषको ठेगाना र अभिभावक पत्ता लाग्न सकेको थिएन। त्यसपछि उनलाई बालगृहको संरक्षणमा पशुपति मावि कोटिहवामा भर्ना गराइयो। प्रहरीले अभिभावक र ठेगाना खोजीकार्य भने जारी राखिरह्यो । त्यसपछि सन्तोषलाई सोधपुछ गर्ने क्रममा उनले घर दुर्गानगर, कुसुम, झोलुंगेपुलसम्म संरक्षण अधिकारीलाई बताए।
त्यसपछि त्यस क्षेत्रका स्थानीयसँग सम्पर्क गर्दा बैजापुर हेल्थपोष्टका कर्मचारी कुविजा कोइरालाले सन्तोष त्यही क्षेत्रको हुनसक्ने अनुमानगरिन् । बालकको ठेगाना खोज्ने प्रयास जारी नै रह्यो। त्यसपछि भैरहवा–बुटवल सडकखण्डमा काम गर्ने एक मजदूरलाई सोध्दा आफ्नो गाउँको बालक भारतमा हराएको बताए। त्यस्तै बैजापुर गाउँका अगुवा सन्तोष खड्कासँग बुझ्दा हराएको बालकका अभिभावक भारतमै रहेको जानकारी आएपछि २०७६ पुस ६ गते अमरबहादुर सुनार र लक्ष्मी सुनार बालगृहमा आइ आफ्नो छोरा हो भन्ने पहिचान गरेको प्रहरीको भनाइ छ।
पारिवारिक पुनर्मिलनका लागि सन्तोषको जन्मदर्ता, नाताप्रमाणित स्थानीय तहको सिफारिस लगायतका कागजात प्राप्त भएपछि संरक्षक कृष्णप्रसाद ज्ञवाली थप जानकारी लिन सन्तोषको घर पुगेको प्रहरीले जनाएको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
